هه‌لبه‌ست ریسكه‌كا زمانه‌ڤانی یه
نڤیسینا هونه‌ری ب گشتی و نڤیسینا هه‌لبه‌ستێ ب تایبه‌تی، پێدڤی ب ئاماژه و جڤه‌نگ و خوازه‌یان هه‌یه، لێ د هه‌لبه‌ستی ده ژبلی فاكته‌ران پێدڤی یه د هوندری رسته‌یان دا لادان هه‌بن، د وێ گاڤێ دا دكاریت جیهانا ریالیست و ئاشوپ گه‌رایی و تشتێ جێبوویی و نه‌جێبوویی و روونی و تاریبوونێ، ساڕی و گه‌رمیێ ب هه‌ڤرا گرێ بده‌ن، ب رێكا ئالاڤان هه‌لبه‌ستڤان دكاریت ده‌ربرینێ ژ گاڤا خوه یا هه‌لبه‌ستی و ده‌رون و نێرین و جیهان بینییا خوه ب ئاوایه‌كێ ستاتیكی بكه‌ت، دكاریت دیرۆكه‌كا دوور و درێژ دناڤا یه‌ك وێنه و هوندری یه‌ك رسته دا خه‌ست بكه‌ت، ئازار و ئێش و هیڤییان د یه‌ك جه دا كۆم بكه‌ت. هه‌لبه‌ستڤانێ گه‌نج دیار ئه‌ره‌دنی دبێژیت: وه‌ره گۆیا زه‌مینێ ببه و نۆژه‌ن بكه.. . ده‌رزێن كه‌فتینێ، ما تو نابینی، چاوا مرۆڤێن لاواز یێن ژێ دكه‌ڤن؟ وه‌ره.. ڤان مرۆڤان ببه و دووباره ب ئافرینه.. هه‌می یێن كون بووین، ما تو نابینی چاوا نهێنی ژێ دكه‌ڤن؟ وه‌ره.. ڤی ئاسمانی ببه و ب دووری.. فریشته یێن ژێ دكه‌ڤن؛ وه‌ره ئه‌زمانێ من ببره، یێ درێژبوی، ئێدی راستی ژێ دكه‌ڤن. ده‌رزێن كه‌فتینه گۆیا زه‌مینی، مرۆڤ یێن كون بووین، ل ئه‌سمانی فریشته و ل ئه‌زمانی راستی دكه‌ڤن، بنیره چاوا مه ل هه‌مبه‌ر رسته‌یێن چاڤه‌رص نه‌كری و هه‌ڤدژ دگه‌ل لۆژیكا و زمانێ كلاسیك دادنێت. چاوا ئه‌ڤ گه‌نجه یاریص ب په‌یڤان كریه و ئه‌م هه‌ڤریشی هنگافتنێ كریه، ته‌ماشا بكه چاوا ئه‌زموونا خوه ژ مه‌را ڤه‌دگێریت، چاوا دنێریته جیهانێ و خواندنێن خوه ژێرا دكه‌ت، هه‌لبه‌ستڤان وان دید و نێرین و تێگه‌هشتنا خوه بۆ جیهانێ ژ مه‌را دكه‌ته هێڤێنێ كارێ خۆ یێ ئه‌ده‌بی و ب رێیا چه‌ندین جڤه‌نگ و كۆد و هێما و رسته و وێنه‌یێن هونه‌ری و ده‌مامكان هه‌ول دده‌ت ئه‌و جیهانا هه‌ی هه‌لوه‌شینیت و جاره‌ك دی ب ئالاڤێن خۆ یێن هونه‌ری و ب شێوازه‌كێ جودا ئاڤابكه‌ت. ب ڤی ره‌نگی هه‌لبه‌ستڤان لسه‌ر ده‌سه‌لاتا خوینده‌ڤانێ نه‌رێنی یاخی دبیت، چونكه به‌ره‌ڤاژییا دیدا گشتی كار دكه‌ت، دیدێن خوه ب ئاوایه‌كی هونه‌ری دكه‌ته نێرین د ریتواله‌كێ هه‌لبه‌ستی دا، ئه‌ڤه ژی ئه‌ركه‌كێ قورسه، هه‌لبه‌ستڤان بكاریت ب ڤصره‌كی ڤص ریسكێ بكه‌ت، هه‌لبه‌ت هه‌تا بكاریت ڤی كارێ هونه‌ری ب سه‌ركه‌فتیانه ئه‌نجام بده‌ت، پێدڤییه خودان به‌هره‌یه‌كا زكماكی و فه‌رهه‌نگه‌كا زه‌نگین و هه‌سته‌كا نازك و چانده‌كا كوور و پرۆژه‌یه‌كێ هزری و تێرامانه‌كا نوو بۆ جیهانێ بیت. یان ده‌ما دبێژیت : ئه‌ی عشق.. . نه‌مره، ئه‌ڤ وه‌لاته هه‌می تێرا ڤه‌شارتنا كه‌له‌خێ ته ناكه‌ت، ئه‌ڤ بهایێ مه‌زنێ دایه عیشقێ، ده‌ربرینه ژ قه‌یرانه‌كا مه‌زن كو ئه‌ڤ جیهانه تێدا دبۆریت، ئه‌و قه‌یرانا هه‌لبه‌ستڤان ل دۆر دپه‌یڤیت، قه‌یرانا وه‌ندابوونا نرخ و به‌هایێن روحا لێبورده‌یی و بهه‌ڤرا ژیانێ و یه‌كدی قه‌بولكرنێ یه، دیارده‌كا جیهانی یه سنوورێن گشت ولاتان به‌زاندییه. دیارێ ئه‌ره‌دنی، ته‌ڤ دودلی و ته‌نگژینا خوه یا ده‌روونی و سۆز و هه‌ست و نه‌رازیبوون و ره‌شبینیێن خوه د رسته‌یه‌كێ دا ئاراسته دكه‌ت، ئاماژه‌یێن هاڤیبوونێ و قه‌یرانا مرۆڤێ هوشیارێ ڤی سه‌رده‌می و حه‌زێن وی بۆ بنیاتنانا جیهانه‌كا دی یا ئارام و سه‌قامگیر د ڤێ رسته‌یێ دا كۆم كرینه، داخوازێ ژ عشقێ دكه‌ت نه‌مره، ل ڤێرێ نه‌مری و زیندیبوونا عیشق و خوشه‌ویستییێ د هندرێ خوه دا، هه‌ڤكێشا ژیان دۆستیێ یه، ب دیده‌كا ره‌خنه‌گرانه جیهانا ئه‌ڤرۆ و به‌ها و نرخێن زال ڤه‌دخوینیت. رسته‌یا هه‌لبه‌ستی دكاریت چه‌ندین خویندنان هه‌مبێز بكه‌ت، چه‌ندین ئه‌گه‌ران وه‌ردگریت، ئه‌ڤه ژی دبیته ئه‌گه‌را به‌رفره‌هبوونا ئاسۆیێن هزركرن و تێرامانێ و هه‌روه‌ها بازنه‌یا پشكدارییا خوینده‌ڤان ژی به‌رفره‌ه دبیت. ل دووماهیێ دبێژم، دیارێ ئه‌ره‌دنی ده‌نگه‌كێ نوو و بوێره و دكاریت باندۆرا خوه ل سه‌ر دیمه‌نێ شیعرا كوردی دا بكه‌ت كو داخوازكریه هه‌ر گاڤ كوده‌تایان بكه‌ت و یاخی ببیت لسه‌ر گشت رسته‌یێن به‌رهه‌ڤ و كه‌هی و خوه دووباره نه‌كه‌ت، به‌لكو مینا ته‌ڤ به‌هره‌مه‌ندان د دو دلییه‌كا به‌رهه‌دار دا بلڤیت، هه‌تا بكاریت هه‌ر ده‌م خوه‌دی عه‌قله‌كێ زیندی و هشه‌كێ ئه‌كتیڤ بمینیت، ب ڤارێبوون و لێدان و لادانان رسته‌یێن خوه نۆژه‌نگ بكه‌ته‌ڤه.
