ههشت یانێن پارێزگههێ دێ پشكداری قارهمانیا جۆدۆیێ بن
ئهڤرۆ،
دهێته چاڤهڕێ كرن ئهڤرۆ ب پشكداریا ههشت یانێن ل سنۆرێ پارێزگهها دهۆكێ قارهمانیا جۆدۆیێ بۆ ئاستێن جودا ل هۆلا گرتیا یانا دهۆك یا وهرزشی بهێته ئهنجامدان ئهوا دێ ژلایێ ئێكهتیا جۆدۆیا پارێزگههێ و ههڤكاریا نوونهراتیا دهۆك یا لژنا ئۆلمپی و پشتهڤانیا راستهوخۆ یا سهرۆكێ نوونهراتیێ دكتور ئهحمهد قاسم ڤه هێته ئهنجامدان.
بڕیاره ههشت یانێن پارێزگههێ پشكداری قارهمانیێ بن ئهو ژی، دهۆك، زاخۆ، سێمێل، ئاكرێ، شێخان، تهناهی، ئامێدیێ و گاره كو دێ بۆ ئاستێن پشكۆژ، تازهپێگههشتی، لاوان و پێشكهفتیان و ئاستێ كچان، سیستهمێ قارهمانیێ دێ بۆ ماوێ رۆژهكێ هێته كرن كو ل دانێ سپێدێ ڤاڤارتن و دیاركرنا گڕانیا كێشێن یاریزانا یه، دیسان بۆ ههر كێشهكێ یاریزانهك هێته دهستنیشانكرن ئانكۆ ههر یانهكێ مافێ ههیی حهفت یاریزانان بۆ قارهمانیێ بهرههڤ بكهت.
ل دۆر ڤێ یهكێ عومهر جهلال سهرپهرشتێ قارهمانیێ بۆ رۆژناما ئهڤرۆ گۆت: ئهڤ قارهمانیه باشترین بهرههڤینه بۆ یانێن مه یێن پارێزگههێ پێخهمهت شێوهیهكێ رێكخستی و بهێز بهرههڤبن بۆ قارهمانیا كوردستانێ و یێن ئیراقێ، پێنهڤێت ههر تشتهكێ پێدڤی بۆ قارهمانیێ ژلایێ نوونهراتیا دهۆك و ئێكهتیا جۆدۆیێ هاتیه دابینكرن كو رێكخستنهكا سهركهفتی بیت و ب كهڤیته د خزمهتا یانێن پارێزگههێ دا.
دهێته زانین دووماهی چالاكیا ئێكهتیا جۆدۆیا پارێزگههێ ل وهرزێ 2020ێ بوو كو تێدا شهش یانه پشكداربوون و یانا سێمێل ب كۆمكرنا 75 خالان رێزا ئێكێ هاتبوو و ئاكرێ ب 15 خال و دهۆك ب 10 خالان رێزێن دویێ و سێیێ ب دهستڤه ئینابوون.
