هه‌كار به‌رقی: كچێن یانا سه‌نحاریب هه‌ڤڕكن بۆ ناسناڤێ ئیراقێ
ئه‌ڤرۆ،
د داخویانیه‌كێدا راهێنه‌رێ تیما ڤۆلیبۆلا یانا سه‌نحاریب بۆ رۆژناما ئه‌ڤرۆ دیاركر كو پشكداریا وان د قاره‌مانیا ئیراقێ دا نه بتنێ ژماره‌یه به‌لكۆ دێ هه‌ڤڕكیێ بۆ ناسناڤی كه‌ت، ئه‌وا نوكه یاریێن وان ل باژێرێ سلێمانیێ ب پشكداریا هه‌شت یانا ل هۆلا گرتیا یانا پێشمه‌رگه هێنه كرن.
زێده‌تر هه‌كار به‌رقی دیاركر كو كۆما ئه‌وان پێكهاتیه ژ یانێن قه‌ره‌قووش قاره‌مانا وه‌رزێ بوری، سلێمانی، كچێن هه‌ولێرێ كو دهێته هژمارتن كۆمه‌كا ب زه‌حمه‌ت و خودانێن رێزا ئێكێ و دویێ دێ ده‌ربازبنه چارگۆشا زێرین و گوت: هه‌رچه‌نده یاریا ئێكێ ل گه‌ل قه‌ره‌قووش گه‌له‌ك ب زه‌حمه‌ت بوو لێ گه‌شبینم بۆ هه‌ردو یاریێن مایی ب هێزتر و ئه‌نجامێن باشتر بهێنه دناڤ یاریێ دا و ئارمانجا مه نه بتنێ پشكداریه به‌لكو دێ هه‌ڤڕكیێ بۆ ناسناڤی كه‌ین سه‌رباری هنگاڤتنا چه‌ند یاریزانێن مه كو دبیت كارتیركرنا خوه هه‌بیت، لێ یاریزانێن شاره‌زا شیانێن باش هه‌نه بۆ ده‌ستڤه‌ئینانا ئارمانجێن مه.
ژلایه‌كێ دیڤه ناڤهاتی گوت: یانا سه‌نحاریب نوونه‌را پارێزگه‌ها دهۆكێ یه و زێده‌تر هه‌ر یانه‌كا دی پشته‌ڤانیا وه‌رزشا كچان دكه‌ت ئه‌ڤچه‌نده ژی بوویه ده‌رگه‌هه‌ك بۆ هه‌ر یاریزانه‌كا كچن كو ئاست و شیانێن خوه د یاریا ڤۆلیبۆلێ دا دیاربكه‌ت، له‌ورا هیڤییا مه ئه‌وه پارێزگارێ دهۆكێ و جهێن په‌یوه‌ندیدار خوه ل ڤێ وه‌رزشێ ژی بكه‌نه خودان.
ژلایێ خوه‌ڤه داوود ره‌به‌ن سه‌رۆك شاندێ یانا سه‌نحاریب گۆت: لایه‌نێ دارایی و پشته‌ڤانیا مه‌عنه‌وی لدویڤ شیانێن خوه مه بۆ تیمێ به‌رهه‌ڤكرینه ب هیڤییا وێ یه‌كێ نوونه‌را پارێزگه‌هێ ب ئه‌نجامێن سه‌ركه‌فتنی و ب ده‌ستڤه‌ئینانا ناسناڤی ژ قاره‌مانیێ ڤه‌گه‌ڕیێت، مه باوه‌ری ب كادرێ راهێنانێ و یاریزانێن خوه هه‌یه سه‌رباری ئه‌ركێ مه ب سانه‌هی نابیت لێ یا دشیان دا بیت دێ هێته ئه‌نجامدان.
بۆ زانین هه‌ر هه‌شت یانێن پشكدار ئه‌وژی، سه‌نحاریب، ئه‌كاد، كچێن نه‌جه‌ف، ده‌ربه‌ندیخان، سلێمانی، ئافردێت، قه‌رقووش و كچێن هه‌ولێرێ و یاریێن وان ب شێوه‌یێ خول ئێك قۆناغ و ب سیسته‌مێ دو كۆمان دهێنه كرن قاره‌مانا خولێ دێ پشكداری قاره‌مانیێن ئه‌ره‌بی و ئاسیا كه‌ت.
