هه‌شت ژ مه‌ترسیێن زێده بكارئینانا مۆبایلێ كو پێدڤییه یێن لێ هشیار بن
ئه‌ڤرۆ نیوز: ڤه‌ده‌ر ره‌شاڤایی:
كه‌س ژ مه نینه ته‌كنه‌لۆجییا سه‌رده‌م بكارنه‌ینیت بتایبه‌ت مۆبایلان، رۆژ بۆ رۆژێ ئه‌م پتر پێڤه دهێنه گرێدان، یا ئه‌م نزانین ئه‌وه كو بكارئینانا مۆبایلێ چه‌ندین زیان و مه‌ترسی هه‌نه و گه‌له‌ك جار ئه‌م هه‌ست پێ ناكه‌ین یان پشتگوهڤه دهاڤێژین، ژ 8 مه‌ترسیێن زێده بكارئینانا مۆبایلان:
1- روودان و بریندار بوون:
لده‌مێ كرنا په‌یاسه‌كێ یان هاژۆتنا ترۆمبێلێ مه هه‌مییا گه‌له‌ك باوه‌رییا بخوه هه‌ی كو ئه‌م ژ خۆ د هشیارین و ب ته‌ركیزین ده‌ستێن مه ژ مۆبایلێ ڤه نابن، لێ ڤه‌كۆلینان دیاركرییه كو بكارئینانا مۆبایلێ مرۆڤێ بێخه‌م دكه‌ت و ته‌ركیزا مرۆڤی ژ ده‌ردۆران دبه‌ت یان كێم دكه‌ت، سه‌رژمێرییه‌كێ ل بریتانیا ئاشكرا كرییه كو 42 سه‌دێ ژ بكارئینه‌رێن مۆبایلان ل بریتانیا جاره‌كێ یان پتر لده‌مێ بكارئینانێ و برێڤه‌چوونێ ب دیواره‌كی كه‌فتینه یان هه‌لنگفتینه، سالانه ملیۆنه‌ك و 500 هزار كه‌س ژبه‌ر بكارئینانا مۆبایلێ دده‌مێ هاژووتنا ترۆمبێلێ دكه‌ڤنه نه‌خۆشخانان.
2- ئازارێن هه‌ستی و زه‌ڤله‌ك و گه‌هان:
هه‌لگرتنا مۆبایلێ یا گه‌له‌ك كو تێدا مرۆڤ ده‌ستێ خو بكار دئینیت و ستۆیێ خوه دچه‌مینیت، هه‌ستی و زه‌ڤله‌ك و گه‌هێن باسكێ ده‌ستی و تبلان و ستۆیێ مرۆڤی تۆشی ئێشان و نه‌خۆشییان دكه‌ن، لێكۆلینێن زانستی ل ئه‌مریكا دبێژن ئێشانێن ده‌مدرێژ په‌یدا دكه‌ت.
3- وه‌ستیانا چاڤان و سه‌رئێش:
ته‌ماشاكرنا مۆبایلێ بۆ ده‌مه‌كێ درێژ ماندیبوونا چاڤان و هشككرنا په‌یدا دكه‌ت و سه‌رئێشا ژ ئالیێ ئه‌نیێ و هه‌ردو ره‌خێن ئه‌نیێ په‌یدا دكه‌ت، بێهنڤه‌دانێن درێژ بده چاڤێن خوه كێم كێم ته‌ماشای مۆبایلا خوه بكه.
4- كارتێكرن لسه‌ر مێشكی:
لێكۆلینا (Carnegie Mellon University) دبێژیت: ئه‌و كه‌سێن مۆبایلێ بكار دئینن و لبه‌را دگه‌ل كه‌سێن لده‌ڤ خوه دئاخڤن، برێژا 37 سه‌دێ چالاكیێن مێشكی ژ ده‌ست دده‌ن، هه‌روه‌سا هندی تو پتر یێ ب مۆبایلا خوه‌ڤه گرێدایی بی ئاستێ ته‌ركیز و بجهئینانا ته بۆ ئه‌ركان و گۆتۆبێژان كێمتر دبیت.
5- ئاریشێن نڤستنێ:
گه‌له‌ك ژ مه مۆبایلێ دبه‌ینه سه‌ر نڤینێن خوه بۆ ته‌ماشه‌كرنا ڤیدیۆیه‌كا بكه‌نی یان چاتكرنێ، ئه‌ڤ یه‌كه ژی مرۆڤی دكه‌ته د ره‌وشه‌كا هشیاریێ دا و دبیته ئه‌گه‌رێ بێ خه‌ویێ و ئاریشێن نڤستنێ.
6- برینا په‌یوه‌ندیان دگه‌ل هه‌ڤال و كه‌سوكاران:
مۆبایل ره‌فتارێن جڤاكیێن مرۆڤی دگوهوریت، و گه‌له‌ك ژ سنێلان ب مۆبایلان ڤه دهێنه گرێدان، ده‌یباب ژی بهه‌مان شێوه و ڤێ یه‌كێ بۆ زارۆكان ژی ڤه‌دگوهێزن، د ئه‌نجام دا زارۆك و سنێله ب كێماسییان د ره‌فتارێن جڤاكی دا مه‌زن دبن، چێدبیت ئه‌م ب ئاسایی ببینین لێ ئه‌نجامێن وێ گه‌له‌ك د مه‌ترسیدارن.
7- دزین:
گه‌له‌ك ژ مه مۆبایلێ دا ئینته‌رنێتێ بكاردئینین و كێم جار ژ ئه‌كاونتێن خوه ( لۆگ ئاوت) دكه‌ین و دچینه ده‌ر و ئه‌نتی ڤایرۆسێن هنده‌كان بهێز نینه، هاككه‌ره‌كێ شاره‌زا دشێت ب ساناهی ئه‌كاونتا مرۆڤی بدزیت .
8- ئێشانا پشتێ:
بچه‌ماندنا سه‌ری مل بلند دبن یان ژی راوه‌ستان د ئێك ( وه‌زعیه) دا ژبه‌ركو مرۆڤ مژوولی مۆبایلێ دبیت و ژبیردكه‌ت لڤینێن جودا بكه‌ت، د ئه‌نجام دا پشت ئێشان په‌یدا دبیت، بۆ رزگاربوونا ژ ڤێ مه‌ترسیێ خوه گه‌له‌ك نه چه‌مینه و پشتا ته بلا یا راست بیت و لڤینێن جیاواز لده‌مێ بكارئینانێ بكه.
