هه‌تا كه‌نگی دێ وه‌رزش بیته قوربانی كورسیان
د ڤی سه‌رده‌می دا ل وه‌لاتێن پێشكه‌فتی پۆستێن وه‌رزشی ب هه‌لبژارتن دهێتنه به‌لاڤكرن، ژ به‌ركو ئارمانجا ڤان هه‌لبژارتنان هاتنا كه‌سه‌كێ ژ هه‌ژی و خودان شیان و شاره‌زایه بۆ هه‌ر پۆسته‌كی ب ئارمانجا رێكخستن و پێشخستنا وه‌رزشێ و هه‌رده‌مێ ئه‌و كه‌س نه‌یێ گونجای بوو بۆ وی پۆستی دێ ده‌ست ژ كارێ خوه به‌رده‌ت، ب وێ هیڤیێ ئێكێ ژ وی باشتر بهێت خزمه‌تا وه‌رزشی بكه‌ت، به‌رۆڤاژی ل كوردستانێ و تایبه‌ت ل پارێزگه‌ها دهۆكێ ب بڕیار و بێ هه‌لبژارتن هنده‌ك كه‌س دێ هێنه دانان بۆ برێڤه‌برنا وه‌رزشێ كو دبیت وی ب ژیانا خوه ژی وه‌رزش نه كریه و نه كارێ وی یه.
ئه‌گه‌ر ئه‌م ته‌ماشه‌ی ره‌وشا خوه یا نوكه یا وه‌رزشا كوردستانێ بكه‌ین كا وه‌رزشا مه د چ قووناغا دا ده‌رباز دبیت یا دیار و ئاشكرایه و ئه‌و كه‌سێن ب شێوه‌كێ نه‌شه‌رعی و ب بریارا فلان به‌رپرسی پۆسته‌كێ وه‌رزشی وه‌رگرتی دێ بینین هه‌می جۆرێن شكه‌ستنێ د كارێ برێڤه‌به‌رنا وه‌رزشی دا ئیناینه و بۆ وی نه یا گرنگه وه‌رزش شكه‌ستنێ بیت یان نه تنێ و یا گرنگ ل ئه‌وه كورسیكێ به‌رنه‌ده‌ن كو كه‌سه‌كێ دی بهێت ڤێ وه‌رزشێ قورتال بكه‌ت و سیسته‌مه‌كی بۆ بدانیت و كاره‌كێ ژی وی باشتر بكه‌ت، ژبلی ڤێ چه‌ندا مه دیاركری ئه‌و ب خوه دوژمنێ هه‌ر كه‌سه‌كی یه بشێت كاره‌كێ باش بكه‌ت و د كه‌توارێ نوكه یێ كوردستانێ دا وه‌رزش ل سه‌ر چ بنه‌مایان نه‌مایه و به‌ر ب هه‌رفینێ دچیت.
من دڤێـت ل ڤێرێ نموونه‌كێ بۆ به‌رپرسێن وه‌رزشا كوردستانێ ب گشتی دیار بكه‌م و ل گه‌ل ره‌وشا كوردستانێ به‌راورد بكه‌م، سه‌رۆكێ ئێكه‌تیا ته‌پا پێ یا جۆرجیا (زڤیاد سیشنیڤا) ده‌ست ژ كارێ خوه به‌ردا پشتی د مێڤانداریكرنا یاریا دووماهیا كاسا سوپه‌را ئورۆپی دا ل ناڤبه‌را هه‌ردو یانێن به‌رشه‌لونه و ئه‌شبیلیا یێن ئسپانی ل وه‌لاتێ خوه سه‌ركه‌فتن ئینای و ب ده‌لیڤه زانی ڤێ ده‌ستكه‌فتێ بۆ خوه ب هێلیت و ناڤێ خوه د دیرۆكا وه‌رزشا وه‌لاتێ خوه دا تۆمار بكه‌ت، ل ده‌مه‌كی هێشتا دو سال ماوێ سه‌رۆكاتیا وی ماینه، ئه‌ڤجا ب ڤێ كریارێ بۆ خوه ناڤه‌ك د دیرۆكا وه‌رزشا وه‌لاتێ خوه و ئوروپا دا دروست كر.
هه‌كه ئه‌م ڤێ نموونا مه گۆتی ل گه‌ل به‌رپرسێن كوردستانێ به‌راورد بكه‌ین دێ گه‌له‌ك جوداهیێ بینین، ژبه‌ركو ڤی كه‌سی سه‌ركه‌فتن د كارێ خوه دا ئینا و د دووڤ دا ده‌ست ژ وی كاری به‌ردا بۆ كه‌سه‌كێ دی بهێت كاره‌كێ باشتر ژ وی بكه‌ت، لێ یێن وه‌رزشا كوردستانێ به‌رۆڤاژی وه‌كو نموونێن سه‌رۆكێ ئێكه‌تیا جۆرجیانه د هه‌مان ده‌م دا به‌رپرسێن وه‌رزشا كوردستانێ ب گشتی چ شكه‌ستن نه‌ماینه نه‌خارین و بنیات بۆ وه‌رزشی نه‌هێلا ل كوردستانێ و پشته‌ڤانیا وان ژی ناهێته كرن، لێ یێ به‌رهه‌ڤ نینه ده‌ست ژ وی پۆستی به‌رده‌ت و قه‌بوول ناكه‌ن ژی كه‌س ره‌خنێ ل شكه‌ستنێن وی بگریت و یێ به‌رهه‌ڤه وی ده‌زگایێ وه‌رزشا ئه‌و لێ كار دكه‌ت ده‌رگه‌هێ وی بگریت به‌س چ كه‌سێن دی نه‌هێنه جهێ وی و دێ كێماسیا خوه ب گازنده كرن ڤه‌شێریت.
باشه ئه‌رێ هین دێ كه‌نگی دانپێدانێ ب شكه‌ستنێن خوه درێڤه‌برنا وه‌رزشی دا كه‌ن و چنه مالێن خوه و ئه‌و ملیارێن هه‌وه ب ناڤێ وه‌رزشی و پێشخستنا وێ وه‌رگرتین د ئاقاره‌كێ تاری دا هه‌وه به‌رزه‌كرین و بێژن بلا به‌س بیت، یان هین كه‌سه‌كێ ژ خوه چێتر نابینن بهێت خزمه‌ت و وه‌رزشی راگریت.
