هندەک هه‌لبژارتیێن هه‌رێمان دخوازن مۆندیالا كۆنیفا بهێته پاشئێخستن
قەیس وەیس:
د دووماهی كۆمبوونا خوه یا ئۆنلاین یا گشتی دگه‌ل سه‌رۆكێ فیدراسیۆنا فوتبۆلا هه‌رێمێن جیهانێ كۆنیفا و نوونه‌رێن سه‌رجه‌م هه‌لبژارتیێن هه‌رێمان، رێڤه‌به‌رێ گشتی یێن وه‌رزشی سه‌ردار ئیسماعیل و تارق عه‌بدولره‌حمان گه‌نگه‌شه ل سه‌ر دووماهی پێشهاته‌یێن به‌رهه‌ڤیێن هه‌رێما كوردستانێ بۆ مۆندیالا كۆنیفا 2024ێ ئه‌وا بڕیاره ل 26ێ خزیرانا بهێت هه‌ڤڕكیێن وێ ب پشكدارییا 14 هه‌لبژارتییان ل پێنج یاریگه‌هێن هه‌رێمێ بهێنه ئه‌نجامدان، لێ چه‌ند هه‌لبژارتیێن پشكدار د مۆندیالێ دا دخوازن ژڤانێ قاره‌مانیێ بهێته دوورئێخستن ژبه‌ر ره‌وشا نوكه یا ده‌ڤه‌را رۆژهه‌لاتا ناڤین تایبه‌ت ئالۆزییا سیاسی و له‌شكه‌ری دناڤبه‌را وه‌لاتێ ئیرانێ و ئیسرائیلی دا گه‌ڤ ل سه‌ر رێكخستنا وێ كرینه.
د داخویانیه‌كێ دا ئازاد محه‌مه‌د ئه‌ندامێ فیدراسیۆنا فوتبۆلا كوردستانێ بۆ رۆژنامه‌یا ئه‌ڤرۆ گۆت: چه‌ند هه‌لبژارتیێن پشكدار داخواز كرییه قاره‌مانی بۆ ده‌مه‌كێ دی بهێته پاشئێخستن ژبه‌ر هه‌بوونا ره‌وشا ئالۆز یا ده‌ڤه‌را رۆژهه‌لاتا ناڤین تایبه‌ت دناڤبه‌را وه‌لاتێن ئیرانێ و ئیسرائیلی كو ئه‌ڤچه‌نده ترس ئێخسته ل سه‌ر شاندێن پشكدار، لێ مه هه‌می هه‌لبژارتی پشتراست كرینه كو هه‌رێما كوردستانێ هه‌رده‌م یا ئێمنه و چ مه‌ترسی ل سه‌ر نینه، لێ بڕیاره ل سێ شه‌مبییا بهێت كۆمبوونه‌كا دی بهێته كرن و دێ ژڤانێ قاره‌مانیێ ئێكلابیت.
بۆ زانین 14 هه‌لبژارتیێن هه‌رێمێن جیهانێ پشكدارن و هاتینه به‌لاڤكرن ل سه‌ر چار كۆمان و بڤی ره‌نگێ خوارێ، كۆما ئێكێ: كوردستان، كیرنۆ – بریتانیا، كاشمیر-پاكستان، تامیل ئیلام- سریلانكا، كۆما دویێ: په‌نجاب- هندستان، رایپا نویی- بۆلیڤیا، ئۆستیتا یا باشۆر- جورجیا و رۆسیا، كانتۆ تایكینۆ-سویسرا، كۆما سێیێ: كاربالتاجا-هنگاریا و ئۆكراینا، كابیلییا-جه‌زائیر، تبت-هندستان، ساۆپولۆ- به‌رازیل، كۆما چارێ: سیزكلێر سیزنا- ئیتالیا، ئه‌بخازیا- رۆسیا، باسچێت- رۆمانیا.، ماولی سۆر- چیكیا.