هندەك وەلاتی ژ بهایێ كارەبا (24) دەمژمێری د دلگرانن
سندس سالح سلێڤانەیی:
تاخێ بەرۆشكێ كو ئێكەم تاخە ل دهۆكێ كارەبا (24) دەمژمێری گەهشتیێ و ژ پرۆژەیێ (رۆناكی) مفاداربووین، خەلكێ وی تاخی كرینە ل سەر دو پشكان بەلاڤكرینە، كو هندەك ژوان دبێژن بهایێ وێ یێ باشە و هندەكێن دی ژی دبێژن بهایێ وێ گەلەكێ گرانە و مە ئەڤ پارە پێ چێنابیت و خودانێ مولیدەیەكێ ژی دبێژیت: هەتا نوكە ئەم چو ژ چارەنڤیسێ موەلیدەیێن خوە نزانین و مە پێشنیازەك ژی بۆ رێڤەبەریا كارەبا دهۆكێ هەیە.
سەعید حسێن، وەلاتیەكێ وی تاخی یە، دبێژیت: پشتی كارەبا مە بوویە (24) دەمژمێری مە خۆ فێركر كو گەلەك نە مەزێخین، ئانكو هەكە ئەم ل ژۆرەكێ نەبین پێدڤی ناكەت چو گلۆپان هەلكەین و پشتی بۆرینا (40) رۆژان بۆمە پسۆلا كارەبێ هات كو ئەو ژی (26) هزار دیناربوون و ئەم درازی نە، چونكو بەری نوكە گەلەك هەیڤان مە دو جاران هند پارە بەس ددانە خودانێ موەلیدێ و هەكە هوسا بیت و گرانتر لێ نەكەن ئەم دڕازی نە.
عەلی یوسف، دوكاندارەكێ وی تاخی یە دبێژیت: كارەبا من (108) هزار هاتن و من پێ خۆش بوو، چونكو دوكانێن مە بازراگانی نە و گەلەك هەیڤان پارێ مە ددا كارەبا گشتی و یا موەلیدێ دگەهشتە (180) هزار دیناران و هەكە بڤی رەنگی بیت مە چو گازندە نابن.
عەمەر نوری، وەلاتیەكێ هەمان تاخی یە، دبێژیت: كارەبا من (110) هزار دینارێن هاتین و بۆ من گەلەكن، چنكو ئەز خودان مووچەیەكێ كێمم و بڤی رەنگی حكومەتێ بارێ مە گرانگر، لەورا دخوازم پێداچوونەك د بهایێ وێ دا بهێتە كرن و بۆمە ئەرزانتر لێ بكەن، چونكو حكومەت بابێ خەلكی یە و پێدڤیە د هەر بۆارەكی دا هاریكاریا وان بكەت دا بارێ وان سڤك بیت.
ناجی سعدی، ژی گۆت: ئەم ب ڤی پرۆژەی د دلخۆشین، چونكو ژ دەنگ و دووكێلا موەلیدەیان رزگاربووین، لێ بهایێ وێ گەلەكێ گرانە و بۆ من (142) هزار دینار یێن هاتین و گەلەكن، چنكو هەكە هوسا بیت ئەم وەسا دێ هەست پێ كەین كو دخانیێ خۆڤە كرێداین.
لەزگین سەبری، بریكارێ خودانێ مولیدەیەكێ یە ل وی تاخی گۆت: رێڤەبەریا كارەبێ یێ گۆتیە هەتا شەش هەیڤێن دی موەلیدەیێن خوە نەڕاكەن و ئەم چو ژ چارەنڤیسێ خوە نوزانیین، لێ مە پێشنیاز كربوو ل هەیڤا ئێكێ حكومەت (18) دەمژمێران كارەبێ بدەتە خەلكی و ئەم ژی (6) دەمژمێران و هەیڤا بهێت حكومەت (20) دەمژمێران و موەلیدە (4) دەمژمێران و بڤی رەنگی هێدی هێدی هەتا كارەبا هەموو هەرێما كوردستانێ هەموو پێكڤە دبوو (24) دەمژمێری.
