هه‌شت زيندانى ژ چاكسازيه‌كا دهۆك ره‌ڤين
ئه‌ڤرۆ نيوز:
شه‌ڤا بۆرى هه‌شت زيندانى ژ چاكسازيا ئێتيتێ يا ژن و سنێلان ره‌ڤين و پشتى چه‌ند ده‌مژمێران هاتنه ده‌سته‌سه‌ركرن.
سلێمان ئاليخان، به‌رپرسێ نڤيسينگه‌ها دهۆك يا تۆڕا ميديايى يا رووداو، راگه‌هاند: ده‌مژمێر 2:30 شه‌ڤا بۆرى، هه‌شت زيندانى ژ چاكسازيا ژن و سنێلان ل ئێتيتێ ره‌ڤين و پشتى چه‌ند ده‌مژمێران پێنج هاتنه ده‌سته‌سه‌ركرن و ئه‌ڤرۆ سپێدێ ژى سێ يێن ماين هاتنه ده‌سته‌سه‌ركرن”.
ب گۆره‌يى ئه‌و زانياريێن رووداو به‌لاڤكرين ئێك ژ وان كه‌سێن ره‌ڤين ب تۆمه‌تا كوشتنێ هاتينه زيندانكرن.
بۆ پشت راستكرنا نووچه‌يى ئه‌ڤرۆ نيوز په‌يوه‌ندى ب چه‌ندين لايه‌نێن په‌يوه‌نديدار كر، به‌لێ كه‌س يێ ئاماده نه‌بوو چ داخۆيانيان د ڤێ ده‌ربارێ دا بده‌ت.
ل سالا 2011 ژى 11 زيندانى ژ چاكسازيا مه‌زنان ل دهۆكێ ره‌ڤى بوون و هنده‌ك كه‌س ژ وان خوه دابوو ده‌ست و هنده‌ك ژى هه‌تا نوكه نه‌هاتينه ده‌سته‌سه‌ركرن.
