هه‌كه خۆنیشاندان دوماهی نه‌هێن ده‌واما زانكۆیان دێ هێته راگرتن
هه‌ولێر، قائید میرۆ
بمه‌ره‌ما ڤه‌گه‌ڕاندنا ده‌رمالێ هه‌یڤانه چه‌ند رۆژه‌كه قوتابیێن زانكۆ په‌یمانگه‌هان ده‌ست ب خۆنیشاندانان كرینه و هه‌موو فڕاكسیۆنێن په‌رله‌مانی ژی پشته‌ڤانیا مافێن قوتابیان دكه‌ن، قوتابیه‌كژی دبێژیت، هه‌تا نوكه كه‌سێ خۆ ل ده‌رمالێ قوتابیان نه‌كریه خودان هه‌ر ئێك دبێژیت گرێدایی فلان كه‌س و وه‌زاره‌تێ یه.
كچه‌كا قوتابی لناڤا خۆنیشانده‌رێن هه‌ولێرێ دبێژیت” ره‌وشا قوتابیێن پشكێن نافخۆیی زۆر یا خرابه و كچ هه‌یه قوتابیه پاره نینه درێژیێ ب خواندنێ بده‌ن، له‌وڕا نه‌چاره رۆژانه پشتی ده‌واما زانكۆیێ دچیته كاركرنێ و نانی بۆ خه‌لكی دكه‌ت هه‌تا دبیته مه‌غره‌ب ڤێجا پێنج هه‌تا شه‌ش هزار دیناران ناده‌نێ، بینن به‌رچاڤێن خۆ قوتابی هه‌تا مه‌غره‌ب كار بكه‌ت بۆ په‌یداكرنا پاریێ رۆژانه دێ چاوا شێت ل زانكۆیێ خوینیت، له‌وڕا ئه‌م داخوازا ڤه‌گه‌ڕاندنا ده‌رمالێ خۆ دكه‌ین و دێ به‌رده‌وامبین لسه‌ر داخوازا مافێن خۆ.
محه‌مه‌د ئه‌یوب، قوتابیه‌كێ دیكه‌یێ زانكۆیێ یه بۆ رۆژناما ئه‌ڤرۆ گۆت” ل پۆلا شه‌شێ بهه‌ر شێوه‌یه‌كێ هه‌بیت بابێ من شیایه هنده‌ك پاره‌ی بۆمن بمه‌زێخیت هه‌تا من قۆناغا ئاماده‌یی دوماهی ئینای، به‌لێ نوكه ئه‌ز ل كۆلیژنا ئه‌ندازیاری هاتیمه وه‌رگرتم و نه‌چارم ل پشكێن نافخۆیی بمینن، هه‌موو قوتابیه‌ك دزانیت خواندن ل پشكا ئه‌ندازیاری پێدڤی ب خۆ وه‌ستاندنێ هه‌یه و چو ده‌لیڤه نینه كار بكه‌ن، هه‌تا كارژی بكه‌م كار بده‌ست ناكه‌ڤیت، پشتڕاستیڤه مالامن نه‌شێن به‌رده‌وام هاریكاریێن دارایی بده‌نه‌من بۆ خواندنێ، به‌لێ هه‌گه‌ر ده‌رمالێ قوتابیان ڤه‌گه‌ڕیت دێ هه‌تا راده‌كی پشته‌ڤانیه‌كا باشبیت بۆ هه‌موو قوتابیان، هه‌رچه‌نده نوكه بهایێ هه‌موو كه‌لوپه‌لان د بازاڕی دا بلندبوویه و گۆهڕین په‌یدابووینه دڤێت ده‌رماله‌ژی بهێته زێده‌كرن، به‌لێ ئه‌گه‌ر وه‌ك به‌ری قه‌یرانێ ژی بهێته مه‌زاختن هه‌ر ئه‌م رازینه و دێ هاریكاریه‌كا باشبیت بۆمه وه‌كی قوتابی، به‌رۆڤاژی قوتابی هه‌نه ره‌وشا ئابورا وان یا گونجای نینه و نه‌شێت درێژیێ ب خواندنا زانكۆیێ بده‌ت، هه‌رچه‌نده ئه‌م دگه‌ل خۆنیشاندانێن دژوار و ئه‌نجامدانا توندوتیژیا نینین، به‌لێ دێ به‌رده‌وام داخوازا ئه‌ڤی مافێ خۆ بكه‌ین و هیڤیدارین هه‌موو لایه‌كژی پشته‌ڤانیا قوتابیان بكه‌ت بۆ مافێن وان.
ئاشنا عه‌بدولا، ئه‌نداما لیژنا په‌روه‌ردێ و خواندنا بلند بۆ رۆژناما ئه‌ڤرۆ دیاركر” به‌ری نوكه مه یاداشته‌ك به‌رهه‌ڤكریه و ب ئیمزایا 48 ئه‌ندامێن په‌رله‌مانی ئاراسته‌ی ده‌سته‌یا سه‌رۆكایه‌تیا په‌رله‌مانی هاتیه‌كرن، هه‌تا بابه‌تێ ده‌رمالێ قوتابیان بكه‌ڤیته كارناما كۆمبوونا په‌رله‌مانی دا، به‌لێ مخابن ده‌سته‌یا سه‌رۆكایه‌تیا په‌رله‌مانی بهه‌ر ئه‌گه‌ره‌كێ هه‌بیت به‌رهه‌ڤنه‌بو چو كۆمبوونه‌كێ تایبه‌ت بكه‌ت ب ده‌رمالێ قوتابیان، بێگومان ڤه‌گه‌ڕاندنا ده‌رمالێ قوتابیان مافێ وانایه، چونكه به‌ری نوكه بۆ هاتیه مه‌زاختن و سالا 2014ێ ب ئه‌گه‌رێ په‌یدابوونا قه‌یرانا دارایی هاتیه راگرتن، ئه‌م باوه‌رین نوكه ره‌وشا دارایی ل هه‌رێما كوردستانێ باشتره و د شیانێن حوكمه‌تێ دایه ده‌رمالێ هه‌یڤانه بۆ هه‌موو قوتابیێن زانكۆ په‌یمانگه‌هان بهێته ڤه‌گه‌ڕاندن، ئه‌گه‌ر بهێت و به‌ری چه‌ند رۆژان په‌رله‌مانی كار لسه‌ر یاداشتامه كربا ئه‌ڤه بێگومان ره‌وش هوسا ئالۆز نه‌دبو خۆنیشاندان نه‌دهاتن ئه‌نجامدان، نوكه‌ژی ده‌م مایه و نه دره‌نگه ب زووترین ده‌م بڕیارا ڤه‌گه‌ڕاندنا ده‌رمالێ قوتابیان بهێته ده‌ركرن.
زانا مه‌لا خالد، سه‌رۆكێ فڕاكسیۆنا پارتی لپه‌رله‌مانێ كوردستانێ د كۆنگره‌یه‌كێ رۆژنامه‌ڤانی دا گۆت” هه‌موو جورێن توندوتیژیێ دژی قوتابیان ئه‌م ره‌ت دكه‌ین و بهه‌ر ئه‌گه‌ره‌كێ هه‌بیت و هه‌ر كه‌سه‌كێ هه‌بیت نابیت توندوتیژی هه‌مبه‌ر قوتابیێن خۆنیشانده‌ر بهێته‌كرن، رۆژێن بۆری لیژنا په‌روه‌ردێ و خواندنا بلند لپه‌رله‌مانێ كوردستانێ كار بۆ ڤه‌گه‌ڕاندنا ده‌رمالێ قوتابیان كریه، هه‌روه‌سا فڕاكسیۆنا پارتی ژی یاداشته‌ك ئاراسته‌ی سه‌رۆكایه‌تیا په‌رله‌مانی كریه و 50 په‌رله‌مانتاران ئیمزاكریه، هه‌تا كۆمبوونه‌كا په‌رله‌مانی بهێته تایبه‌تكرن ب ڤه‌گه‌ڕاندنا ده‌رمالێ قوتابیان و هه‌ردو وه‌زیرێن دارایی و ئابوری و خواندنا بلند بهێته گازیكرن بۆ په‌رله‌مانی، داخوازێ ژ لیژنه‌یێن په‌یوه‌ندیدار دكه‌ین دوفچوونێ و ڤه‌كۆلینێ لدۆر ئه‌نجامدانا توندوتیژیان دژی قوتابیان بكه‌ن و بێ یچو مه‌ره‌مێن سیاسی كار بكه‌ن هه‌تا بزانین كینه توندوتیژیێ دژی قوتابیێن خۆنیشانده‌ر دكه‌ن، ئه‌م وه‌كی فڕاكسیۆنا پارتی پشته‌ڤانیا هه‌ر خۆنیشاندانه‌كا دوور ژ توندوتیژیێ دكه‌ین و دگه‌ل مافێن قانوونیێن هه‌موو قوتابیانین و هه‌موو بزاڤه‌كێ بۆ ڤه‌گه‌ڕاندنا ده‌رمالێ وانا دێ بكه‌ین.
گوره‌ی زانیاریێن رۆژناما ئه‌ڤرۆ ژبه‌ر ئالۆزیێن ل خۆنیشاندانێن سلێمانیێ هاتینه‌كرن بزاڤه‌ك هه‌یه بۆر اگرتنا ده‌واما زانكۆ په‌یمانگه‌هان، به‌لێ ئه‌گه‌ر بڕیارا ڤه‌گه‌راندنا ده‌رماله‌ی بهێته‌دان خۆنیشاندان دێ بدوماهی هێن و ده‌ستێن سیاسی ژی ناكه‌ڤن ناڤا خۆنیشاندانان.
