هه‌كه سوبه‌هی نه‌هات…
كوسه‌ر شه‌وكه‌ت
جوانیا له‌شێ زه‌لامبوونێ، ب سه‌ر كرێتیا مرۆڤان من دواستینیت، سلوگانێن عه‌شقێ یێن ب تاما ژه‌هرێ ئه‌زا لاواز كریم، دووڤه‌لانكا خه‌ونێن د كه‌ڤلێ خه‌یالان دا مه؛ واستیا خه‌وا ل سه‌ر شوسته‌یێن هه‌رمی، ب سه‌لكێن تژی به‌رماییكێن كتك ل خوه كۆمكریمه! كیژ سوبه‌هیێ، تو د ناڤ خوه دا هه‌لگرتیی؟
ب سه‌فه‌را شعره‌كێ، خوه بگه‌هینه ڕه‌هێن ڤێ ئاخێ، ل به‌ر پیێن مرنێ ل ده‌وسا تاریێ وه‌ره! ڤێره شكه‌فته؛ شكه‌فت! چپكێن خوینا ل ناڤ پیێن كچه‌كێ، هه‌می ئایین كرنه ئێك! ڤێره هه‌لگرا خه‌ونێن كه‌ڤناره! جهێ خوه ڤه‌شارتنا ڕۆژێیه! تۆڕه‌مه ژ ده‌نگێ گریا وی زارۆیێ مری، به‌ری ژ دایكبوونێ! واستیایی، واستیایی، وه‌كی قێریێن وێ كچا، ژنبوون نه‌گه‌هشتیێ یا واستیایمه! كیژ مریه‌ما هه‌لگرا په‌یڤایه، ببوونا ته‌یه! كیژ خودای پفكریه له‌شێ ته! كیژ خاچ ل به‌ندا چوونا ته‌یه؟
ئالوده‌یا تاما ماچه‌كا حه‌رامم، گۆمانان ژ هه‌می هه‌بوونان دبه‌م! غه‌رقیا ده‌ریا هزرانم، هه‌كه سوبه‌هیه‌ك نه‌هێت كیژ په‌شێمانی دشێت ته ڤه‌گه‌ڕینیت، بۆ دانپدانێ!؟ سوبه‌هیه‌ك گه‌له‌ك ژ خه‌ونێن ڤه‌گه‌ڕیانێ وێڤه‌تر، وه‌كی وێڤه‌تریا ڤی تێكستی ژ ڤالاهیان…
