هه‌ر ماله‌ك و دوكانه‌ك دێ دو بەرمیلێن گلێشی داننه به‌ر ده‌رگه‌هێ خوه
سندس سالح سلێڤانه‌یی:
رێڤه‌به‌رێ كارگه‌ها ڤاڤارتنا گلێشی ل كواشێ دیاركر، د پلانا واندایه ل پاشه‌رۆژێ هه‌ر ماله‌ك و دوكانه‌كێ دو ته‌نكێن گلێشی ل به‌ر ده‌رگه‌هی هه‌بن، ئێك بۆ گلێشێ ته‌ڕ یێ دی ژی بۆ یێ هشك و ئه‌ڤ چه‌نده دێ گه‌له‌ك ئاسانكاریان بۆ مه د كاری دا په‌یدا كه‌ت و دوكانداره‌ك ژی دبێژیت: ئه‌ڤ چه‌نده بۆ مه دوكانداران هه‌تا راده‌یه‌كی دێ یا ب زه‌حمه‌ت بیت. ژنه‌كا دانعه‌مر ژی دبێژیت: دێ تشته‌كێ باش بیت و ئه‌م دحازرین بكه‌ینه دو ته‌نه‌كه.
حازم عه‌بدی، رێڤه‌به‌رێ كارگه‌ها ڤاڤارتنا گلێشی ل كواشێ گۆت: مه پشكه‌كا نوو یا هه‌ی ب ناڤێ (كۆنفاست) و ئه‌ڤ پشكه دێ گه‌له‌ك هاریكاریا مه كه‌ت كو كارێ مه ل كارگه‌هێ ب ساناهتر لێ بهێت، چونكو هه‌كه گلێشێ ته‌ڕ و هشك ژێك هاتنه جوداكرن به‌ری بگه‌هیته كارگه‌هێ ل وی ده‌می دێ بۆ مه باشتر بیت، چنكو هه‌ر ئێك دێ چیته جهێ خوه و ئه‌م ژی دێ مفای ژێ بینین.
هه‌روه‌سا گۆت: بۆ ڤێ چه‌ندێ ئه‌م دێ پێدڤی ب خه‌لكی بین كو هه‌ر ئێك دو ته‌نه‌كێن گلێشی دانینته به‌ر ده‌رگه‌هێ خوه، هه‌تا دوكاندار و فه‌رمانگه‌ه و جهێن گشتی ژی و پێدڤیه ئه‌و ژێك ڤاڤێرن، ئانكو گلێشێ هشك بكه‌نه د ته‌نه‌كێ دا و یێ ته‌ڕ بكه‌نه د ته‌نه‌كه‌كا دی دا و ئه‌ڤ چه‌نده دێ ل پاشه‌رۆژێ ده‌ستپێكه‌ت و بۆ ڤێ چه‌ندێ به‌رهه‌ڤی دێ هێنه كرن و هه‌كه خه‌لكه‌ك ل گه‌ل مه یێ هاریكار بیت دێ پشكا كۆنفۆستێ ژی باشتر كارێ خوه كه‌ت و پتر دێ یا كارا بیت.
ئامینا حه‌سه‌ن، ژنه‌كا دانعه‌مره دبێژیت: ئه‌ز ل گه‌ل وێ بڕیارێ مه و دبه‌رهه‌ڤین بجه بینین، ئانكو دو ته‌نه‌كان دانین و گلێشێ ته‌ڕ و هشك ژێك جودا كه‌ین، بۆ هندێ دا ژینگه‌ها باژێرێ مه باشتر لێ بهێت، هه‌روه‌سا دا كارێ وێ كارگه‌هێ ژی ب ساناهیتر لێ بهێت و هیڤیا من ئه‌وه كارگه‌ها ڤاڤارتنا گلێشی بشێت مفای ژ گلێشێ ته‌ڕ و هشك وه‌ربگریت و وه‌كو گه‌له‌ك وه‌لاتان بۆ هنده‌ك كارێن دی بهێته بكارئینان و ئه‌م دێ پێگیریێ پێ كه‌ین.
عه‌زیز محه‌مه‌د، دوكانداره‌كه ل نیڤا بازاڕی دبێژیت: هه‌كه ئه‌ڤ بڕیاره بهێته بجهئینان ئه‌ز دبێژم بۆ مه دوكانداران دێ یا ب زه‌حمه‌ت بیت، چنكو جهێن مه دبه‌رته‌نگن و دانانا دو ته‌نه‌كا ژی دێ رویێ جاده‌یان كرێت كه‌ت، چنكو هه‌ر دوكانه‌كێ دو ته‌نه‌كه ل به‌ر ده‌رگه‌هی بن گه‌له‌كه.
