هه‌ر كیلۆیه‌كا سیسى یان به‌رامبه‌رى چەندین كیلۆیێن كه‌نگرانه
ئەڤرۆ نیۆز،زنار تۆڤى:
كه‌نگر گیایه‌كێ بهارى یێ خۆشه بۆ خوارنێ و هه‌ر ل ده‌ستپێكا چێبوونا ڤى گیاى خه‌لك قه‌ست دكه‌نه چیا و دول و نهالان بۆ ئینانا ڤى گیاى،خه‌لك كه‌نگرا دقه‌لینن و هه‌روه‌سا دكه‌نه دناڤ ماستى دا و دخۆن و گه‌له‌ك ره‌واجا ل سه‌ر هه‌ى،هه‌ر چه‌نده ل ده‌مێ بهارێ كیلۆیا كه‌نگرا گه‌له‌ك ب بوها ناچیت و هه‌ر كیلۆیه‌ك دناڤبه‌را(2_3) هزاران دهێته فروتن،له‌ورا خه‌لك ناهێلن كه‌نگر ب گه‌هن و ببنه سیسى،هه‌ر چه‌نده ئێك كیلۆیا سیسى یان هه‌مبه‌رى چه‌ندین كیلۆیێن كه‌نگرانه.
ژنه‌ك بناڤێ ره‌حیما حسێن بۆ ئه‌ڤرۆ نیۆز دبێژیت:هه‌ر ل ده‌مێ چێبوونا كه‌نگران ئه‌م كۆمه‌كا ژنان پێكڤه دچینه چیاى بۆ ئینانا كه‌نگران،هه‌ر چه‌نده زۆر جاران ده‌ڤه‌را مه دهێته تۆپبارانكرن ژى و مه‌ترسى ژى ل سه‌ر ژیانا مه هه‌بوو،لێ هنده‌ك جاران ئه‌م هه‌ر د چووینێ،چونكى خوارنا كه‌نگران گه‌له‌كا خۆشه و یا ب مفایه ژى بۆ خوارنێ و خه‌لكێ مه ژى گه‌له‌ك حه‌ز ژ خوارنا وان دكه‌ن و هه‌روه‌سا ئه‌م دئینین بۆ فروتنێ ژى و دیاركر ژى:ئه‌ڤ ساله كه‌نگر ب رێژه‌یه‌كا باش ل ده‌ڤه‌را مه هه‌بوون،لێ پتریا وان خه‌لكێ كرینه و نه‌هێلان ب گه‌هن و ببنه سیسى،له‌ورا هه‌كه ب گه‌هن و ببنه سیسى خه‌لك دێ پتر مفاى ژێ بینیت،چونكى هه‌ر كیلۆیه‌كا سیسى یان پترى 20 هزار دیناران دهێته فروتن،ڤێ چه‌ندێ ژى دێ مفایه‌كێ باش بۆ مه هه‌بیت و دێ داهاته‌كێ باش ژى بۆ مه ژێ هێت،لێ مخابن خه‌لكێ مه ژ بنى د ئیننه ده‌ر و ناهێلن بگه‌هن.
سه‌عدى محه‌مه‌د وه‌لاتیه‌كێ دییه دبێژیت:گه‌له‌ك یا ب زه‌حمه‌ته مرۆڤ بشێت به‌رێ خه‌لكێ ژ چیاى ب ده‌ته پاش و نه‌هێلیت ب چنه چیاى بۆ ئینانا گیایێ بهارى و بتایبه‌تى كه‌نگرا،ژبه‌ركو خه‌لك ژ ده‌ڤه‌رێن دیتر دهێنه ده‌ڤه‌را مه بۆ كرنا كه‌نگران و مرۆڤ نه‌شێت زوو ب زوو رێگریێ ل خه‌لكێ بكه‌ت،چونكى هه‌كه كه‌نگر ب گه‌هن ده‌ه قاتى مفایێ وان پتره،هه‌روه‌سا هه‌ركیلۆیه‌كا سیسى یان نوكه د بازارى دا ب بوهایێ 20 هزار دیناران جاران پتر ژى دهێته فروتن و هه‌روه‌سا ل ده‌ڤه‌را به‌روارى بالا رێژه‌یه‌كا باش یا كه‌نگران هه‌نه،لێ خه‌لك ناهێلن ببنه سیسى و هه‌ر ل وه‌رزێ بهارى دكه‌ن و گۆت ژى:ئه‌م دخوازین ژ سال پێڤه خه‌لكێ مه ڤێ چه‌ندێ ل به‌رچاڤ وه‌ربگریت و كه‌نگرا ل بهارێ نه‌كه‌ن،داكو ب گه‌هن و ببنه سیسى و ب ڤێ رێكێ ئه‌م دێ شێین مفایه‌كێ باش ژێ بینین و دێ بۆ خه‌لكێ مه ژى داهاته‌كێ باش ژێ هێت،لێ دڤێ قه‌یرانێ دا مرۆڤ نه‌شێت به‌رێ خه‌لكێ ژ كرنا كه‌نگران وه‌رگێریت.
