هه‌ر كه‌ڤاله‌كی په‌یام و رامانا خوه یا تایبه‌ت هه‌یه
هه‌ولێر، بێوارحسێن زێباری:
شێوه‌كارا گه‌نج (ئاسیا غه‌فار) د دیداره‌كێ دا بۆ رۆژناما ئه‌ڤرۆ دیاركر كو دژیه‌كێ بچووكدا حه‌زا هونه‌ری ب تایبه‌ت ژی شێوه‌كاری ل ده‌ف وێ په‌یدابوو، له‌ورا دژیێ هه‌ڤده سالیێ دا ده‌ست ب چێكرنا كه‌ڤالان كر و هیڤیا وێ ئه‌وه ل پاشه‌رۆژێ ببیته شێوه‌كاره‌كا به‌رنیاس.
ئاسیایێ گۆت: هه‌ر ل ده‌ستپێكێ دایكا من گه‌له‌ك پشته‌ڤانیا من دكر و كه‌رستێن پێدڤی بۆ چێكرنا كه‌ڤالان بۆ من دكڕین، له‌ورا ئه‌ز هه‌رده‌م خوه ب قه‌ردارا وێ دزانم، چنكو هه‌كه ئه‌و نه‌با ره‌نگه ئه‌ز ژی یا به‌رده‌وام نه‌بام، دووڤدا هه‌ر دمالێ خوشكا منا مه‌زن و ل قوتابخانێ ژی ماموستا من (دلڤین شیمال) پشته‌ڤانێن منن، له‌ورا ب هاریكاریا وان من پشكداری د چه‌ند پێشانگه‌ه و فیسته‌ڤالێن هونه‌ری دا كریه و چه‌ندین خه‌لات وه‌رگرتینه، هه‌روه‌سا كه‌ڤالێن خوه ژی هنده‌ك ب دیاری و هنده‌ك ژی ب پاره داینه خه‌لكه‌كی، بۆ زانین ئه‌ز گه‌له‌ك داخباری دو كه‌ڤالانم، یێ ئێكێ ل دۆر هه‌له‌بجه یه، كه‌ڤالێ دوێ ژی یێ سێداره‌دانا پێشه‌وا (قازی محه‌مه‌د) و هه‌رده‌م ئه‌ز دبێژم هه‌ر كه‌ڤاله‌كی په‌یام و رامانا خوه یا تایبه‌ت هه‌یه.
