هندەك ئالییان هیچ دەستكەفتەك نینە نەچارن ئالیێن دی نە شرین بكەن
چاڤدێرەكێ سیاسی ب پێدڤی دزانیت ئالی باوەرییا خەلكی ب دەستڤەبینن نەك هەڤدو شرین بكەن. هەروەسا دبێژیت، گەلێ كورد ل گەل گەلێن دی ناهێن بەراوردكرن.
عەبدولسەلام بەرواری، چاڤدێرێ سیاسی، ل دۆر دەستپێكرنا دەنگدانا تایبەت یا جڤاتا نوونەرێن ئیراقێ و رەوشا وەلاتی ب گشتی گوت» ئەركێ سەرەكیێ حزبێ ئەوە بشێت باوەرییا خەلكی بۆ چار سالێن داهاتی ب دەستڤەبینیت، ئەڤە ژی تنێ ب پێشكێشكرنا پڕۆژەیێ نوو و نیشادانا دەستكەفتێن پێشتر بیت».
عەبدولسەلام بەرواری دلتەنگییا خوە دیاركر سەبارەت ب « هندەك حزبان كو هیچ دەستكەفتەك و بۆچۆنەكا پاشەڕۆژێ نینە، لەوما كار و پیشەیا خوە كریە نەشرینكرنا ئالیێن دی ل بەرچاڤێ خەلكی».
ناڤبری هوشداری دا» ئەڤ جۆرە رەفتارە، ژبلی وێ چەندێ دبنە ئەگەرێ كرێتكرنا خوە، خەلكی ژی ژ پرۆسەیا هەلبژارتنێ دلسار دكەن».
عەبدولسەلام بەرواری ئاماژە كر» گەلێ كورد ل گەل گەلێن دی ناهێتە بەراوردكرن، چونكە هێشتا بزاڤا برسیكرنا وی دهێتە كرن و گوندێن وی ب نەچاری دهێنە چۆلكرن».
دوپاتكر ژی» هندی ئەڤ گەفە د بەردەوام بن، پێدڤییە نڤشێ نوو خوە و پاشەڕۆژا خوە بپارێزن ب پشكداریكرنێ د پرۆسەیا سیاسی دا و قەردارێن وان كەسان بن كو خوە كریە قوربانی بۆ ئازادیێ».
