هه‌ر خه‌بات و به‌رخودانه
ئحسان ئامێدی
دبێژن ماف دهێن ستاندن و ناهێن دان، و ستاندنا مافێن ملله‌تان ژی ب هێزێ و شه‌ری، و شۆره‌ش و خه‌باتێ، و ب گۆری قوربانیدانێ دهێته بده‌ستڤه‌ئینان، و ب درێژاهیا مێژوویا كوردستانێ ملله‌تێ كوردستانێ خه‌بات و به‌رخودان كریه ژبۆ ستاندنا مافێن خوه، لێ هه‌رده‌م ترازیا هێزێن له‌شكری و هه‌لویستێ نێڤده‌وله‌تی د به‌رژه‌وه‌ندیا داگیركه‌ران دابوویه و كاره‌ساتێن جه‌رگبر ب سه‌رێ كوردستانێ ئیناینه!.
ئه‌ڤرو مێژوو وه‌كو به‌رێ خوه دوباره دكه‌ته‌ڤه. جاره‌كا دی قركرنا كوردانه، ڤێ جارێ ل رۆژئاڤا كوردستانێ یه، مخابن، ئه‌وا ب سه‌رێ رۆژئاڤا دهێت ژ تاوانێن شه‌ری و كوشتنێ و دژی مرۆڤایه‌تیێ تاوانا جینۆسایدكرنا كوردانه و پاكسازیا نه‌ژادیه دژی كوردستانێ، ئه‌ڤ په‌لامارا هێزێن توركی ب ده‌ستیریا ئه‌مریكا و رۆسیا یه و هنده‌ك وه‌لاتێن دی یه و هه‌تا نوكه چ نیشانێن مایتێكرنه‌كا نێڤده‌وله‌تی نینن بۆ راگرتنا شه‌ری، ئه‌وا دهێته نیشادان ب ئه‌رێنی هه‌لویست و پێرابوونێن هنده‌ك ده‌وله‌تێن ئورۆپی نه یێن كو هنده‌ك گڤاشتنێن سیاسی و ئابووری دكه‌ن پیناڤی راگرتنا شه‌ری پێناڤی كۆنترۆلكرنا گرتیێن رێكخراوا داعش و مه‌ترسیا وان و رێگرتن ژ پێلێن كۆچبه‌ران بۆ ئۆروپا و كێمكرنا كاره‌ساتێن مرۆڤی و پاراستنا ئێكپارچه‌یی و سه‌روه‌ریا ده‌وله‌تا سووری ئه‌ره‌بی!، و نه ل دوور و نه ل نێزیك به‌حسێ ملله‌تێ كورد و مافێن ره‌وایێن وێ ناهێته‌كرن و رێز بۆ هه‌ڤپه‌یمانیا كوردستانی ل گه‌ل جڤاكێ نێڤده‌وله‌تی بۆ شه‌رێ دژی داعش و گۆری و قوربانیێن داین ناهێته‌گرتن!، هه‌روه‌كو پرسا مافێن كوردستانێ ل سه‌ر مێزێن چ ده‌وله‌تان نینه و دۆزا كوردستانێ نه‌بوویه ئه‌جنیدایێ جڤاكێ نێڤده‌وله‌تی!، و ب ڤێ دید و بۆچوونا جیهانی، دێ توركیا و داگیركه‌رێن دی یێن كوردستانێ پتر هاربن و درنده‌تر كه‌ڤنه گیانێ كوردستانێ!.
مخابن كوردستانی وه‌كو ملله‌ته‌كێ بنده‌ست گه‌له‌ك هیڤی ل سه‌ر ئه‌مریكا و رۆسیا و ده‌وله‌تێن ئورۆپی ئاڤاكربوون، پرانسیبێن وودرو ولسونێ ئه‌مریكی و یێن ڤلادیمیر لینینێ رۆسی و یاداشتناما نه‌ته‌وه‌یێن ئێكگرتی سه‌باره‌ت ب مافێن چاره‌نڤیسێ گه‌لان كو گه‌له‌ك هه‌لا بۆ كربوو، لێ بۆ كوردان چ دابین نه‌كر!. به‌روڤاژی سه‌رده‌مێ ڤان پرانسیبا كوردستانێ خوه دیت چار پاچه و گه‌لێ وێ یێ دهێت ژناڤبرن!، نها ژی پشتی چه‌ندین سالێن خه‌بات و قوربانیدان و هه‌ڤپه‌یمانیێ و شه‌رێن هه‌ڤپشك ژنوی سه‌رۆكێ مه‌زنترین ده‌وله‌ت بێ شه‌رمانه بێژیت مه پاره و چه‌ك ب كوردان داینه و شه‌رێ كوردا و توركان یێ هۆزه‌كیه به‌ری سه‌د سالانه و كوردان هاریكاریا مه نه‌كریه ل جه‌نگێ جیهانی و ل شه‌رێ نۆرماندی!. و سه‌رۆكێ زلهێزا دوێ ل جیهانێ بێژیت ئه‌م دێ ناڤبژیكرنێ كه‌ین د ناڤبه‌را كوردان و حوكمه‌تا سووریا بۆ پاراستنا سه‌روه‌ری و ئێكه‌تێا سووریا!، ئانكو هه‌رددووان به‌حسێ مافێن ره‌وایێن گه‌لێ كوردستانێ نه‌كرن و سه‌ره‌ده‌ریه‌كا چه‌تانه دگه‌ل كوردان كرن!.
خۆیایه كوردستان قوربانیێ دده‌ت ژبوونا ئازادیێ و نه‌بۆ پارا و چه‌كی و یا دیتر شه‌رێ كوردان و توركان سه‌را مافێن نه‌ته‌وه‌یێن كوردانه و نه شه‌رێ هۆزه‌كی یه و ئه‌ڤه پتر ژ سه‌د سالانه، و ل شه‌رێ جیهانی كورد دژی توركیا بوونه كو توركیا دژی ئه‌مریكا هه‌ڤپه‌یمانێن وێ بوویه، واته دگه‌ل ئه‌مریكا و هه‌ڤپه‌یمانان بوونه، و هه‌كه فه‌ره‌نسا و به‌ریتانیا هێلابا ل جه‌نگێ جیهانیێ ئێكێ كوردستان ببا ده‌وله‌ت دا روله‌كێ باشتر گێرن دژی توركیا و هه‌ڤپه‌یمانێن وێ و یا دیتر ل شه‌رێ جیهانی ئه‌مریكا د هه‌وارا هه‌ڤپه‌یمانێن خوه هات ئه‌گه‌ر ئه‌لمانیا فه‌ره‌نسا داگیركربوو و دا به‌ریتانیا ژی شكێنیت، ئه‌ڤجا نوكه به‌رپسیاریا ئه‌مریكا مه‌زنتره و ئه‌ركێ وێ یه پشته‌ڤانیا هه‌ڤپه‌یمانێن خوه و ملله‌تێن بنده‌ست بكه‌ت و بهێته هه‌وارا كوردستانێ، نه‌مازه كوردستانێ پێش ئه‌مریكا و جیهانێ ڤه شه‌ره‌كێ چاره‌نڤیسێ دژی رێكخراوا تیرۆرستیا جیهانی دكر و شكاند و قوربانیه‌كا مه‌زن دا، ئه‌گه‌ر دا به‌ر ب ئورۆپا و ئه‌مریكا به‌رفره‌ه بیت.
خه‌باتا رزگاریخاز و شۆره‌ش و سه‌رهلدانێن كوردستانێ پێدڤیێن سه‌رده‌مێ خوه بوونه پێناڤی مافێن ره‌وایێن كوردستانێ ژبوونا سه‌رخوه‌بوونا كوردستانێ، نه‌بۆ دابه‌شكرنا چ ده‌وله‌تان، ئه‌ڤ خه‌باته پێدڤیا قووناخێ بۆ و ل دووڤ خواستا ملله‌تی بوونه و هه‌رده‌م ئه‌و باوه‌ری هه‌بوویه دڤێت خوه بهێزبێخین و هه‌ڤگرتنێ پێكبینین و خه‌باتێ بكه‌ین دا بشێین مافێن خوه بده‌ستڤه بینین، ئه‌ڤه وێ ناگه‌هینیت كو خه‌باتا ملله‌تی پێدڤی ب هاریكاریا ده‌ره‌كی نینه هه‌روه‌كو هه‌می بزاڤێن ئازادخواز و ده‌وله‌ت ژی د ته‌نگاڤیان دا پێدڤی ب هاریكاری و پشته‌ڤانیا ده‌ره‌كی بوونه، ئه‌ڤجا بۆ كوردستانه‌كا داگیركری و پارچه‌پارچه‌كری هاریكاریا ده‌ركی پێدڤیه بۆ رزگاربوونێ، خه‌لكێ كوردستانێ سه‌ربازێن دووڤ داخوازێ نینن، و یاری نینن د ده‌ستێن ده‌وله‌تان دا، ئه‌و پێشمه‌رگه‌یێن كوردستانێ نه، خه‌باتكه‌رێن رزگاریێ نه، به‌رخودان و خوراگرن، هه‌ڤالینیێ و دۆستینیێ و هه‌ڤپه‌یمانیێ دكه‌ن ل سه‌ر بنه‌مایێن سود و قازانج و به‌رژه‌وه‌ندیا ملله‌تی، ب باوه‌ریا هۆكارێن ده‌ره‌كی هاریكاره بۆ گه‌هشتنا هۆكارێ ناڤخوه‌یی بۆ بجهئینانا ئارمانجان.
كوردستان وه‌لاته‌كێ زیندیه و خه‌لكێ وێ هشیاره و دێ به‌رده‌وام بیت ل سه‌ر بزاڤ و خه‌بات و به‌رخودانا خوه هه‌تا گه‌هشتن ب مافێن خوه یێن ره‌وا و مێژویا سیاسیا ده‌ڤه‌رێ خۆیا كریه كو كوردستانێ چو جاران ته‌ماعیا به‌رفره‌هبوونێ نه‌بوویه، تنێ سه‌ربه‌خوه‌یا وه‌لاتێ خوه ڤیایه، نه وه‌كو ملله‌تێن دی یێن ده‌وروبه‌ر كو سیاسه‌تا فراوانخوازیێ هه‌بویه و هه‌یه، بلا هه‌می داگیركه‌ر بزانن تا كوردستان ب مافێن خوه شاد نه‌بیت چ ئاسایش و سه‌قامگیری ل ڤان وه‌لاتان دا جێگیر نابیت و هه‌می به‌رژه‌وه‌ندیێن وان دێ ل ژێر گه‌ف و هه‌ره‌شێ بن و هه‌می لایه‌ن دێ زیانڤێكه‌تی بن. ئێدی بلا شه‌ر و كوشتن و ژناڤبرن و جینۆسایدكرن و پاكیا نه‌ژادی به‌س بیت، ژوێ سیاسه‌تێ ده‌وله‌ت و ملله‌ت زیانمه‌ندن، بلا پێكڤه‌ژیان و وه‌كهه‌ڤی و رێزگرتن ل مافێن مرۆڤی و پێكهاتێن جڤاكی و چاره‌نڤیسێ گه‌لان هه‌بیت دا ئاسایش و سه‌قامگیری هه‌بیت و هه‌می لایه‌ن سودمه‌ندبن و گه‌شه‌یێ بكه‌ن..و هه‌تا گه‌هشتن ب وان ئارمانجان هه‌ر خه‌بات و به‌رخودانه.
