“هندی تە بڤێت گولەیا خوە دویر بهاڤێژە” ٭
شیان كانیساركی
من ئەڤ بابەتە ب گۆتنا ڤی جامێری دەستپێكر، ئەگەر گۆتن بۆ تە یا ڕوون و ئاشكەرا ژی نەبیت تەماشەی وێنەیی بكە. ئانكۆ هزربكە هەر تشت د ژیانێ دا ژبلی “ بازنەیەكی” چ دی نینە! هەر دێ زڤریت وەكی دەستپێكا خوە، ژیانا تە بازنەیەكێ بچویك یان مەزنە دەستپێكێ ژ زارۆكینیێ دەست پێ دكەت و دویماهیا وی ژی هەر زارۆكینیە، وەكی دبێژن” ئاخ دێ بیتە ئاخ “. ئەگەر تۆ هزربكەی هەر بەرەكێ تو بهاڤێژی كەسەكی، دێ هەر ئەو بەر هێت ب پاتكا تە كەڤیت و تەئێشینیت، ئەز باوەرم خوە ئێك بەركێ بچویك ژی تو یێ ئامادەنابی ب هاڤێژی. ئەم مرۆڤ د ئەزەل دا “ دفیترەتا” خوە دا كەسێن باشین، خوە ئەڤ جیهانە ژی یا ژ “حەزژێكرنێ” دروست بوویی، یاسایە “ هەر تشت خوە د كەتە قوربان، دا تشتەكێ دی بژیت و ب مینیت”، ئانكو د بنەرەت دا كەسێ پتر نێزیكی مێشكی و ب چیتە بۆ ڕەخێ “جانی” سەرفەرازیەك” بێهنفرەهیەك” ل نك پەیدا دبیت، هەمی ژیان ل بەر مرۆڤی دبیتە ئاوازەك و د ڕێكەكا كورت دا ئەو جان دگەهیت “بنەجها” خوە یا ژێ هاتی!
ئەگەر چەند كین و نەڤیان د سینگ و مێشكێ تەدا دكێم بن، پشتڕاستبە كارتێكرن و ئەنجامێن وێ ئێكجار دباش نابن، ئەگەر ل سەر تە دیارنەكەت ژی بێ گۆمان دێ سوباهی ل كەسێن دەوروبەرێن تە، هەر چ نەبیت زارۆكێن تە دەركەڤیت، چونكی نەڤیان و كین پێدڤی گوهۆرینێ یە ب هێزا باش و پوزەتیڤ، ئەگەر دوو ژن و مێر” هەڤژین” ل گەل ئێك د نەخوش بن و هەردەم ب سەروستویێن ئێك ڤە بن “ ڕێزێ ل ئێك نەگرن”، دێ د ئایندەی دا ئەو ئەنجامێن نەباش ل سەر زارۆكێ وان دەركەڤیت. ئەڤا مە گۆتی د زانستێ دەروونی دا دبێژنێ “ كارما” كو هەر ئێكی ژمە كارمایا خوە هەیە ئەڤجا چ یا باش یان خراب. بابەتەكێ گەلەك درێژ و بەرفرەهە دبیت ب گۆتارەكێ نەهێتە شرۆڤەكرن، تو دشێی تەماشەی گوگلی بكەیی یان یا باشتر پەرتووكا نڤیسكار و دەروونناسێ ڕوسی ( س.ن لازاریف)ی ب خوینی، ئەوا ژ لایێ هێژا “ عیماد گە ڕەشید”ی ڤە هاتییە وەرگێڕان بۆ زمانێ كوردی یێ شرین و پەرتووكخانا ژیندا چاپكرییە ل سالا 2020ێ. ئەز باوەرم پشتی خواندنا ڤێ پەرتووكێ و كومكرنا پێزانینێن ژ هەژی ل سەر ڤی بابەتێ گرنگ، تو دێ ژ گەلەك بریارێن خوە لێڤەبی، دێ گەلەك هزرا گوهۆری”بەرەف باشتر” و پشت ڕاست دێ ژ پەشێمانی شاخێن تە ژی هێن!!
٭ سێرجی نیكولا لازاریف Sergey Nikolayevich Lazarev فەیلەسوفەكێ ڕوسییە و تایبەتمەندێ دەروونیە، گەلەك نڤیسین و پەرتووك ل سەر بابەتێن ڕۆحی و كارمایی هەنە، ل سالا 1952ێ ل باژێڕێ Yeysk ژ دایك بوویە. گەلەك بەرهەم و پەرتووكێن باش هەنە، ئێك ژ وان ئەڤا ب ناڤێ “كارما”یە كو د سالێن نوتان دا نڤیسیە و ل گەل چەند پەرتووكێن دی یێن گرێدایی بابەتی ل سالا 1995ێ بەلاڤكرینە.
