هه‌لبه‌ستڤانه‌كێ كورد خه‌لاته‌كێ نێڤده‌وله‌تی ل وه‌لاتێ بۆسنایێ وه‌رگرت
ئه‌ڤرۆ/ ده‌مهات دێركی
هه‌لبه‌ستڤانێ كورد یێ ژ رۆژئاڤایێ كوردستانێ هسێن هه‌به‌ش خه‌لاتا نێڤده‌وله‌تی یێ وێژه و هه‌لبه‌ستێ یێ ئێكه‌تیا نڤیسكارێن بۆسنایێ ل پایته‌ختا ساراییڤۆیێ یا بۆسنا د فه‌ستیڤالا رۆژێن هه‌لبه‌ستێ ده وه‌رگرت.
ژبه‌ر ڤێ چه‌ندێ مه ئهڤ هه‌ڤپه‌یڤینا كورت دگه‌ل وه‌رگرێ خه‌لاتی ساز كر.
ئه‌ڤرۆ: گه‌لۆ نرخێ ڤێ خه‌لاتی و واته‌یا وێ چ یه, هه‌تا ئیرۆ كیژان هه‌لبه‌ستڤانێن جیهانی ئهڤ خه‌لات وه‌رگرتنه و دا كو ژ نێزیك ڤه ئهڤ خه‌لات بهێت ناسكرن مه خوه‌ست خوه‌دیێ خه‌لاتێ به‌هسا چیرۆكا ڤێ خه‌لاتێ بكت.
ئه‌ڤرۆ: برێز هسێن هه‌به‌ش ل رۆژا 4ێ گولانێ ل وه‌لاتێ بۆسنایێ تو هاتی خه‌لات كرن ژ ئالیێ ئێكه‌تیا نڤیسكارێن بۆسنایێ ڤه, زه‌همه‌ت نه‌بت تو دكاری به‌هسا چیرۆكا ڤێ خه‌لاتێ بكی?
ب كورتی ئه‌ز دكارم بێژم كو خه‌لاتا “بۆسناك سته‌چاك” خه‌لاته‌كه ناڤنه‌ته‌وه‌یی یه ژ بۆ وێژه‌یێ و هه‌لبه‌ستێ یه كو ژ ئالیێ ئێكه‌تیا نڤیسكارێن بۆسنا و هه‌رسه‌كێ ڤه تێ پێشكێش كرن و د فه‌ستیڤالا رۆژێن هه‌لبه‌ستێ ل ساراییڤۆیێ تێ داین, فه‌ستیڤالا ساراییڤۆیێ یه‌ك ژ فه‌ستیڤالێن هه‌لبه‌ستێ یێن هه‌ری كه‌ڤنه, چ ل وه‌لاتێن بالكان و چ ل جیهانێ و ته‌مه‌نێ وێ بێتری 60 سالی یه. خه‌لات یه‌ك ژ گرینگترین خه‌لاتێن وێژه و هه‌لبه‌ستێ ل وه‌لاتێن بالكانێ یه.
ئه‌ڤرۆ: چما ئهڤ خه‌لات ژ هوسێن هه‌به‌ش ره هاته داین?
یه‌ك ژ سه‌ده‌مێن دانانا خه‌لاتێ, وه‌ك وان گۆتیه, ئهڤ یه: “ئهڤ خه‌لات نرخه‌ك بلند نیشان دده ژ بۆ خه‌باتا وه یا ژ بۆ هه‌لبه‌ستێ یا ل به‌رچاڤ و به‌شداریا وه د وێژه‌یا كو روومه‌تا ئازادی و مرۆڤاتیێ بلند دكه…”. د كۆنگره‌یا رۆژنامه‌ڤانی ده ده‌ربارێ دانا خه‌لاتێ ده هاته گۆتن: یێ ئیسال خه‌لاتا ئێكه‌تیا نڤیسكارێن بۆسنایی “بۆسنان سته‌چاك” وه‌رگرتیه هه‌لبه‌ستڤانێ كورد هوسێن هه‌به‌شه كو ل ئالمانیایێ ل سه‌رگوونیێ دژی. ئهو كه‌سه‌ك تایبه‌ته, میله ستۆژج, سه‌رۆكێ ده‌سته‌یا رۆژێن هه‌لبه‌ستێ ل ساراییڤۆ, گۆت. ب ئاوایه‌كی هه‌لبه‌ستا وی نێزیكی مه یه, ژ به‌ر كو ئهو ل سه‌ر وێرانكرنا وه‌لاتێ كوردان, و ته‌رۆریزما كو ل دژی گه‌لێ كورد تێ كرن, دنڤیسه. مه ئیسال هوسێن هه‌به‌ش هلبژارت, ژ به‌ر كو ل ئه‌‌وروپایێ درامایه‌كه شه‌ر یا مه‌زن دقه‌ومه كو هنه‌ك دبێژن ده‌ستپێكا شه‌رێ جیهانێ یێ سێیه‌مه و ئێدی نه‌ما كه‌س ل سه‌ر رۆژهلاتا ناڤین دفكره, كو دراما وێ ب سالان ددۆمه. ژ به‌ر ڤێ یه‌كێ مه بریار دا كو خه‌لاتێ بدن هه‌لبه‌ستڤانه‌كی كورد, سه‌رگوون و مرۆڤه‌كی ژ وه‌لاته‌كی وێرانكری, وسا ستۆژج گۆت.
ئه‌ڤرۆ: تێ گۆتن هنده‌ك نڤیسكارێن به‌رنیاس و ناڤدار ژی ئهڤ خه‌لات وه‌رگرتنه?
ئهڤ خه‌لاته پێشتر ژ بۆ گه‌له‌ك نڤیسكار و هه‌لبه‌ستڤانێن ژ جیهانێ هاتیه دان, وه‌ك هه‌لبه‌ستڤانێ پۆلۆنی تاده‌وسز رزوه‌وجز, نڤسكارێ سپانی ژوان گۆیتسۆلۆ, هه‌لبه‌ستڤانێ فلستینی مه‌هموود ده‌رویش, هه‌لبه‌ستڤانێ ئه‌مه‌ریكی جهرستۆپهه‌ر مه‌ڕل, نڤیسكارا سویسری لما راكوسا, هه‌لبه‌ستڤانێ ئه‌مه‌ریكی جهارله‌س سمج, هه‌لبه‌ستڤانێ سوێدی لارس گوستافسسۆن, هه‌لبه‌ستڤانێ ئالمانی مجهال كرۆگه‌ر, هه‌لبه‌ستڤانا بۆسنی بسه‌را ئالكادچ, هه‌لبه‌ستڤان و سه‌ناریستێ بۆسنی ئابدولا سدران و پرێ دن.
ئه‌ڤرۆ: تو دكاری به‌هسا ڤێ خه‌لاتێ ژ ئالیێ مادی و مۆرالی ڤه بكی?
ئهڤ خه‌لات وه‌ك بێناسینه‌كه ناڤنه‌ته‌وه‌یی یه ژ هه‌لبه‌ستا من ره, ژ ئه‌زموونا من ره, ژ نڤیساندنا من ره, ژ كه‌دا من یا دوور و درێژ ل سه‌ر هه‌لبه‌ستێ ره یه. هه‌ر وها ئهو ده‌ریه‌كه ناڤنه‌ته‌وایی یه كو ل سه‌ر هه‌لبه‌ستا من هاته ڤه‌كرن و ل سه‌ر داناسینا ئه‌زموونێن من یێن به‌رفره‌ه ل سه‌ر گوهۆرینێن كو د هه‌لبه‌ستا كوردی و ناڤنه‌ته‌وه‌یی ده پێكتێن ره یه ژی.
ژ ئالیێ ئابۆری ڤه ژی هنده‌ك په‌ره ژ من ره هاتن داین.
ئه‌ڤرۆ: ئهڤ خه‌لات ژ بۆ وه و كوردان تێ چ واته‌یێ?
ئهڤ خه‌لات ژ بۆ من گه‌له‌ك واته‌داره, وێ باوه‌ریا من خورتر كر كو هه‌ر كه‌سێ كو كه‌دێ بده و خه‌باته‌كه ب تایبه‌ت بكه وێ سوودێ دێ, ب نێزیكی یان ب ده‌ره‌نگی, وه‌ربگره. ب سه‌ر ده ژی باوه‌ریا من خورتر كر كو هه‌لبه‌ستا كوردی دكارێ د ناڤ هه‌لبه‌ستێن جیهانێ ده جهه‌كی بلند و خورت بگره ده‌ما كو ئهو باش بئێت وه‌رگێران و پێشكێشكرن. خه‌لاتێ هه‌ر وها ده‌رفه‌ت دا من كو ژ بۆ هه‌موو مه‌دیایێن دیتباری, ده‌نگی و نڤیسكی یێن بۆسنایێ كو ئه‌ز ل سه‌ر زمان, هه‌لبه‌ست و وێژه‌یا كوردی و هه‌ر وها پرسگرێكا كوردی ژی باخفم و ب وان بناسینم, ئهڤ یه‌كا ژی ژ بۆ من تشته‌كی گه‌له‌ك گرینگ بوو. خه‌لات ژ بۆ كوردان تێ چ واته‌یێ,? ئه‌ز باوه‌ردكن كو ئهڤ خه‌لات ژ بۆ داناسینا هه‌لبه‌ستا كوردی یه ژی و نه ته‌نێ ژ بۆ هه‌لبه‌ستا منه, و ئهڤ تێ وێ واته‌یێ كو هه‌لبه‌ستا كوردی وه‌كه من گۆتیه گه‌ر وه‌ره وه‌رگێران دێ ببه خوه‌دیێ جهه‌كی هێژا و بلند د جیهانێ ده. هه‌ر چالاكیه‌ك, هه‌ر كاره‌ك كو كورد ل جیهانێ ده پێ رادبن, دكه‌ڤه خزمه‌تا پرس و دۆزا كوردی.
