هه‌ستا نه‌ته‌وایه‌تی د كاودانێن به‌رته‌نگ دا!!
ب درێژیا دیرۆكا كوردان هه‌رده‌م كاودان به‌رته‌نگ بووینه و به‌رده‌وام نه‌هامه‌تی و كۆچبه‌ری و ئه‌نفال و شه‌ڕ و نه‌خۆشی دیتینه به‌لێ هه‌ستا نه‌ته‌وایه‌تی هه‌ر یاموكم بوو و هه‌ر خه‌لكی ب هێزا نه‌ته‌وایه‌تی خوه ل به‌ر هه‌می ته‌نگاڤیان دگرت! لێ ب تنێ پشتی روخیانا رێژێما به‌عس ل سالا 2003 هه‌تا دووماهیا سالا 2013 ئانكو ب تنێ ده‌ه سالان كوردان ل هه‌رێما كوردستانێ هه‌ست ب ته‌ناهیێ و خۆشگوزه‌رانیێ كر و چاڤێن وان ل دونیایێ ڤه‌بوون و شیان د ڤی ده‌مێ كورتدا پێنگاڤێن ئێكجار مه‌زن بهاڤژێن د هه‌می واراندا و پێشڤه‌چوونێن مه‌زن بخوه‌ڤه دیتن و شیان ئه‌و وێنێ كرێتێ راگه‌هاندنا عه‌ره‌ب و تورك و فارسان دایه جیهانێ ل سه‌ر كوردان هه‌میێ بگهۆرن و وێنه‌یی كوردان ب دروستی نیشا جیهانێدا و بۆ دیاركر كو كورد دژی چ ملله‌تان نینن و هه‌كه ده‌لیڤه بۆ هه‌بیت دشێن زۆر كار و كریاران بكه‌ن بۆ خزمه‌تكرنا هه‌می جیهانێ!! به‌لێ ل به‌رامبه‌ر ڤێ پێشڤه‌چوونێ زۆربه‌یی خه‌لكی هه‌ست ب به‌رپسیارتیێ بۆ پارستنا خاك و ملله‌تی و ڤان ده‌ستكه‌ڤتان لاواز بوو و هه‌ستا نه‌ته‌وایه‌تی ل ده‌ف مری و ب تنێ هزر د به‌رژه‌وه‌ندیا خوه‌دا كر! بێی هزركه‌ت كو كورده و چاره‌نڤیسێ وی وه‌كی هه‌ر تاكه‌كێ دی یێ كورده! و پتریا خه‌لكی هۆسا هزر دكه‌ن كو ب تنێ دكاودانێن شه‌ڕیدا هه‌ستا نه‌ته‌وایه‌تی دلیڤیت و كاریگه‌ریێ دكه‌ت! لێ ئه‌م دبێژین هندی مرۆڤێ كورد د ژیانێ دا مابیت دڤیت د هه‌می وارێن ژیان و كاركرنێ و خزمه‌تكرنێ و هه‌ر تاكه‌ك ل جهێ خوه ئه‌ڤ هه‌سته هه‌بیت داكو خوه و ملله‌تێ خوه پارێزی و ب ساناهی و ب كێمترین زیان ژ قه‌یرانان ده‌رباز بین! به‌لێ مخابن نه به‌رپرسَن یه‌كێن ئیداری و نه رێكخراوێن جڤاكێ سیڤیل و نه سه‌نته‌ر و په‌یمانگه‌ه و زانكۆیان و نه خوتبه خوینا و مامۆستایان كه‌س ب دروستی ب رۆلێ خوه نه‌رابوویه و خه‌لك پێنه‌گه‌هاندیه و نه حازركریه بۆ چاوانیا سه‌ره‌ده‌ریكرنێ د كاودان و قه‌یراناندا و هه‌میان ئه‌ڤ كاره هێلا ب هیڤیا حزبانڤه و ململانیا حزبی ژی وه‌كر هه‌می حزبان ئه‌ڤ بارگرانیه خسته سه‌ر ملێن پارتی ب تنێ! و پارتی ئه‌ڤ بارگرانیه هه‌می بۆ سه‌رۆك بارزانی ب تنێ هێلایه!! و كه‌سێ وی ب تنێ ل ناڤخوه و ل گه‌ل به‌غدا و ده‌ره‌كی ل گه‌ل دونیایی یێ رۆلێ مه‌زن دگێریت و دونیا هه‌می ئینا پشته‌ڤانیا كوردان د ڤی شه‌ریدا و د ڤان كاودانن مه‌ترسیدار و به‌رته‌نگ د اكو ئه‌ڤه پیلانه‌كا مه‌زن بوو ل دژی كوردان هاتیه دارێتن بۆ دوباره ژناڤبرنا كوردان! لێ دیسا ئه‌م ڤی رۆلێ مه‌زن یێ سه‌رۆكی ل پێش چاڤ نابینین و بۆ گیرۆبوونا مووچه‌یی دشێن چه‌ندین كێشا په‌یدا بكه‌ین بێی هزر بكه‌ین كو فه‌ره نوكه ژ هه‌ر ده‌مه‌كێ دی پتر ئه‌م دخوه‌راگر بین و د هاریكار بین ل گه‌ل سه‌ركرداتیا خوه و پێكڤه كاركه‌ین و ب كێمترین زیان ژ ڤان قه‌یرانان قورتال بین و هه‌كه هۆسا هزر نه‌كه‌ین و كارنه‌كه‌ین دێ خویكه‌كا مه‌زن ده‌ین و ئێدی ب چ ره‌نگان نه‌شێین خوه راگرین و د هه‌می ده‌ستكه‌فتان ژ ده‌ستده‌ین!! له‌ورا ئه‌ڤ كاودانه ژ مه دخوازن ئه‌م پتر د خوه‌راگر بین و د هاریكار بین ل گه‌ل پێشمه‌رگه‌یی و سه‌ركردایه‌تیا خوه و ب هه‌ستا نه‌ته‌وایه‌تی و هه‌ستكرن ب به‌رپسیارتیێ كاركه‌ین و نه‌بینه بارگرانی چونكی د ڤان كاودانێن به‌رته‌نگ دا پاشه‌رۆژه‌كا گه‌ش و مه‌زن یا ل پێشیا مه دڤێت ئه‌م دحازر بین بۆ ڤێ چه‌ندێ.
