هه‌لبژارتیێ ئیراقێ ل دهۆكێ به‌رهه‌ڤیان بۆ ڤاڤارتنێن كۆپا ئاسیا و مۆندیالا جیهانی دكه‌ت
قەیس وەیس:
ئه‌ڤه بۆ ماوه‌یێ شه‌ش رۆژه هه‌لبژارتیێ ئیراقێ یێ باسكێت بۆلێ كه‌مپێ خوه ل پارێزگه‌ها دهۆكێ دانایه ژبۆ خوە بەرهەڤكرن بۆ ڤاڤارتنێن كۆپا ئاسیا 2025و مۆندیالا جیهانی 2026ێ و سێ یاریزان و راهێنه‌ره‌كێ پارێزگه‌ها دهۆكێ د ناڤ كه‌مپی ئیراقێ دانه ئه‌وا دێ هه‌تا نه‌هی شۆباتا بهێت یا به‌رده‌وامبیت.
د چارچووڤه‌یێ كه‌مپێ راهێنانێ دا ئه‌وا رۆژانه راهێنانێن وان ل هۆلا گرتییا یانه‌یا دهۆك و یانه‌یا سه‌نحاریب دهێنه كرن ب سەرپەرشتیا راهێنەرێ ره‌كه‌ز كرواتی وتیما باسكیچت بۆلا یانەیا زاخۆ میلان نیسێج ودیسان چار یاریزانێن هه‌رێمێ د ناڤ دانه ژوانا هه‌رسێ یاریزانێن پارێزگه‌هێ نه، موراد عەلی و محەمەد محسن ژ یانەیا زاخۆ، فەرید رەعدی خەلكێ دهۆكێ و یانەیا دیفاع ئەلمەدەنی هه‌روه‌سان محەمەد عەبدولخالق خەلكێ هەولێرێ و یانەیا دیفاع ئەلمەدەنی، ژلایه‌كێ دووڤه راهێنه‌رێ زاخۆ یێ گه‌نج جوتیار عه‌لی وه‌كو هاریكارێ دویێ یێ راهێنه‌رێ هه‌لبژارتیێ ئیراقێ پشكداره.
ل دۆر ڤی كه‌مپێ دهۆكێ د داخویانیه‌كێ دا د. خالد نه‌جم جێگرێ دویێ یێ سه‌رۆكێ فیدراسیۆنا باسكێت بۆلا ئیراقێ دیاركر ئه‌ڤ كه‌مپه ل دووڤ به‌رنامه‌كێ رێكخستی و جودا بوویه كو دێ هه‌تا نه‌هێ شۆباتا بهێت ل پارێزگه‌ها دهۆكێ دێ به‌رده‌وام بیت، دووڤدا دێ بەر ب وەلاتێ بەحرەین ب رێكه‌ڤن ژبۆ دانانا كەمپێ ده‌رڤه و ئەنجامدانا دو یاریێن هەڤالینی دگەل هەلبژارتیێ بەحرەین ل18 و 19ێ شوباتا بهێت بەری بكەڤینە د ڤاڤارتنێن هەڤپشك یێن كۆپا ئاسیا و مۆندیالا جیهانی ئەوا دێ ئێكەم یارییا خوە یا كۆما سێیێ ل 23ێ شۆباتا بهێت بەرانبەر سعۆدیێ ل بەغدا كەت، یاریی دویێ ل 26ێ هەمان مەهـ بەرانبەر فلەستینێ ل وەلاتێ ئوردنێ كەت.
