هه‌رێما كوردستانێ پێگه‌ها خوه یا هه‌رێمایه‌تی و جیهانی هه‌یه
ئحسان ئامێدی
هێزا هه‌رده‌وله‌ته‌كێ و هه‌رێمه‌كێ و كیانه‌كێ سیاسی هه‌بوونا توخمێن هێزێ یێن وێ هه‌بوونێ نه، ئه‌ڤرۆ هه‌رێما كوردستانێ ئه‌و توخمێن هێزێ هه‌نه كو جهێ خوه كربیت و ببیته جهێ پیته‌دانا ئیراقی و هه‌رێمایه‌تی و جیهانی.
جاران ل كوردستانێ خه‌بات و شۆرش هه‌بوو، و چ لایه‌نێن ده‌ره‌كی پیته پێنه دكر، و ئه‌و بهانه هه‌بوو ئه‌گه‌ر كاودانێن بابه‌تی ل ئاستێ یێن ناڤخوه‌یی بن دا كێشه‌یا مه چیته پێش، لێ نوكه ناكۆكیێن ناڤخوه‌یی ل هه‌مبه‌رى پێشڤه‌چوونا دۆزا كورستانێ رێگرن!.
سه‌ر ڤێ چه‌ندێ را هه‌رێما كوردستانێ هند توخمێن هێزێ هه‌نه كو بشێت سه‌ر وان ناكوكیاندا بازده‌ت و هه‌بوونا خوه بسه‌پینیت و سه‌ره‌ده‌ریه‌كا ئه‌رینی دگه‌لدا بهێته‌كرن.
پشتی دابه‌شكرنا دویێ یا كوردستانێ دیده‌ك چێبوو هه‌تا ده‌وله‌ته‌ك ژ ڤان ده‌وله‌تێن پارچه‌كا كوردستانێ ل ژێر كونترۆلا وان دانێ ب مافێن كوردێن وه‌لاتێ خوه نه‌كه‌ت و پشته‌ڤانیا بزاڤا رزگارخوازا پارچه‌یێن دی یێن كوردستانێ نه‌كه‌ت كورد سه‌رناكه‌ڤن. نه‌مازه رژێمێن حوكمدار ل ڤان ده‌وله‌تان د شۆفینی و دكتاتۆری بوون و دژی ماف و هه‌بوونا كوردان بوون و د رێكه‌فتی بوون دژی هه‌ر بزاڤه‌ك و شۆرشه‌كا كوردی بن ل هه‌ر پارچه‌یه‌كێ و ڤێ سیاسه‌تێ وه‌كر كو بزاڤا رزگاریخوازا كوردستانێ ب ئارمانجێن خوه نه‌گه‌هیت.
لێ پشتی هۆكارێن ناڤخوه‌یی باشبووین، (به‌ره‌یێ كوردستانی د ناڤبه‌را هێزێن كوردستانێدا هاتیه پێكئینان، و خه‌لكێ كوردستانێ بێزاربووی ژ رژێما دكتاتۆری)، و كاودانێ بابه‌تی ژی هاریكاربووی، (سیاسه‌تێن رژێما دكتاتۆری بووینه مه‌ترسی ل سه‌ر ئاسایش و به‌رژه‌وه‌ندیێن نێڤده‌ولی و جڤاكێ نیڤده‌وله‌تی دژی رژێما دكتاتۆری راوه‌ستاین)، ئێدی ده‌رفه‌تا سه‌رهه‌لدانا جه‌ماوه‌ری هاته پێش و د ماوه‌كێ كێمدا كوردستانا ئیراقێ رزگاركر و هه‌رێما كوردستانێ دامه‌زراند و ده‌ستهه‌لاتێن یاسایی هاتنه پێكئینان و كارنامه‌یێن ئاسایشێ و سه‌قامگیریێ و ئاڤه‌دانیێ كار پێ هاته‌كرن و هه‌رێم شییا خوه ل سه‌ر پیێن خوه بگریت و جێگیر بیت و پێشڤوچوون بخوه‌ڤه دیت، ئێدی پیته دانا جیهانی ژ ره‌هه‌ندێ وێ یی مرۆڤایه‌تی بۆ ره‌هه‌ندێ سیاسی و ئاسایشێ و ئابۆری هاته گوهۆرین.
هه‌رێمێ توخمین هێزێ چێكرن و ئاڤاكرن و گه‌شه‌یی پێ كر.
هه‌رێم كو جوگرافیه‌كا گرنگا ده‌ڤه‌را رۆژهه‌لاتا ناڤینه و یا ب خودانه.
هه‌رێم ده‌ربرینه ژ ئیراده‌یا ملله‌تی و رێكخستنه‌كا سیاسیا پێشه‌نگا هه‌یى و سه‌ركردایه‌تیا ژیر و بسپۆر هه‌یه.
هه‌رێمێ هێزه‌كا باشا پێشمه‌رگه‌ی هه‌یه ژبۆ رزگاركرن و پاراستنا كوردستانێ، هه‌ڤسه‌نگه‌ره دگه‌ل هێزێن دیموكراتیخوازێن جیهانێ دژی تیرۆرێ.
هه‌رێمێ كو ئابۆره‌كێ باش هه‌یه و ژێده‌ره‌كێ گرنگێ سۆته‌مه‌نی و ووزه‌یا جیهانێ یه. هه‌رێم ده‌ڤه‌ره‌كا سه‌قامگیره و پێناڤی ئاسایشێ و سه‌قامگیریێ و به‌رژه‌وه‌ندیێن ئابۆری هه‌ڤدۆسته دگه‌ل هه‌میان.
هه‌رێم بوو جهێ پیته‌دانا جیهانی، و ده‌وله‌تێن هه‌رێمایه‌تی ژی كێشانه هه‌ڤقه‌بیلكرنێ و سه‌ره‌ده‌ریكرنێ و كاركرنێ بۆ به‌رژه‌وه‌ندیێن هه‌ڤپشك.
هه‌رێم شیا بزاڤا دبلوماسی و په‌یوه‌ندیێن نیڤده‌وله‌تی خورتكه‌ت و پێشڤه ببه‌ت و وه‌كر كو جیهان ب گرنگی سه‌ره‌ده‌ریێ دگه‌ل دا بكه‌ت.
ب ڤێ سیاسه‌تێ و كارناما گونجای سه‌روك و كاربده‌ستێن هه‌رێمێ بوونه جهێ رێزگرتنا سه‌روك و پاشایێن جیهانێ، و سه‌رۆكێ هه‌رێمێ ل كۆچكێن پاشایه‌تیێ و سه‌رۆكایه‌تیێ یێن ده‌وله‌تێن جیهانێ بهێنه پێشوازیكرن، د هه‌مان ده‌مدا سه‌رۆك و كاربده‌ستین جیهانی سه‌ره‌دانا هه‌رێمێ بكه‌ن.
دوهی سه‌رۆكێ ده‌وله‌تا مه‌زنا توركیا كو هه‌ڤپشكه دگه‌ل كوردستانێ سه‌ره‌دانا هه‌رێما كوردستانێ كر و كۆمبوونێ دگه‌ل سه‌رۆك و كاربده‌ستێن كوردستان ل ژێر ئالا كوردستانێ كرن. ئه‌ڤه وه‌رچه‌رخانه‌كه د ره‌وشا هه‌رێمێ دا و به‌لگه‌یێ هێز و پێشڤه‌چوونا هه‌رێمێ یه ل وی ئاستیه ئێدی ده‌وله‌تان ژی پێدڤی ب هه‌رێما كوردستانێ هه‌بیت.
ده‌وله‌تێن كو ب سالان ئینكارا هه‌بوونا كورد و كوردستانێ دكر، و دژی بزاڤێن سیاسیێن ملله‌تی دراوه‌ستان ئه‌ڤرۆ یێ سه‌ره‌ده‌ریه‌كا ئه‌رێنی دگه‌ل هه‌رێما كوردستانێ دكه‌ن.
دیاره دۆزا كوردستانێ بوویه راستیه‌كا ئاشكرا و خوه دسه‌پینیت كو سه‌ره‌ده‌ری ب ئه‌رینی دگه‌لدا بهێته‌كرن.
راستیه‌ك هه‌یه و دڤێت شانازیێ پێ بكه‌ین، ئه‌وژی هێزا كه‌ساتیا سه‌رۆك كاربده‌ستێن كوردستانێ یه كو ل وی ئاستینه كو ل ئاستێ ناڤخوه و ده‌رڤه رێزلێنانێ لێ بكه‌ن و ل ئاستێن هه‌رێن بلند پێشوازیێ لێبكه‌ن و دانوستاندن و كۆمبوونان دگه‌لدا بكه‌ن و رێكه‌فتنان دگه‌لدا بكه‌ن.
سه‌رۆك بارزانی و سه‌رۆكێ هه‌رێمێ و سه‌رۆكێ حوكمه‌تا هه‌رێم رێبوارێن رێبازا بارزانی نه، ئه‌ون یی جهێ خوه ل ئاستێ ناڤخوه و ده‌رڤه‌كری و ب رێكا وان هه‌رێما كوردستانێ یا جێگیر و سه‌قامگیره و دهێته پاراستن جهێ سه‌ربلندی و شانازیا ملله‌تی نه.
ب هیڤینه ل ده‌مێن بهێن ناڤمالیا كوردستانێ باشتر بهێته رێكخستن و گۆتاره‌كا هه‌ڤگرتی بهێته كارپێكرن دا باشتر سوودی ژ ڤی ده‌ستوداری ببینین و دۆزا كوردستانێ بچیته پێش و جێگیر بیت.
ل وێ باوه‌رێینه ب سیاسه‌تا حه‌كیمانه یا سه‌رۆك بارزانی و كاربده‌ستێن هه‌رێمێ ره‌وش به‌ر ب باشتره.
