هه‌ر وه‌كو ئه‌ز حه‌ز ژ ته دكه‌م
شعر: مه‌حموود ده‌روێش
وه‌رگێران: عارف حیتۆ
بۆچی پێكۆلا ڤێ وه‌غه‌رێ دكه‌ین
ئوو چاڤێن ته، ئه‌ز یێ ژ ده‌ریایێ رووتكریم
خیز یێ د مه دا گڕگرتی بوویی… بۆچی هه‌ولدده‌ین؟
ئوو ئه‌و په‌یڤێن مه نه‌گۆتین مه ده‌ربه‌ده‌ر دكه‌ن.
هه‌می وه‌لات خۆدیكن و هه‌می خۆدیك به‌رن
بۆچی پێكۆلا ڤێ وه‌غه‌رێ دكه‌ین؟
ل ڤێره تو كوشتی و ل ڤێره.. ئه‌ز كوشتم.
ل ڤێره.. تو شاهدا چه‌می و داستانێ بووی
رووبار بێزار نابیت، نا ئاخڤیت، نا ئێشیت
هه‌ر رۆژ مه ته‌رمه‌ك و هه‌ر رۆژ وان نیشانه‌ك
ل ڤێره رووبار ل ناڤبه‌را مه راوه‌ستا
زێره‌ڤانه‌ك هه‌ردو به‌رلێڤان دكه‌ته جێمك
دوور، ژ مه، وه‌ك نێزیكیێ
نێزیك، ژ مه، وه‌كو دووریێ
فه‌ره زێره‌ڤانه‌ك هه‌بیت
ئاااه، یا پێدڤیه زێره‌ڤانه‌ك د ناڤبه‌را مه دا هه‌بیت.
هه‌ر وه‌كو ئاڤ، ئه‌وا په‌ڕاڤان ژێكڤه دكه‌ت
خوینا دو له‌شانه، ئوو ئه‌م ل ڤێره دو په‌ڕاڤ بووین
ئه‌م ل ڤێره دو جه‌سته بووین
هه‌می وه‌لات خۆدیكن و هه‌می خۆدیك به‌رن
بۆچی پێكۆلا ڤێ وه‌غه‌رێ دكه‌ین؟
هه‌ر وه‌كو چیا هه‌می، یێن به‌رزه بووین
ئوو هه‌ر وه‌كو ئه‌ز حه‌ز ژ ته دكه‌م
فڕینگه‌ها فره‌نسی یا مشت كه‌لوپه‌ل و مرۆڤ بوو
هه‌می كه‌لوپه‌ل د ره‌وانه، تنێ له‌شێ من تێ نه‌بیت
ئاااه.. ئه‌ی ئه‌وێ ل پشت چاڤێن ته.. وه‌لاتێ من
تو یێ نووسیای بووی، ب وێ پشتا پێشڤه دچیت
من شمشیرێ خوه یێ دیمه‌شقی به‌رزه كر،
تاوانبار بووم ب به‌ڕه‌ڤانیكرنا ژ ته‌قنێ
شمشیرێ من چ ڕا نه‌بوون،
ل سه‌ر ره‌سه‌نی و بنه‌كۆكا خیلافه‌تێ
ئه‌ڤجا وان تاوانباركرم.. ب بۆرجی ڤه هه‌لاویستم و
چوون، دا ته‌لارا مێڤانداریێ نووژه‌ن بكه‌ن..
هه‌ر وه‌كو ب راستی حه‌ز ژ ته دكه‌م
من بایه‌ك د كێله‌كا خوه دا نخافت
تو هه‌م با و هه‌م چه‌نگ بووی
ئوو ل ته دگه‌ڕام، ئاسمانێ دوور
من خه‌ون كرێ دكرن
– خه‌ونێ میناكه‌ك هه‌یه چاڤلێكرنا وێ دكه‌ت-
ئوو من ژ قه‌ستا ستران دگۆتن
بۆ هه‌سپه‌كێ ل سه‌ر دارێ
ده‌ریایێ ئه‌ز ژ داویا ئه‌ردی ڤه‌گه‌ڕاندم
هه‌می وه‌لات خۆدیكن و هه‌می خۆدیك به‌رن
بۆچی پێكۆلا ڤێ وه‌غه‌رێ دكه‌ین؟
نێزیكتر دبی ژ لێڤێن من و تو دوورتری
ژ ماچه‌كا نه‌گه‌هیتن، هه‌ر وه‌كو ئه‌ز حه‌ز ژ ته دكه‌م
د جادده‌یێن له‌شێ ته دا، وه‌غه‌رێ ڕادهێلا من
د كولانێن له‌شێ ته دا، وه‌غه‌رێ ئه‌ز دوورپێچ دكرم
من بێده‌نگیا خوه ل سه‌ر لێڤێن ته دهێلا و
ده‌نگێ خوه ل سه‌ر په‌یژه‌یا سێپێكێ دهێلا
هه‌ر وه‌كو ئه‌ز حه‌ز ژ ته دكه‌م
وه‌غه‌رێ ئه‌ز ل گزیرته‌یێن له‌شێ ته ڤه‌دشارتم
– یا فره‌هه به‌رته‌نگیا ڤێ ره‌هه‌ندێ-
وه‌غه‌ر من د ناڤ سووسنه‌‌كێ دا ڤه‌دشێریت.
وه‌ختێ من سه‌ر ژ نوو.. ب داڕێژه‌ڤه
دا بزانم كا ژ قه‌ستا ل كیڤه دمرم
-رۆژه‌ك بێ شه‌هید بۆری- ده‌نگێ من.. ب داڕێژه‌ڤه
ئه‌و سترانبێژێ كچك وێنه‌یه‌كی بۆ ره‌سم دكه‌ن
ده‌نگێ وی ده‌سته‌سه‌ركرن- رۆژه‌ك بێ شاعر بۆری-
د ناڤبه‌را ئه‌ڤان هه‌ردو بۆشاییان دا
ئه‌ز د ته دا به‌ره‌ف ته دهێم
ژ چپكه‌كا كو نه‌بینم، ژ دایك دبم
یاریا ب هه‌یڤێ و ته‌رمێ خوه دكه‌م
بۆچی پێكۆلا ڤێ وه‌غه‌رێ دكه‌ین؟
هه‌می وه‌لات خۆدیكن و هه‌می خۆدیك به‌رن
بۆچی پێكۆلا ڤێ وه‌غه‌رێ دكه‌ین؟
***
ژێده‌ر:
الدیوان- الاعمال الاولی (2). دیوان محاوله رقم 7. قصیده كأنی أحبك. منشورات دار ریاچ الریس، گ1- 2005؛ ص113- 117.
