هندەك یاریزان خوە ژ لۆگۆیێ یانەیێ مەزنتر دبینن و كارگێڕیێ سەرەدەرییا دروست دگەل یاریزانان نەكرییە
قەیس وەیس:
بۆ یارییا چاڕێ ژ چارچووڤەیێ یاریێن پاشئێخستی تیما فوتبۆلا یانەیا دهۆك مفا ژ ئەنجامێن وێ نە وەرگرت، پشتی دگەل یانەیا دیالا ب دو گۆلان بەرانبەر گۆلەكێ تووشی خوسارەتیێ بووی، د یارییا واندا ئەوا ل ئێكشەمبییا بۆری ژ چارچووڤەیێ یارییا گەڕا 24ێ و پاشئێخستی ژ خولا ستێرێن ئیراقێ یا فوتبۆلێ ل یاریگەها ئەلمەدینە هاتییە ئەنجامدان.
ئەلهۆیێن چیای د بریندارن
د یارییا بەرانبەر یانەیا دیالا دا تیما دهۆكێ ئەو ئاستێ چاڤەڕێ كری نیشان نەدا و نەشیا ب سەرپەرشتییا ڕاهێنەرێ خوە یێ نوو ئەمیر ئەزرەفشانی ڤەگەڕێتە سەركەفتنان پشتی ب دو گۆلان بەرانبەر گۆلەكێ تووشی خوسارەتیێ بیت، هەرچەندە ستێرا دهۆكێ سیابەند عەگید شیابوو گۆلا وەكهەڤیێ د خولەكا 82ێ دا بینت، لێ بەری دووماهی هاتنا دەمێ دروست یێ یاریێ ب دو خولەكان یانەیا دیالا مفا ژ خەلەتییا هێلا بەرەڤانییا دهۆكێ بینت و گۆلا سەركەفتنێ بینن، د حەفت خولەكێن مایی دا یاریزانێن دهۆكێ مفا ژێ نە وەرگرت و یاری ب سەركەڤتنا یانەیا دیالا ب دووماهی هات و برینێن ئەلهۆییان كوورتر لێكرن.
ئەنجامێن لاواز بەردەوامن
هەرچەندە د هاتە پێشبینیكرن تیما دهۆكێ دێ د یاریێن پاشئێخستی دا شێت ئەنجامێن باش ئینیت و هێتە ڕێزبەندیەكا باش، لێ پشتی بۆرینا پێنچ ژ ئەوا یاریێن پاشئێخستی دا بتنێ چار خال كۆمكرینە ئەوژی بەرانبەر تەلەبە بوو ئەوا دناڤ ئەردێ خوە دا ب گۆلەكێ سەركەڤتن ئینایی، دووڤدا د سێ یاریێن بۆری دا بتنێ ئێك خال ب دەستڤە ئینایە، د دو یاریێن ئێكێ دا تووشی خوسارەتیێن گران بووی بەرانبەر یانەیێن جەوییە (4-چنە) و شورتە(3-1) دگەل نەفت میسان بێ گۆل وەكهەڤبوو.
ئەنجامێن خراب ڕێزبەندییا پێشیێ ژ دەستدا
دەرئەنجامێن ئەڤان یاریێن پاشئێخستی دا 11 خال ژ دەستداینە، ئەڤ خالە تێراهەبوون پێشڤە بچیتە ڕێزێن سێیێ و چارێ، لێ خرڤەكرنا وان ڕاوەستیایە و دنوكە ماینە 52 خال ل رێزا شەشێ دهێت ژ 15 سەركەڤتن، حەفت وەكهەڤی و 10 خوسارەتییان، ئەڤچەندە ژی دێ كارتیكرنێ ل سەر هیڤیێن ب دەستڤە ئینانا پلێتەكا دەرڤە، هەرچەندە دهێتە گۆتن یانەیا دهۆكێ نەشیاییە باددەكا ڕێپێدانێ ب دروستی پڕبكەت و ژلایێ فدراسیۆنا فوتبۆلا ئاسیایی هاتییە ڕەدكرن.
ئەمیر ئەزرەفشان بەرانبەر تاقیكرنا دویێ یە
ڕاهێنەرێ نوو یێ یانەیا دهۆك و كوڕێ رۆژهەلاتا كوردستانێ ئەمیر ئەزرەفشان و هاریكارێ وی پێشرەو عەزیز ئەوێن ژ یانەیا دالكۆرد هاتینە دهۆكێ بەرانبەر تاقیكرنەكا ب هێز یا دویێ یە، پشتی د یارییا بۆری بەرانبەر نەفت میسان تیم بڕێڤە برین، ل دووڤ داخویانییا ڕاهێنەری د پرێس كۆنفرانسێ رۆژنامەڤانیێ پشتی یاریێ دا، ئەو گەشبینە ئاستێ یاریێ باشتر بیت و ئەنجامێن سەركەڤتی ڤەگەرین.
ئەمیر ئەزرەفشان ئەوێ هاتییە جهێ ڕاهێنەرێ بەرێ مەسعۆد میرالی ئەوێ دەست كاركێشانا خوە پشتی یارییا دگەل تەلەبە ڕاگەهاندنی دەرئەنجامێ ب توندی ژی ژلایێ فدراسیۆنا فوتبۆلا ئیراقێ ڤە هاتییە سزادان بۆ دوورئێخستنا وی هەتا ب دووماهی هاتنا خولێ و 25 ملیۆن دیناران، ئەمیر ئەزرەفشان پێشتر ئەركێ ڕاهێنەراتییا یانەیێن دالكۆرد د خولا پلا ئێكا سویدی و ئۆستەرسۆند یا خولا نایابا هەمان وەلات كرییە، دیسان باوەرنامەیا پرۆ یا ئۆرۆپی و دو باوەرنامەیێن ماستەر د بۆرێن جودا وەرگرتینە، بەری نوكە دگەل یانەیا دالكۆرد ڕاهێنەرێ هەر ئێك ژ ڕێوان ئەمین، هارۆن ئەحمەد، پاشەنگ عەبدوللا و یێ لوبنانی عیماد لاواتی د خولا سویدا كرییە.
شرۆڤەكارەكێ وەرزشی بۆچوونا خوە دیار كر
د داخویانیەكێ دا سلێمان زەكی شرۆڤەكارێ وەرزشی ل پارێزگەها دهۆكێ و ئەندامێ لژنەیا دێرینێن فوتبۆلا دهۆكێ گۆت: مخابن ئەو ئاست و ئەنجامێ نوكە ئەم یێن تیما دهۆكێ د خولا ستێرێن ئیراقێ دا دبینن، جهێ پسیارێ و سەرسۆرمانێ یە د كۆپا كەنداڤی دا باشترین ئاست و ناسناڤی ب دەستڤە ئینا لێ پشتی كۆپایێ بەروڤاژی پرانییا یاریێن وێ خوسارەتی و وەكهەڤی نە، ب دیتنا من ئەگەرێ سەرەكی دبیت یاریزان هێشتا لبن گڤاشتنێن دەرۆنی بین تایبەت پشتی چوونا ڕاهێنەر مەسعۆد میرال دیسان هندەك یاریزان هەنە خوە ژ لۆگۆیێ یانەیێ مەزنتر دبینن ئەڤە ژی كارەساتە، هەروەسان كارگێرییا یانەیێ نەشیایە سەرەدەرییا درۆست دگەل یاریزانان بكەت، ئەڤە نە ئەو ئاستە یێ مە پێشتر د كۆپا كەنداڤی دا دیتی، دخوازین كارگێری دۆڤچوونەكا ڕژد ل سەر یاریزانان بكەن، هیڤییا مە ئەوە بۆ یاریێن بهێت ئەم تیما دهۆكێ باشتر و ب هێزتر ببینن.
دهۆكێ دو یاریێن پاشئێختی ماینە
ژ سەرجەمێ ئەوان حەفت یاریێن پاشئێخستی تیما دهۆكێ دو یاری ماینە لێ هێشتا ژڤان نە هاتییە دیاركرن، یارییا ئێكێ ئەوا ژ گەڕا 28ێ بەرانبەر یانەیا هەولێر بڕیارە ل یاریگەها شەهید فرانسۆ حەریری هێتە كرن، یارییا دویێ و دووماهیێ دێ بەرانبەر یانەیا مینا یا بەسرایی بیت دناڤ ئەرد و جەماوەرێ خوە دا ئەوا دێ ژ چارچووڤەیێ گەڕا 33ێ یا پاشئێخستی بیت.
یاریزانێن دهۆكێ35 گۆل تۆمار كرینە
تیما دهۆكێ خوانا دەهـ یاریزانێن پشكداری د تۆمار كرنا 35 گۆلان دا هەیە سەرجەمێ 36 گۆلان و بڤی ڕەنگی، پیتەر گۆرگیس هەشت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی و لۆكاس هێنریك و سیابەند عەگید، هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، زانا عەلی گۆلەك تۆماركرینە، ژلایەكێ دووڤە گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كەنگی دێ خول دەستپێ كەت؟
فدراسیۆنا فوتبۆلا ئیراقێ بڕیار دایە پشتی ب دووماهی هاتنا هەردو یاریێن هەلبژارتیێ ئیراقێ د ڤاڤارتنێن كێشوەرێ ئاسیا بۆ مۆندیالا جیهانی 2026ێ ئێكسەر دەست ب هەڤڕكیێن خولێ بهێتە كرن ئەوا ئەڤە نێزیكی دو حەفتیە هاتیە ڕاوەستاندن ژبۆ باشترین بەرهەڤیێن تیما ئیراقێ ب سەرپەرشتییا ڕاهێنەرێ خوە یێ نوو گێرهام ئارنۆلد، بڕیارە هەردو یاریێن خوە ل پێنچ شەمبییا بهێت مێڤاندارییا كوریا باشۆر بكەت، ل 10ێ ڤێ مەهێ ببیتە مێڤانا هەلبژارتیێ ئوردن د دو یاریێن چارەنڤیس دا.
