هه‌رمان سالح: سه‌رباری ئارمانجا مه به‌رهه‌ڤكرنه لێ بۆ هه‌ڤڕكیێ ژی رژدین
ئه‌ڤرۆ،
تیما ته‌پا پێی یا یانا دهۆك ب ئارمانجا پووته‌دان ب یاریزانێ گه‌نچ و دروستكرنا تیمه‌كا بهێز ده‌ست ب به‌رهه‌ڤیێن خوه كر ژبۆ وه‌رزێ نوو یێ خولا پلا نایابا كوردستانێ ئه‌وا چاڤه‌ڕێ یه هه‌ڤڕكیێن وێ ل ناڤه‌راستا چریا ئێكێ یا بهێت ب شێوێ خول دو قۆناغ بهێته كرن.
هه‌رمان سالح راهێنه‌رێ تیما ته‌پا پێی یا یانا دهۆكێ بۆ رۆژناما ئه‌ڤرۆ گوت: وه‌رزێ ئه‌ڤ ساله یێ به‌رهه‌ڤیێن تیما دهۆكێ دێ جودا بیت و ئارمانجێن جێواز هه‌بیت ژبه‌ركو كارگێریا یانێ د وه‌رزێ ئه‌ڤ ساله دا زێده‌تر دێ گرنگیێ ب دروستكرنا تیمه‌كا ب هێز بیت و پووته‌دان ب یاریزانێن گه‌نج بیت به‌روڤاژی هه‌ڤڕكیی بۆ ناسناڤی لێ ئه‌ڤه وێ چه‌ندێ نا گه‌هینیت كو دێ تیمه‌كا پشكداربین و مانا خوه پارێزین به‌لكو دێ بۆ هه‌ر یاریه‌كێ ئارمانجا سه‌ركه‌فتنێ كه‌ین و تیما خوه ژ چو یانێن دی كێمتر نا دانین.
هه‌روه‌سا ناڤهاتی دیاركر كو ئه‌ڤرۆ هه‌تا سوبه‌هی دێ نێزیكی هه‌شت یاریزانێن گه‌نج و ژێی لاوان دا پشكداری راهێنانێن تیمێ بن و هه‌كه یاریزانێن خودان شیان و باش هه‌بن سه‌ر ئاستێ پارێزگه‌هێ ژی كو مفایی ژ شیاێن ئه‌وان وه‌ربگرین و د تاقیكرنێن خوه دا ئاستێ وان یێ پێدڤی بیت و گوت: یا گرنگ به‌رهه‌ڤكرنا تیمه‌كا ژ كورێن پارێزگه‌هێ یه نه‌ك هه‌ڤڕكیا ناسناڤێ خولا پلا نایاب لێ ده‌ستان ژ هه‌ڤڕكیێ به‌ر ناده‌ین و دێ بۆ هه‌ر یاریه‌كێ پلانێن سه‌ركه‌فتنێ هه‌بن سه‌رباری ئه‌ركێ مه ب سانه‌هی نابیت هه‌مبه‌ری یانێن دی یێن هه‌رێمێ، هه‌رچه‌وابیت ئه‌م رژدین باشترین شێوه پشكداربن هه‌روه‌سا ب پشته‌ڤانیا كارگێریێ ژبۆ دابینكرنا هه‌ر كێماتیه‌كێ و خالێن سه‌ركه‌فتنێ گه‌شبینم دێ پشكداریه‌كا سه‌رفه‌رازبیت.
بۆ زانین كارگێریا یانێ ل حه‌فتیا بوری گرێبه‌ست ل گه‌ل 13 یاریزانان ئیمزاكربوو ئه‌وژی عامر فازل، سه‌یف حه‌مۆ، محه‌مه‌د ره‌شید، ره‌یان عه‌بدولقادر، سیهاد یاسین، زانا جوزه‌ل، سابر عه‌بدولكه‌ریم، سه‌ردار عارف، عه‌بدولكه‌ریم ئیسماعیل، بێوار فه‌ریق و ئه‌حمه‌د شه‌رفانی، دهێته چاڤه‌ڕێكرن ئه‌ڤرۆ ژی ل گه‌ل هنده‌ك یاریزانێن دی و چه‌ند یاریزانێن لاوێن دهۆكێ ئیمزابكه‌ن.
