هه‌كه شه‌هید هه‌موو وه‌كو ئێك بن، بۆچى جوداهێ دكه‌ن؟
پێشنیار دكه‌م بۆ نها پاش ڤان عه‌ده‌تان بهێلن و یان بۆ هه‌موویان وه‌كو یه‌ك بن
یێ بێژیت شه‌هید هه‌موو وه‌كۆ ئێكن، ئه‌و د ناخێ خوه دا راستیێ نا دركینیت، ب تنێ په‌یڤه‌كه یا ژبه‌ر كرى و به‌س وێ دزانیت بێژیت، هه‌كه د راستى دا ژ ئه‌رد و ئه‌سمانان ژ ئێك د جیاوازن و جیاوازى دناڤبه‌را واند دهێته كرن، هنده‌كان دكه‌نه قه‌هره‌مان و هنده‌ك ژى بووینه پالێ پیشى و ژ كیستێ خوه و مالا خوه چوون و ب ژیانا خوه ئێك باس لێ ناكه‌ت و هه‌كه ب تنێ ئێك ل سه‌ر زیاره‌تا بێژیتێ خودێ ژ ته رازى بیت.
سه‌یره، د ئێك سه‌نگه‌ر و ئێك جه یێن شه‌هید بووین، ئێك بره به‌ر په‌رێن ئه‌سمانى و ئێك ژى هه‌ر زوو د ئاخێ را كر. بۆ ئێكێ رێوره‌سمێن له‌شكرى و هه‌موو به‌رپرس به‌رهه‌ڤبوون و بۆ یێ دى ژى ب تنێ جیران و هنده‌ك كه‌سوكار، بۆ ئێكێ چله و ماته‌مینى و بۆ یێ دى نه ئه‌و سویك و نه ئه‌و بازار و ب تنێ ژ كیستێ بابێ خوه چوو، بۆ ئێكێ په‌یكه‌ر و گۆتنا هۆزانان و خه‌لك هه‌موو دبیته هۆزانڤان و بۆ یێ دى ژى حبر د قه‌له‌مێن وان و هزر ل مێشكێن وان نامینیت، ژ بلى ب سالان فیسبووكێن هه‌موویان دبنه وێنه‌یێن وانا و ل بن كۆچك و ته‌نیران ژى باس ل یێن دى ناهێته كرن.
ئه‌و ب خوه ئه‌ڤه نه یا سه‌یره و نوویه د ناڤ جڤاكێ مه دا، به‌لكو ژ كه‌ڤن و هه‌تا نها ئه‌ڤ جوداهى یه هه‌بوویه، ژ كه‌ڤندا هنده‌ك ل سه‌ر كیستێ هنده‌كان و ب شیانێن هنده‌كان بووینه فه‌رمانده و قه‌هره‌مان و ئه‌و ب خوه د راستى دا وه‌ها نه‌بوویه، نه فه‌رمانده بوویه و نه قه‌هره‌مان و به‌لكو د هه‌ر شه‌ڕه‌كێ دا خوه ل بن هزار كونجێن تارى دا ڤه‌شارت بیت و كه‌سێن دى شه‌ڕ كربیت و ل دووماهیێ ژى هه‌ر ئه‌و قه‌هره‌مان بوویه و نوكه ب پله‌یا فه‌رمانده هاتیه خانه‌نشینكرن و قه‌هره‌مانێن راست و دروست ژى، یان د بێ مووچه‌نه یان ب زۆرى ب پێشمه‌رگێ ئیلۆنێ خانه‌نشین بوویه.
یا نوكه ژى هه‌ر ئه‌و سویك و بازار و سیسته‌مه، ره‌نگه ئه‌ڤ كورێ هه‌ژارى به‌رامبه‌رى سه‌د فه‌رمانده‌یان شیابیت شه‌ر كربیت و ب وێره‌كى و باوه‌رى به‌رگیرى كربیت، لێ به‌رامبه‌ر كه‌سێن دیتر دبنه قه‌هره‌مان و فه‌رمانده.
باش بزانن خه‌لكێ دى ژى چاڤ یێ ل هندێ هه‌ى ئه‌ڤ سه‌نى و مه‌نى یه بۆ كورێن وانژى بهێنه گێران، لێ چونكو ئه‌و هه‌ژارن و بێ كه‌سن كه‌سێ ئاگه‌ه ژ وان نینه. ئه‌ڤجا پێشنیار دكه‌م بۆ نها پاش ڤان عه‌ده‌تان بهێلن و یان بۆ هه‌موویان وه‌كو یه‌ك بن و یان دوباره كورێن خه‌لكێ دى ب ڤان ره‌فتارێن خوه یێن شاش شه‌هید نه‌كه‌نه‌ڤه. هه‌كه هوون بێژن مانێ هه‌ر كه‌س و كارێن وانن وان كاران دكه‌ن، ئه‌رێ دێ بۆچى تێدا به‌رهه‌ڤ بن و هوون ژى بنه هۆزانڤان و وێجا هه‌ر وه‌كو هوون دچنێ و سۆپاس بۆ خودێ هوون گه‌له‌ك بۆ هندێ د باشن ده‌ما مه‌دحێن ئێكێ دكه‌ن. ئه‌ڤجا بۆ وان ئاماده بن و جاره‌كێ ژى سلاڤ نه‌كه‌نه خێزانێن شه‌هیدێن دى و هه‌ر چو نه‌بیت سه‌ره‌دانكێ ژى بۆ مالێن وان ناكه‌ن.
ل دووماهیێ دێ بێژم، هه‌كه كورێن هه‌ژاران نه‌بن، هوون نابنه فه‌رمانده و به‌رپرس، ئه‌ڤجا ئێدى فێرى دادیێ و یه‌كسانیێ ببن و به‌س جوداهێ بكه‌ن
