هندەك مۆدێلێن نوكە ل گەل كلتۆرێ مە ناگونجن
شاكر ئەتروشی:
حەسەن عەلی نعمان، بەرنیاس ب (حەسەن حەلاق) ئێك ژ سەرتراشێن كەڤنێن دهۆكێ یە، د دیدارەكێ دا بۆ رۆژناما ئەڤرۆ دبێژیت: بەری چل سالان من دەست ب كارێ سەرتراشینێ كرینە و هەتا نوكە یێ بەردەوامم و ب درێژاهیا چل سالێن بۆری هژمارەكا زۆرا مرۆڤان ل بەر دەستێ من فێری ڤی كاری بووینە، ژوانا دو برایێن من كو نوكە ل گەل من كاردكەن.
حەسەنی گۆت: دەمێ ل سالا 1983 من دەست ب سەرتراشینێ كری گەلەك كەسێن رەوشەنبیر و ناڤدار وەك رێڤەبەر و ئاغا و ریهسپی و ماقولێن دەڤەرێ دهاتنە دەف من سەرێ خوە چێدكرن، هندەك ژوان وەغەركرینە و هندەكێن مای ژی هەتا نوكە بەردەوام دهێن و ژبلی دانعەمران گەنج ژی دهێن سەرێ خوە ل دەف من دتراشن و گەلەك رێزێ ل من دگرن، بۆ زانین دەمێ من دەست بڤی كاری كری بهایێ سەرتراشینا هەر كەسەك دینار و نیڤ هەتا دو دیناران بوون و ل وی دەمی ژی هندەك گەنج دهاتن داخوازا مۆدێل و ستایلێن پرچ تراشینێ دكرن و راستە ل وی دەمی مە ب ئامیرێن سادە كاردكر لێ خۆشیەك تێدا هەبوو، نوكە ئامیرێن پێشكەفتی هەنە و هەر كەسەكێ حەزا سەرتراشینێ هەبیت دشێت بچیتە خۆلەكێ یان بۆ دەمەكی ل دەف سەرتراشەكی كاربكەت دێ زوو فێربیت و راستە مافێ هەر گەنجەكی یە داخوازا مۆدێلێن نوو بكەت، بەس نوكە هندەك مۆدێل دەركەفتینە ل گەل كلتۆرێ مە كوردان ناگونجن.
