هه‌تا نوكه نێزیكێ 40 هاوولاتیێن ئامێدیێ بووینه قوربانی شه‌رێ په‌كه‌كێ و توركیا
ئامێدیێ، مه‌حمود نهێلی
ژ ئه‌گه‌رێ شه‌رێ دناڤبه‌را په‌كه‌كێ و له‌شكه‌رێ توركیا و توپبارانكرنا رۆژانه‌یا ده‌ڤه‌رێ، د ڤان چه‌ند سالێن بوری دا نێزیكێ 40 هاوولایێن سنورێ ناحیێن دێره‌لۆك و شێلادزێ شه‌هید و بریندار بووینه و دووماهی جار ژی شه‌هید بوونا هاوولاتیه‌كی دن یا ناحیا شێلادزێ بوویه ب ناڤێ حسێن حه‌یده‌ر كو ل شه‌ڤا چارشه‌میا ده‌رباز بووی 16/2/2022 بوویه ئارمانجا فرۆكێن له‌شكه‌رێ توركیا و شه‌هید بوویه و زێده‌باری هه‌ژماره‌كا زۆرا هاوولاتیان ژ بێ به‌هر بوون ژ چوونا وان بۆ سه‌ر گوندێن خوه و ئه‌ڤێ یه‌كێ كارتێكرن كریه سه‌ر ره‌وشا دەرون و ئابوریا وانا.
كه‌س و كارێن وی هاوولاتی ژی داخاز دكه‌ن ئه‌ڤ شه‌ره ب داوی بهێت و ئێدی به‌س خه‌لكێ وان ببیته قوربانی ململانیێن دناڤبه‌را په‌كه‌كێ و توركیا دا.
مه‌لا فایق ئێك ژ كه‌س و كارێن ڤێ هاوولاتیه دبێژیت: هیڤی دكه‌ین چاره‌سه‌ریه‌ك بۆ ڤی شه‌ری بهێته دیتن و ئه‌ڤ خه‌لكه به‌س ببنه قوربانی و گۆت: داخازا مه و داخازا هه‌موو خه‌لكێ ده‌ڤه‌رێ ئه‌وه ئه‌ڤ شه‌ره ل ده‌ڤه‌را مه نه‌مینت و ببنه سه‌ر جهێن خوه و ڤێرێ نه‌كه مه‌یدانا شه‌ر و ململانێ یێن خوه و ئه‌ڤ بتنێ زیانێ دگه‌هینته خه‌لكێ ده‌ڤه‌رێ. داخازێ ژ حكومه‌تا هه‌رێمێ ژی دكه‌ین چاره‌سه‌ریه‌كی بۆ ببینت و خه‌لكێ مه ژی بشێن ب ئازادانه بچنه سه‌ر جهـ و وارێن خوه.
هاولاتیه‌كی دی یێ ده‌ڤه‌رێ دیار كر، ژ ئه‌گه‌رێ هه‌بوونا چه‌كدارێن په‌كه‌كێ به‌رده‌وام ئه‌ڤ ده‌ڤه‌ره دهێته توپ باران كرن و سالانه خه‌لكێ مه دبیته قوربانی و ئه‌ڤ هاوولاتیێ نوكه ژی شه‌هید بووی ئێك بوویه ژ وان قوربانیان و گۆت: حسێن حه‌یده‌ر سیته‌ی ئاكنجیێ كومه‌لگه‌ها سیریێ یێ سه‌ر ب ناحیا شێلادزێ بوویه و ته‌مه‌نێ وی 52 سال بووینه و بابێ 10 زارۆیان بوو، ژ بۆ دابینكرنا پاریێ ژین و ژیارا خوه قه‌ستا گوندێ خوه ل سیته كربوو، لێ ب مخابنی ڤه بو ئارمانجا فرۆكه‌یێن توركیا و شه‌هید بوو.
رزگار عوبه‌ید رێڤه‌به‌رێ ناحیا شێلادزێ بۆ رۆژناما ئه‌ڤرۆ دیار كر، ل سنورێ ناحیا وان پتر ژ هه‌شتێ گوندان دبن بوردوما فرۆكێن توركیا دانه و رۆژانه ئه‌ڤ ده‌ڤه‌ر دهێنه توپ باران كرن و گۆت: ل سنورێ هه‌ردو ناحیێن دێره‌لۆك و شێلادزێ د ڤان دو سێ سالێن ده‌رباز بوویی دا نێزیكێ 40 هاوولاتی شه‌هید و بریندار بووینه و گۆت: شه‌هید بوونا ڤی هاوولاتی ژی ئێك بوویه ژ قوربانیێن ڤێ بوردومانێ و شه‌ر و ئالوزیێن دناڤبه‌را له‌شكه‌رێ توركیا و چه‌كدارێ په‌كه‌كێ و ته‌كه‌ز كر، كو گه‌له‌ك جاران وان خه‌لكێ ده‌ڤه‌رێ ژی ئاگه‌هدار كرینه كو قه‌ستا وان جهان نه‌كه‌ن یێن دبنه ئارمانجا فرۆكان و بوردومانێ و هیڤی ژی خواستن كو لایه‌نێن پشكدار دڤی شه‌ری دا شه‌رۆ و ئالوزیێن خوه ببنه مه‌یدانا خوه و ده‌ڤه‌را مه نه‌كه‌نه مه‌یدانا شه‌ری و ئێدی به‌س هاوولاتی ببنه قوربانی ڤان ئالوزیان.
پشتی تێكچوونا پروسه‌یا ئاشتێ دناڤبه‌را له‌شكه‌رێ توركیا و چه‌كدارێن په‌كه‌كێ ل ده‌ڤه‌رێ ل سالا 2015 تا نوكه به‌رده‌وام گونده‌وارێن سنوری یێن ده‌ڤه‌را ئامێدیێ دهێنه توپ باران كرن و تا نوكه پتر ژ 200 گوندان ب چولماینه و نه‌هاتینه ئاڤا كرن و هند گوند ژی پشتی شه‌ر و ئالوزیێن ده‌ڤه‌رێ هاتینه چولكرن و نێزیكی 40 هاوولاتیان ژی بووینه قوربانی، ئه‌ڤێ یه‌كێ ژی كارتێكرن ل سه‌ر ژیارا هاوولاتیان ژلایێ ئابوری و ده‌رونی ڤه و داخاز دكه‌ن جاره‌كا دی پرۆسه‌یا ئاشتیێ ل توركیا دروست ببیته ڤه و ئه‌ڤ شه‌ره ل ده‌ڤه‌را وانا نه‌مینیت و ئه‌و ب ئازادانه بچنه سه‌ر گوندێن خوه و ده‌ست ب چاندنێ و ئینانا ده‌رامه‌تی بكه‌ن ژ به‌ر كو سالانه داهاتی ڤان گوندان گه‌له‌ك زۆرن و هه‌موو گه‌نجینه نه بۆ خه‌لكێ ده‌ڤه‌رێ و دشێن مفایه‌كی باش ژ چوونا سه‌ر گوندان وه‌رگرن و هاوولاتی ژی به‌س ببنه قوربانی.
