هندى وێڤه‌تره توركيا ژ ئێكه‌تيا ئورۆپا دوورتر دكه‌ڤيت
ئه‌ڤرۆ نيوز، فاتما مزوورى:
جڤاتا وه‌زيرێن ئێكه‌تيا ئورۆپا چوونا توركيا بۆ ناڤ وێ ئێكه‌تيێ دوور دبينيت.
ئێكه‌تيا ئورۆپا ئاماژه ب وێ ئێكێ كه‌ت كو چه‌ند وێڤه‌تره ئه‌نقه‌ره ژ ئێكه‌تيا ئورۆپا دوورتر دكه‌ڤيت و ئه‌گه‌رێ گوهۆڕينێ د ده‌مێن نێزيك دا د كێمن.
ب گۆره‌ى ئاژانسا فرانس پرێس جڤاتا وه‌زيرێن كاروبارێن ئورۆپا د ئێكه‌تيا ئورۆپا دا و پشتى ب دووماهى هاتنا كۆمبوونا خوه يا ل لوكسمبۆرگ داخۆيانيه‌ك دا و گۆت: “دانوستاندنێن هاتنا توركيا بۆ د ناڤ ئێكه‌تيا ئورۆپى دا گه‌هشتينه خاله‌كا راوه‌ستيايى”.
په‌يوه‌نديێن ئێكه‌تيا ئورۆپا د سالێن دووماهيێ دا ل گه‌ل توركيا ژ ئه‌گه‌رێ فشارا ل سه‌ر مافێن مرۆڤان و بزاڤا ده‌سته‌سه‌ركرنێ يا سه‌رۆكێ توركيا پشتى بزاڤا كوده‌تا سه‌رنه‌كه‌فتى ئالوز بووينه.
جڤاتا وه‌زيرێن ئورۆپا د داخۆيانيا خوه دا گۆت: “جڤات ده‌رباره‌ى پاشكه‌فتنا به‌رده‌وام يا ده‌سته‌لاتا قانوونێ و مافێ مررۆڤان و مافێن سه‌ره‌كى و يێن ده‌ربڕينێ، يا دلگرانه”.
ئاماژه ب وێ چه‌ندێ ژى كر كو توركيا دێ وه‌كو هه‌ڤپشكه‌كا سه‌ره‌كى بۆ ئێكه‌تيا ئورۆپا مينيت د گه‌له‌ك دوسيان دا، وه‌كو دوسيا هاريكارى ژبۆ راوه‌ستاندنا هاتنا كۆچبه‌ران بۆ ئورۆپا، لێ نابيت چاڤ ل سه‌ر تێكچوونا ده‌سته‌لاتا دادوه‌ريێ و پرۆستێن گرتن و ئارمانجكرنا رۆژنامه‌ڤان و په‌رله‌مانتار و كه‌سێن به‌ره‌ڤانيێ ژ مافێن مرۆڤان دكه‌ن د به‌رده‌وام بن.