هه‌تا نوكه ئه‌ز بوویمه ئه‌ندامێ لژنا دادوه‌ری د پتری 10 فلمه فیسته‌ڤالێن نێڤده‌وله‌تی دا
زنار تۆڤی:
زه‌هاوی سنجاوی ده‌رهێنه‌ر و سیناریستێ كورد، د دیداره‌كێ دا بۆ رۆژناما ئه‌ڤرۆ دیار كر: هه‌تا نوكه د پتری 10 فلمه فیسته‌ڤالێن نێڤده‌وله‌تی دا، ئه‌ز د لژنا دادوه‌ریێ دابوویمه، هه‌روه‌سا هه‌ر ژ سالا 1999 ێ، ب ره‌نگه‌كێ به‌رده‌وام ئه‌ز پشكداریێ د فلمه فیسته‌ڤالێن جیهانی دا دكه‌م، ئه‌ڤه نێزیكی 30 سالانه ئه‌ز د وارێ فلمسازیێ دا، ئه‌ز ده‌رچوویێ پشكا سینه‌مایێ مه ل زانكۆیا مۆسكۆ، هه‌شت سالان من سینه‌ما خواندیه د بیاڤێن نڤێسینا سیناریۆیێ و ده‌رهێنانێ دا.
ناڤهاتی گۆت ژی: فیسته‌ڤالا نێڤده‌وله‌تی یا به‌لگه فلمێن بۆداپێست، كو ئه‌ڤ ساله گه‌را 11 ێ هاته گێران، ئه‌ڤ فیسته‌ڤاله ژ لایێ كۆمه‌كا سینه‌ماكاران ڤه هاتیه دامه‌زراندن، ئه‌و فیسته‌ڤاله شیایه جه‌ماوه‌ره‌كێ زۆر ل دۆر خۆ كۆمڤه‌كه‌ت، گه‌له‌ك ته‌كه‌زیێ ل سه‌ر زارۆیان و سنێله و زانكۆیان دكه‌ن، ده‌مێ ئه‌و فیسته‌ڤاله ده‌ستپێدكه‌ت، گه‌له‌ك زارۆك و سنێله و قوتابیێن زانكۆیێ و په‌یمانگه‌هان دهێن بۆ ته‌ماشه‌كرنا فلمان، ڤێ فیسته‌ڤالێ جه‌ماوه‌ره‌كێ زۆر ژ گه‌نج و لاوان هه‌یه، ئه‌ڤه گه‌له یا گرنگه، داكو ئه‌و زارۆك و سنێله به‌لگه فلمان ببینن، چونكی به‌لگه فلم به‌حسێ كێشێن جڤاكی و مرۆڤایه‌تی و تاكه كه‌سی دكه‌ن، هه‌روه‌سا دیتنه‌كا كویر و به‌ربه‌لاڤ ژی دده‌ته مرۆڤی و دیسان مرۆڤ باشتر ژی د كێشه‌یان دگه‌هیت، پشتی دیتنا وان فلمان ژی ب ره‌نگه‌كی، كو ب تنێ زانیاریان وه‌رناگریت، به‌لكو خۆ به‌رپرس دبینیت ژ وه‌رگرتنا هه‌لویستان به‌رامبه‌ری كێشه‌یان، ئه‌ڤه سێحرا سینه‌مایا به‌لگه فلمانه، كو ب ره‌نگه‌كێ باش ل گه‌له‌ك وه‌لاتان مفا ژێ دهێته وه‌رگرتن.
زه‌هاوی سنجاوی دبێژیت ژی: ل سالا 2023 ێ، ب به‌لگه فلمێ زارۆكێ عیماد، من پشكداری د فلمه فیسته‌ڤالا نێڤده‌وله‌تی یا به‌لگه فلمێن بۆداپێست دا كر، وی فلمی خه‌لاتێ ئێكێ وه‌رگرت، ئه‌ڤ ساله ل گه‌را 11 ێ یا ل هه‌مان فیسته‌ڤال، ئه‌ز بوومه ئه‌ندامێ لژنا دادوه‌ریێ ل وێ فیسته‌ڤالێ، د هه‌مان ده‌مدا چار جاران د ناڤا وێ فیسته‌ڤالێ به‌لگه فلمێ زارۆكێ عیماد چار جاران هاته نیشادان، هه‌روه‌سا نێزیكی ده‌مژمێره‌كێ مه دانوستاندن ل سه‌ر وی فلمی كر، هه‌موو بلێتێن چار جارێن نیشاندانێ هاتنه فرۆتن و خه‌لكێ پێشوازیه‌كا گه‌رم ل وی به‌لگه فلمی كر.
هێشتا دبێژیت: چیرۆكا زارۆكێ عیماد به‌حسێ كوره‌كێ پێنج سالی یێ كوردی ئێزكی ب ناڤێ عیماد دكه‌ت، كو دو سال و نیڤان ل گه‌ل مالباتا خۆ، ژ لایێ داعشێ ڤه هاتبوونه گرتن، پشتی ئازادبوونا وی ب ئه‌گه‌رێ كاریگه‌ریا هزر و په‌روه‌ردا داعشێ نه‌شێت ژیانه‌كا ئاسایی یا زارۆیان هه‌بیت و حه‌ز و مه‌یلا توندوتیژیێ به‌رامبه‌ر كه‌سوكار و ده‌وروبه‌ران هه‌یه، له‌وما بزاڤا په‌روه‌رده‌كرن و ئاساییكرنا ره‌وشا ده‌روونی یا عیمادی پرۆسه‌كا دژوار و درێژخایه‌ن بوویه، كو ژ لایێ داپیر و نۆشداره‌كێ ده‌رونناسڤه دهێته كرن، ئه‌ڤ به‌رهه‌مه 78 خوله‌كان یێ درێژه، ب هه‌ردو زمانێن كوردی و عه‌ره‌بی، ل 2016 ێ هه‌تا 2017 ێ، هاتیه وێنه‌كرن، بۆ ده‌مێ پتری ساله‌كێ ب به‌رده‌وامی ئه‌ڤ به‌لگه فلمه هاتیه وێنه‌كرن و پۆست پرۆده‌كشن بۆ ده‌مێ سێ سالان بوویه.
زه‌هاوی ئه‌و ژی ئاشكرا كر: لده‌ف من گه‌له‌ك یا گرنگ بوو، كو ئه‌ز بشێم ب رێیا زارۆیه‌كی به‌حسێ كاره‌ساتا شه‌ری و كاره‌ساتا كۆمكوژیا كوردێن ئێزدی بكه‌م، هه‌ر چه‌نده عیمادی بخۆ، گه‌له‌ك حه‌ز ژ ئاخفتنێ نه‌دكر و گه‌له‌ك نه د ئاخفت، له‌وما ئه‌ز 13 هه‌یڤان ل گه‌ل عیمادی بووم، رۆژانه مه وێنه دكر، بێی كو مه كاریگه‌ری ل سه‌ر وی هه‌بیت، هه‌روه‌سا ئه‌و كارێ مه كری گه‌له‌ك یێ ب زه‌حمه‌ت بوو، چونكی وی زارۆكی هه‌ست پێدكر، كو كامیرێ كاریگه‌ریه‌كا مه‌زن هه‌یه، دشێت ب رێیا كامیرێ پشكه‌ك ژ وێ توندوتیژیا ئه‌و فێربوویێ نیشا مه بده‌ت، ژ پێخه‌مه‌ت كاریگه‌ری هه‌بیت ل سه‌ر ده‌وروبه‌ران، مه بزاڤكر بێی كو پشكدار بین د چ پرۆسه‌كێ دا د ژیانا وی یا رۆژانه دا، مه ژیانا وی یا رۆژانه وێنه دكر، ب تنێ رۆژانه مه ته‌ماشه‌ی ژیانا وی دكر، مه دڤیا بزانین، كانێ داعشێ چ ب سه‌رێ وی ئینایه، هه‌روه‌سا ره‌فتارێن زارۆكی ره‌نگڤه‌دانا وان تشتانه یێن دیتین و گوهلێبووین و یێن ب سه‌رێ وی هاتین، ل گه‌ل هندێ ژی جڤاكێ كوردێن ئێزدی ل گه‌ل ئێك گه‌له‌ك د دلۆڤانن و هه‌ڤكار و دلسۆزن.
هێشتا دبێژیت: هه‌رده‌م من بزاڤكرینه، كو روودانێن دیرۆكی یێن گه‌لێ مه بكه‌مه هێڤێنێ چیرۆكێن وان فلمان یێن ئه‌ز چێدكه‌م، له‌وما هه‌تا نوكه من ده‌لیڤه نه‌بوویه، كو هنده‌ك فلمێن كۆمێدی و خۆش دروست بكه‌م، فلمێن من ره‌نگڤه‌دانا ژیانا سه‌خت یا گه‌لێ مه، وه‌كو ئه‌نفال و كێمیا بارانا هه‌له‌بجه و كۆچا ملیۆنی و دابه‌شكرنا كوردستانێ بووینه،
پرانیا فلمێن من چیرۆكه‌كا لۆكالی یا كوردی هه‌بوویه، ل گه‌ل هندێ شێوازێ دروستكرنا وان شێوازه‌كێ یۆنیڤێرساله، من بزاڤكرینه فلمێن من سه‌رنجا خه‌لكێ بیانی ژی رابكێشیت و بشێن ته‌ماشه بكه‌ن و من چه‌نده‌ك ژ دیرۆكا گه‌لێ كورد بۆ خه‌لكێ ڤه‌گێرایه، هه‌روه‌سا به‌لگه فلمێن سینه‌مایی ره‌وته‌كێ زۆر هه‌یه و كاردكه‌ت ل سه‌ر ناخێ مرۆڤان، به‌لێ ریپۆرتاژ ل سه‌ر روودانان دهێنه دروستكرن، به‌لگه فلم ل سه‌ر وان مرۆڤان دهێنه دروستكرن یێن كو د وان روودانان دورب ڤێكه‌فتین و بووینه قوربانی، شێوازێ كاریگه‌ریا روودانان پتر دبینین.
زه‌هاوی سنجاوی، ل هه‌ولێرێ ژ دایك بوویه، ل سالا 1975 ێ، ل گه‌ل مالباتا خۆ دچیته ئیرانێ، ل وی وه‌لاتی خواندنا خۆ ته‌مامكریه، پاشی چوویه رووسیا بۆ خواندنا سینه‌مایێ و هه‌شت سالان د بیاڤێ نڤێسینا سیناریۆیێ و ده‌رهێنانێ دا خواندیه، ئه‌ڤه 27 ساله وه‌كو ده‌رهێنه‌ر و به‌رهه‌مهێنه‌ر د بیاڤێ سینه‌مایێ دا كاردكه‌ت، خودانێ كۆمه‌كا كورته فلم و فلمێن درێژ یێن درامایی و به‌لگه‌یی یه.
