هه‌تا نوكه حوكمه‌تا ئیراقێ گازا سپێ ل سه‌ر ئاواران به‌لاڤ نه‌كریه
دهۆك، له‌زگین جوقی:
رێڤه‌به‌رێ كۆچ و كۆچبه‌رێن ئیراقێ ل دهۆكێ دیار كر، هه‌تا نوكه هێشتا پتر ژ 27 هزار ئاواران د ناڤ كه‌مپێن سنوورێ پارێزگه‌ها دهۆكێ دا ماینه و دبێژیت: ئه‌ڤ ساله هه‌تا نوكه حوكمه‌تا ئیراقێ گازا سپی ل سه‌ر ئاواران به‌لاڤ نه‌كریه.
ئه‌سكه‌نده‌ر محه‌مه‌د، رێڤه‌به‌رێ كۆچ و كۆچبه‌رێن ئیراقێ ل پارێزگه‌ها دهۆكێ بۆ رۆژناما ئه‌ڤرۆ خویا كر، هه‌رچه‌نده وه‌رزێ سه‌رمایێ ده‌ستپێكریه، لێ هه‌تا نوكه به‌غدا گازا سپی بۆ ئاواران دابین نه‌كریه و گۆت: “پێدڤیه سالێ دو جاران گازا سپی ژ لایێ حوكمه‌تا ئیراقێ ڤه بۆ ئاواران بهێته دابینكرن و هه‌ر جارێ 100 لیترێن گازا سپی بۆ هه‌ر خێزانه‌كا ئاواره، كو سالێ دبنه 200 لیتر بهێنه دان، لێ مخابن، ئه‌ڤ ساله هێشتا گازا سپی نه‌هاتیه به‌لاڤكرن”.
هه‌ر ل دۆر بابه‌تی مه‌حما خه‌لیل، ده‌ڤه‌ردارێ شنگالێ ئاشكرا كر كو حوكمه‌تا ئیراقێ هه‌ڤكاریا ئاواران ناكه‌ت و هه‌تا نوكه گاز بۆ ئاواران دابین نه‌كریه و گۆت: “ئه‌ڤه د ده‌مه‌كی دایه، كو حوكمه‌تا ئیراقێ هه‌موو جۆرێن هاریكاریان بۆ خێزانێن داعش ل كه‌مپا جدعه دابینكرینه، لێ هه‌تا نوكه وه‌كو پێدڤی هاریكاریا ئاوارێن شنگالێ ناكه‌ت، ئه‌ڤه زڤستان سار و دژوار بوویه و هێشتا به‌غدا گاز بۆ ئاواران دابین نه‌كریه، له‌و ئه‌م داخواز دكه‌ین پشته‌ڤانیا ئاواران بهێته كرن”.
دلگه‌ش سه‌لیم شه‌مۆ، به‌رپرسێ بنگه‌هێ لالش ل كۆمه‌لگه‌ها شاریا بۆ رۆژناما ئه‌ڤرۆ دیار كر، ب تنێ ل كۆمه‌لگه‌ها شاریا پتر ژ سێ هزار خێزانێن ئاواران ژ ده‌رڤه‌ی كه‌مپان دژین، ئه‌و خێزانێن ژ ده‌رڤه‌ی كه‌مپان دژین، ژلایێ حكومه‌تا ئیراقێ ڤه پشتگوه هاتینه هاڤیتن و چو هاریكاری بۆ وان ناهێنه دابینكرن، ب تنێ ئه‌و هاریكاریێن رێكخراوێن خێرخوازی دابین دكه‌ن، دگه‌هنه وان ئاواران، لێ ئه‌و ژی گه‌له‌ك دكێمن”.
