هندەك جهێن كەسكاتیێ ل جادەیا بارزان دبنە پاركێن راوەستاندنا ترومبێلان
سندس سالح سلێڤانەیی:
هژمارەكا خودانێن پێشانگەهێن ترۆمبێلان و كۆمپانی و جهێن بازرگانی ل جادەیا (بارزان) ل دهۆكێ، ئەو كەسكاتیێ دكەڤیتە بەرامبەری جهێ وان بۆ خوە كرینە جهێن راوەستاندنا ترۆمبێلان و ڤێ دیاردێ دلگرانی ل دەف خەلكەكی پەیداكریە و ب زێدەگاڤی ل سەر مۆلكێ گشتی د هەژمێرن. بەرپرسێ راگەهاندنا سەرۆكانیا باژێرڤانیا دهۆكێ ژی دبێژیت: دێ دووڤچوونا ڤی بابەتی كەین و هەكە پێدڤی بوو ئەو جه دێ هێنە سزادان و زێدەگاڤی ژی دێ هێنە راكرن.
مستەفا حسێن، هاولاتیەكی مالا وی نێزیكی جهەك ژ وانە دبێژیت: ئەڤ كەسكاتیە مۆلكێ گشتی یە و گەلەك جاران خەلكێ وان تاخان بۆ دەم بۆراندنێ دهێنە ناڤ وی كەسكاتی، لێ مخابن هندەك ژوان جهێن دكەڤنە سەر جادەیا گشتی زێدەگاڤی ل سەر وێ كەسكاتیێ كرینە و بۆ خوە كرینە پاركێن راوەستاندنا ترۆمبێلێن خوە و ڤێ چەندێ ئەم دلگران كرینە، لەورا دخوازین تیمێن باژێرڤانیێ بهێن وان زێدەگاڤیان راكەن، چونكو ئەو نە مۆلكێ وانە بەلكو مۆلكێ گشتی نە و ب مخابنی ڤە رۆژ بۆ رۆژێ ئەڤ دیاردەیا كرێت بەر ب زێدەبوونێ یە.
حەجی درباس، دانعەمرەكە مالا وی دكەڤیتە بەری پێشانگەهێن كڕین و فرۆتنا ترۆمبێلان دبێژیت: هەتا بەری سالەكێ ژی ئەو دانعەمرێن مالێن وان ل ڤێرە رۆژانە دهاتن ل ناڤ ڤی كەسكاتی د روونشتن و دەمێن خۆش لێ د بۆراندن، لێ مخابن خودانێن وان جهێن بازرگانی ئەو خۆشی بۆمە نەهێلان و جهێن روونشتنا نە بۆ خوە كرنە پاركێن ترۆمبێلان، لەورا ئەم د دلگرانین و دخوازین ئەڤ دیاردە زێدەتر بەلاڤ نەبیت و ئەو زێدەگاڤیێن هەی ژی بهێنە راكرن.
شێروان حەسەن، بەرپرسێ راگەهاندنا سەرۆكاتیا باژێرڤانیا دهۆكێ بۆ رۆژنامەیا ئەڤرۆ گۆت: ئەم دێ ب رژدی دووفچوونا ڤی بابەتی كەین و هەكە پێدڤی بوو خودانێن وان جهان دێ هێنە سزادان، هەروەسا ئەو زێدەگاڤی ژی دێ هێنە راكرن، چونكو ئەو كەسكاتی مۆلكێ گشتی یە و كەسێ ماف نینە زێدەگاڤیان ل سەر بكەت.
