هندەك گەشتیارێن بیانی ژ بهایێن خوارنگەهان دلگرانن
سندس سالح سلێڤانەیی:
هندەك گەشتیارێن بیانی دەمێ ژ ناڤەراست یان هەر پارێزگەهەكا عیراقێ بۆ گەشتوگوزارێ سەرەدانا هاڤینگەهـ و جهێن گەشتیاری ل سنۆرێ پارێزگەها دهۆكێ دكەن، گازندا ژ وێ چەندێ دكەن بهایێن خوارنان ل هندەك خوارنگەهان دگرانن، لەورا هندەك ژ وان بۆ خوە خوارن و ڤەخوارنان ل گەل خوە دئینن و خودانێ خوارنگەهەكێ ژی ل هاڤینگەها سیلاڤێ دبێژیت: مە بهایێن خوارنێن خوە یێن هەلاویستین و هەر كەسەكێ دهێت و ژ هەر پارێزگەهەكێ بیت دشێت بزانیت كا بهایێ هەر خوارنەكێ چەندە.
حسێن سەعدی، گەشتیارەكێ عەرەبێ خەلكێ پارێزگەها مووسلە گۆت: هەر جارەكا ئەز و خێزانا خوە بهێنە جهێن گەشتیاری یێن دهۆكێ، ئەم هندەك خوارن و ڤەخوارنان ل گەل خوە دئینین و ل ڤێرە خێزان بۆ مە بەرهەڤ دكەن، چونكو ئەم هەشت كەسین و هەر دەمێ بچینە خوارنگەهەكێ دڤێت گۆژمەكێ زۆڕێ پارەی بدەین و ئەڤە ژی بۆ مە بارگرانیە، چونكو هندەك جاران حەفتیەكێ دمیننە ل ڤێرە، راستە هندەك جاران ئەم دچینە خوارنگەهێ، لێ ئەم دبینین بهایێن خوارنان دگرانن، لەورا زوو ب زوو ناچینێ.
موهەنەد عادل، ئەو ژی گەشتیارەكێ عەرەبە ب خێزانڤە ژ پارێزگەها بەغدا هاتبوو گۆت: راستە ئەم هەموو دزانین ل جهێن گەشتیاری هەر تشتەك ب تایبەت ژی خوارن و ڤەخوارن ژ جهێن ئاسایی گرانترە، لێ ل ڤێرە ئەز نابێژم ل هەموو خوارنگەهان، بەلكو ل پتریا وان بهایێن خوارنان دگرانن و گەلەك جاران مرۆڤ دێ چیتە خوارنگەهەكێ و دەمێ پارەیەكێ زۆر ژ مرۆڤی دهێتە وەرگرتن چو پێ نەڤێت دێ توبە كەت و جارەكا دی ناچیتە وێ خوارنگەهێ و ئەڤ چەندە ب سەرێ من ب خوە هاتیە، لێ خوارنگەه و جهێن تەزیاتیان ژی هەنە بهایێن وان دگونجاینە.
عەبدولەتیف عەودا، گەشتیارەكێ دی یێ عەرەب بوو ژ پارێزگەها (واست) هاتبوو، وی ژی گۆت: ئەز ئێك ژ وان كەسانم یێن بۆ گەشتوگۆزارێ بەردەوام دچمە هاڤینگەهێن هەولێر و سلێمانیێ، هەروەسا دهێمە دهۆك ژی، لێ من نەڤێت دلێ وە بهێلم ل خوارنگەهێن هەوە هەموو جۆرێن خوارنێ دگرانن، بۆ نموونە جارەكێ من دو شیشكێن تكەی ل گەل كولایەكێ داخوازكرن هەژدە هزار دینار ژمن وەرگرتن.
ل دووماهیێ (كوستەم ئامێدی) خودانێ خوارنگەها (باپیر) كو دكەڤیتە سیلاڤا ئامێدیێ، د بەرسڤا وان گەشتیاران دا گۆت: ئەز ب خوە دەرچۆیێ پەیمانگەها گەشت و گۆزارێ مە، هەروەسا پتری (40) سالانە لڤێ خوارنگەهێ كاردكەم كو یا باب و باپیرێ بوو، ئەز ئەتەكێتێن جهێن گوزاری، ب تایبەت ژی خوارنگەهان باش دزانم و من (مینۆ) ئانكو تابلۆیێ هەلاویستنا ناڤ و بهایێ هەر جۆرە خوارنەكێ بەرچاڤكرینە و هەر كەسەكێ بهێت ژ دهۆك بیت هەتا (بەسرا) دشێت وی تابلۆی ببینت و ئەو ب خوە دێ بەرێ خوە دەتێ و بێژیت بۆ من فلان خوارنێ بینە، هەلبەت هەر خوارنەكێ ژی بهایێ وی ل بەرامبەر یێ نڤیسیە و گەشتیار بەری بخۆت دێ زانیت دەمێ ب دووماهی دهێت و دچیتە بەر مێزێ دێ چەند پارەی دەت، د سەر هندێ را هندەك جاران ب تایبەت ژی خێزان دەمێ دهێنە بەر مێزا پارە دانێ ئەم داشكاندنەكێ بۆ دكەین و هەكە هندەك خوارنگەه هەبن و تابلۆیێ بهایێن خوارنان نە هەلاویست بیت پێدڤیە رێڤەبەریا گەشت و گوزارێ وان ئاگەهدار بكەت كو ئەو ژی ب هەلاویسن دا دەمێ گەشتیار دهێن پێزانین ل سەر بهایێ هەر جۆرە خوارنەكێ هەبیت و ئەز هەردەم دبێژمە كارمەندێن خوارنگەهێ كەسێن دهێنە دەف مە بەری گەشتیاربن ئەو مێهڤانێن مەنە.