هندي تيرۆر و گه‌ف ل سه‌ر كوردستانێ هه‌بن دێ هاريكاريا كوردان كه‌ين
كۆنسولا ئه‌لمانيا ل ئستانبولێ تايبه‌ت بۆ رۆژناما ئه‌ڤرۆ راگه‌هاند كو وه‌لاتێ وان ده‌ست ب هاريكاريا هه‌رێما كوردستانێ كريه و د به‌رنامێ حوكمه‌تێ دايه د وارێن سه‌ربازي و هاريكاريا مرۆڤي دا هه‌ڤكاريا خوه ب هه‌رێما كوردستانێ را به‌رده‌وام بكه‌ت و بۆ ئه‌لمانيا گرنگه كو هه‌رێما كوردستانێ و عيراقێ ژ تيرۆرستان بهێته پاقژكرن.
يوتتا فۆلكه كۆنسولا ئه‌لمانيا ل باژێرێ ئسته‌نبول يێ توركيا ل سه‌ر په‌يوه‌نديێن ئه‌لمانيا ل گه‌ل هه‌رێما كوردستانێ و چاوانيا هه‌ڤكاريا د ناڤبه‌را هه‌ردو ئاليان و شاندنا چه‌كێن گران و هاريكاريێن مرۆڤي دا داخۆيانيێن گرنگ دانه رۆژناما ئه‌ڤرۆ و ل سه‌ر په‌يوه‌نديێن وه‌لاتێ خوه ل گه‌ل هه‌رێما كوردستانێ يوتتا فۆلكه ديار كر كو په‌يوه‌نديێن وان ل گه‌ل هه‌رێما كوردستانێ د ئاسته‌كي بلند دانه و ئه‌و گرنگيه‌كا مه‌زن دده‌نه ئارامي و ئازاديا هه‌رێما كوردستانا عيراقێ و گۆت: »د ره‌وشا نها دا كۆنسۆلخانه‌يا مه ل باژێرێ هه‌ولێرێ پايته‌ختێ هه‌رێما كوردستانێ هه‌يه و د وارێ سياسي و ئابووري دا په‌يوه‌نديێن مه‌د باشن و ئه‌ز باوه‌ر دكه‌م دێ رۆژ ب رۆژێ ژي ئه‌و په‌يوه‌ندي گه‌شتر بن، ژ به‌ر كو ئه‌م گرنگيێ دده‌نه ئازادي و ئاراميا هه‌رێما كوردستانێ و ئه‌م نه‌شێين رۆلێ ته‌ماشه‌ڤانان د هێرشێن ل هه‌مبه‌ر كوردان دا بگێرين و مه ده‌ست ب شاندنا چه‌كێن گران بۆ شه‌رێ تيرۆرا داعشێ كريه و دێ چه‌كێن گه‌له‌ك پێشكه‌ڤتي يێن دي ژي هێنه شاندن و هه‌تا تيرۆرست وه‌ك گه‌ف ل هه‌مبه‌ر كوردان ل هه‌رێمێ بمينيت دێ هه‌ڤكاريا مه يا سه‌ربازي ژي زێده‌تر بيت«.
كۆنسۆلا ئه‌لمانيا ل ئسته‌نبولێ سه‌باره‌ت ب ره‌خنه‌يێن بێده‌نگيا ئێكه‌تيا ئورۆپا ل هه‌مبه‌ر رێكخستنا تيرۆرست يا داعشێ ژي راگه‌هاند كو ئه‌و ره‌خنه نه راستن و گۆت: »ژ به‌ر كو ژ رۆژا ده‌ستپێكێ يا هێرشێن داعشێ مه هه‌م ب داخۆياني و هه‌م ژي ب برياره‌كا دروست راگه‌هاند كو ئه‌م ل گه‌ل كوردانين و دێ هاريكاريا سه‌ربازي و مرۆڤي بۆ هه‌رێما كوردستانێ شينين و ئه‌ڤرۆ ژي مه ب كرياري سۆزێن خوه بجيه ئيناينه و ئه‌م دێ هبه‌رده‌وام بين د هاريكاريێن خوه دا، دڤێت بهێته زانين ئێكه‌تيا ئورۆپا هه‌ر ده‌م ل گه‌ل ديمۆكراسي، ئاشتي، ئارامي و ئازاديان بوويه و بۆ ژناڤبرنا تيرۆر و تيرۆرستان ژي خوه‌دان هه‌لويسته و د خه‌باتا ل هه‌مبه‌ر تيرۆرستان دا خوه نه‌دايه پاش و هه‌تا هه‌رێم ئارام بيت ژي دێ د شه‌رێ ل دژي تيرۆرێ دا ل گه‌ل كوردان جهێ خوه بگريت«.
ل سه‌ر پرسيارا ئاگاهيا هه‌وه ژ په‌نابه‌رێن كوردێن ئێزدي و كوردێن رۆژئاڤا و عه‌ره‌ب و مه‌سيحيێن كو ژ ده‌ڤه‌رێن شه‌ري يێن عيراقێ و سووريێ هاتينه هه‌رێما كوردستانێ، كۆنسۆلا ئه‌لمانيا ديار كر ئه‌و ژ ره‌وشا په‌نابه‌ران ئاگاهدارن و گۆت: »حوكمه‌تا مه به‌رده‌وام ل گه‌ل ئاليێن په‌يوه‌نديدار يێن هه‌رێما كوردستانێ و عيراقێ و سازيا په‌نابه‌ران يا سه‌ر ب نه‌ته‌وێن يه‌كگرتي و كۆنسۆلێ مه ل هه‌ولێرێ و به‌غدايێ د ناڤ دانوستاندن و په‌يوه‌نديان دايه و رۆژ ب رۆژ ئاگاهيان وه‌ردگرين، ژ به‌ر ڤێ يه‌كێ ژي ئه‌م دخوازين نه ب تنێ هاريكاريا سه‌ربازي به‌لكو هاريكاريا مرۆڤي ژي بگه‌هينه هه‌رێما كوردستانێ و عيراقێ و د وي واري دا بارێن ل سه‌ر حوكمه‌تا كوردان كێمتر بكه‌ين«.
ل سه‌ر شه‌رێ پێشمه‌رگه‌يێن كوردستانێ ل هه‌مبه‌ر داعشێ ژي يوتتا فۆلكه راگه‌هاند ئه‌و وه‌سا دبينيت پشتي كو چه‌كێن گران گه‌هشتنه ده‌ستێ هێزێن پێشمه‌رگه ئێدي تيرۆرست نه‌شێن ئاخا كوردان و عيراقێ داگير بكه‌ن و گۆت: »ئه‌مريكا ب رێيا هێزێن ئاسماني بنگه‌هێن داعشێ بۆمبه‌باران دكه‌ت و هێزێن كوردان ژي ئه‌و هێزا وان هه‌يه كو ژ ئه‌ردي ڤه تيرۆرستان ژناڤ ببه‌ن و ژ خوه بۆ ڤێ ئارمانجێ ژي وه‌لاتێ مه به‌ريا كو ل په‌رله‌ماني بريارا شاندنا چه‌كێن پێشكه‌ڤتي و يێن گران بۆ هه‌رێما كوردستانێ وه‌ربگريت دا كو ده‌ره‌نگ نه‌مينن چه‌ك شاندن و ل دووڤ زانياريێن ل به‌ر ده‌ستێن مه هێزێن كوردان رۆژ ب رۆژێ دربێن كوژه‌ك تيرۆرستان ل دده‌ن و وان ژ ئاخا خوه ده‌ردخينن.
د دووماهيا ئاخڤتنا خوه دا ژي كۆنسۆلا ئه‌لمانيا ديار كر كو ژ به‌ر ره‌وشا نه ئارام و ئالۆزيێن كو ل ليبيا، سودان، يه‌مه‌ن، سووريێ و نيجێريا و هژماره‌ك وه‌لاتێن دي هه‌نه رێكخستنێن تيرۆرست بنگه‌هێن خوه بهێز كرنێ په‌يدا كرينه و گۆت: »بۆ ژناڤبرنا تيرۆرێ پێدڤي ب خه‌باته‌كا به‌رفره‌ه يا جيهاني هه‌يه و دڤێت ئه‌و يه‌ك ده‌ره‌نگ ژي نه‌مينيت، ديسان ل دووڤ هزرا من هه‌كه جيهانا مه بشێت ب ره‌نگه‌كي له‌ز ديمۆكراسيێ ل رۆژهه‌لاتا ناڤين بجه بكه‌ت دێ بنگه‌هێ ب هێزبوونا رێكخستنێن تيرۆرست ژي نه‌مينيت و رێكا شه‌رێن تايفي و مه‌زهه‌بي و ژي لاواز بيت، ژ به‌ر ڤێ چه‌ندێ ژناڤبرنا داعشێ ل هه‌رێما كوردستانێ، عيراقێ و سووريێ گه‌له‌ك گرنگه و ئه‌ز وه‌سا دبينم يه‌كگرتنه‌كا ب هێز ل هه‌مبه‌ر تيرۆرێ د جيهانێ دا دروست دبيت«.
