هه‌لكه‌ت ئدریس: هه‌موو چالاكیێن دهۆكێ یێن بووینه قوربانێن فلمه فیسته‌ڤالا سینه‌مایی
ئه‌ڤرۆ، هه‌رهین محه‌مه‌د:
هونه‌رمه‌ندێ شانۆڤان، هه‌لكه‌ت ئدریس د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: دونیایێ هه‌موویێ هونه‌رمه‌ند پلانا خوه ددانیت كا وی چ هه‌یه، به‌لێ گه‌له‌ك یا ب زه‌حمه‌ته ل كوردستانێ شانۆكاره‌ك یان سینه‌ماكاره‌ك پلانا خوه ب دانیت، چونكو ئه‌م یێن د قووناغه‌كا گه‌له‌كا هه‌ستیار دا و نه حوكمه‌ت و نه ژی كه‌رتێ تایبه‌ت دشێت پشته‌ڤانیێ ل شانۆڤانی بكه‌ن بۆ دانا پلانا خوه.
ناڤهاتی گۆت: فیسته‌ڤالا كه‌ركوكێ یا شانۆیێ ده‌ستپێكه‌كا باش بوو و وه‌كو ئه‌ز دبینم فیسته‌ڤال سازیه و نه وه‌زاره‌ت و رێڤه‌به‌ریا ره‌وشه‌نبیری و رێڤه‌به‌ریا هونه‌رێ شانۆیێ یه و فیسته‌ڤال سازیه‌كا سه‌ربه‌خوه‌یه و نه‌مه‌رجه كی پشته‌ڤانیێ لێ بكه‌ت و وێ سازیێ ئاراسته و هزر و پێناسه و ئارمانجا خوه هه‌یه، به‌لێ هه‌تا نوكه نوزانم فیسته‌ڤالا شانۆیێ یا هه‌ولێرێ یا نیڤده‌وله‌تی ئاراسته و ناسناما وێ چیه و هه‌كه ئاراسته‌یێ وێ یێ هزری و ناسناما وێ یا دیارنه بیت هه‌ر سال دێ ب ره‌نگه‌كی بیت و هه‌ر ده‌مێ فیسته‌ڤال ب ره‌نگه‌كی بیت و فیسته‌ڤالێن كوردی گه‌هشتینه ئاسته‌كی بتنێ بهێنه‌كرن، ئانكو ب مه‌رج فیسته‌ڤال بهێته‌كرن و ب مه‌رج ناهێته‌كرن كو ئاراسته و ناسناما وێ یا هزری بهێته پاراستن و ئه‌ڤه خالا لاوازا هه‌موو فیسته‌ڤالێن كوردی یه و ئه‌ڤ چه‌نده وه دكه‌ت ژ كوالتیا هه‌موو فیسته‌ڤالان بینیته خوارێ.
ناڤهاتی ل دۆر نووترین كارێ خوه یێ هونه‌ری گۆت: نوكه كار ل سه‌ر شانۆیه‌كا ئه‌مریكی دكه‌م ب ناڤێ (دوازده زه‌لامێن توره) كو ژ نڤیسینا (ریچ ناو پروس) كو ئه‌ڤ شانۆیه ل سالا 1958 بوویه فلم ژی كو ژ فلمێن كلاسیكی یێن ب ناڤوده‌نگه و ئه‌ڤه چه‌ند هه‌یڤه ئاماده‌كاریێ بۆ ڤێ شانۆیێ دكه‌م و كارێ دووێ ل پێشیا من فیسته‌ڤالا (سه‌قز) ل رۆژهه‌لاتێ كوردستانێ كو فیسته‌ڤاله‌كا كوردیه ل سه‌ر ئاستێ هه‌ر چار پارچێن كوردستانێ و د ڤێ فیسته‌ڤالێ دا من سمیناره‌ك هه‌یه بناڤێ (ره‌گه‌زێن ئه‌رستوی دمه‌مۆزینا ئه‌حمه‌دێ خانی دا) .
هلكه‌تی زێده‌تر گۆت: ده‌نگویێ شانۆیا مه ل هه‌موو میدیا كوردی و یا بیانی و تورێن جڤاكی هاته به‌حسكرن و سوپاسیا وی ستافێ ل گه‌ل من كاركری و پشته‌ڤانی و هاریكاریا من كری دكه‌م، شانۆیا مه پتری ده‌ه باژێران هاته نیشادان و نیشادانا ئێكێ ل كه‌ركوكێ بوو بینه‌ره‌كێ مه‌زن هه‌بوو و هه‌ردیسان ل دهۆكێ بۆ ده‌مێ دو رۆژان هاته نیشان دان و بنه‌ره‌كێ مه‌زن هه‌بوو هه‌تا كو ب مخابنی ڤه گه‌له‌ك كه‌س نه‌شیان بهێن جهێ وان دهۆلا شانۆیێ ڤه نه‌كر و ل سلێمانیێ بۆ من وه‌كو سپرایزه‌كێ بوو گه‌له‌ك كه‌سا هاتنه پێش و هه‌روه‌سا ل جهێن دی ژی بینه‌رێ خوه هه‌بوو و تشتێ هه‌ره باش ئه‌و بۆ په‌یاما وێ شانۆیێ گه‌هشت و ئه‌و بۆ جارا ئێكێ بۆ ئه‌ز ل گه‌ل قوتابیان كاره‌كی دكه‌م.
ئه‌و چه‌نده ژی گۆت: هه‌موو چالاكیێن پارێزگه‌ها دهۆكێ بووینه قوربانێن فلمه فیسته‌ڤالا دهۆكێ و فلمه فیسته‌ڤالا دهۆكێ كاره‌كێ مه‌زن و ل ئاسته‌كێ باش دهێته‌كرن و بۆ ده‌مێ چه‌ند سالان ژی پشكداربوویمه و گرنگه ئه‌ڤ فیسته‌ڤاله بهێته‌كرن، به‌لێ ل دهۆكێ وه‌لێهاتیه فیسته‌ڤالا سینه‌مایێ هه‌یه و یاشانۆیێ نینه و هه‌تا راده‌كی حوكمه‌ت بۆدجێ بۆ فیسته‌ڤالا سینه‌مایێ دمه‌زێخیت و دڤێت چو فیسته‌ڤالێن دی نه‌بن و هه‌تا كو ئه‌و چالاكیێن مه یێن سالێن بوری ژی هاتینه‌كرن وه‌كو رۆژانێن شانۆیا ئامه‌دێ ل دهۆكێ و مخابنی ڤه ئه‌ڤ چالاكیه ژی نه‌ماینه.
ل دووماهیێ هه‌لكه‌تی گۆت ژی: ئه‌و سیسته‌مێ نوكه په‌یمانگه‌ه و كولیژا هونه‌رێن جوان ل سه‌ر دچیت سیسته‌مه‌كێ كه‌ڤنه و هه‌ر ژده‌سپێكا سه‌رهلدانا په‌یمانگه‌هێ ل عیراقێ كو ل سالێن شێستان بوویه و ئه‌و تشتێ ل وی ده‌می هاتیه ده‌ستنیشانكرن وه‌كو سیسته‌م و ڤه‌كۆلینا شانۆیێ و تیوری و ئه‌ڤ چه‌نده وێ دگه‌هیننت دێ شانۆیه‌كا كه‌ڤن به‌رهه‌م ئینت و ئێكه‌م پێنگاڤ ئه‌وه دڤێت ئه‌ڤ سیسته‌مه بهێته گوهۆڕین و كه‌سانێن شاره‌زا دوارێ شانۆیێ دا بهێن و پرتووكێن بیانی بینن و ئه‌ڤ پرتووكێن عه‌ره‌بی یێن نوكه ل به‌رده‌ستێ مه پتریا وان دشاشن و شاره‌زایێن بیانی دوارێ شانۆیێ دا تێبینی ل سه‌ر هه‌نه و نموونه ژوێ چه‌ندێ كۆلیژا شانۆیێ ل ئه‌نقه‌ره كه‌سانێن بسپور ل وێ كۆلیژێ هه‌نه و دشێن مفای ژوان بینین بۆ دانانا سیسته‌مه‌كێ مودرێن بۆ شانۆیێ و دیسان مه ل وه‌لاتێ ئیرانێ ژی هه‌نه وه‌كو قودبه‌دین سادقی باشتریت ده‌رهێنه رو تیورسێ كورده ل رۆژهه‌لاتا ناڤه‌راست، ئانكو مه كوردان ژی ناڤێن مه‌زن دشانۆیێ دا هه‌نه.
