هه‌لكه‌وت زاهر حه‌ز دكه‌ت ل ده‌نگێن نوو بگه‌ڕیێت
ئه‌ڤرۆ، كاوین جیهاد ته‌حلاڤی:
هونه‌رمه‌ندێ ئاوازدانه‌ر هه‌لكه‌وت زاهر گه‌له‌ك جاران به‌حس ل وێ چه‌ندێ دكه‌ت كو ره‌خنه ل وی دهێنه‌كرن، ژ به‌ر لێگه‌ڕیانا وی بۆ سترانبێژێن به‌هدینان یا كێمه و وه‌كو پێدڤی دگه‌ل وان كار نه‌كریه، ده‌رباره‌یی ڤێ چه‌ندێ ناڤهاتی دبێژیت ئه‌و حه‌ز دكه‌ت ل ده‌نگێن نوو بگه‌ڕیێت و وی چو ده‌نگێن نوی یێن ل دووڤ دلێ خوه نه دیتینه.
ناڤهاتی زێده‌تر بۆ لاپه‌رێ هونه‌ری یێ رۆژناما ئه‌ڤرۆ دبێژیت: هه‌ر چه‌نده من دگه‌ل هونه‌رمه‌ندێن گه‌له‌ك ناڤدار یێن ده‌ڤه‌را به‌هدینان كاركریه و یێن نوو ژی دوو كه‌سێن گه‌له‌ك زیره‌ك و خودان شیانن ب ناڤێ، ئیله‌یدا و ئه‌دنان ته‌یمورن كو خه‌لكێ دهۆكێ یه و پاشه‌رۆژه‌كا باش ل به‌ر سنگێ وان هه‌یه و لێگه‌ڕیان و هاتنا من و بۆ دهۆكێ و ده‌ڤه‌را به‌هدینان گه‌له‌ك یا باشه و حه‌ز دكه‌م پتر ل ده‌نگێن نوو بگه‌رم داكو ببیته شانازی بۆ ده‌ڤه‌رێ ب گشتی. هه‌لكه‌وت زاهری ئه‌و ژی دیاركر كو ل ده‌ف وی هونه‌رمه‌ند عه‌بدولقه‌هار زاخۆیی ستێرا كوردستانێ یه و دشێم بێژم قه‌هار ئێكه ژ ستێرێن هه‌ری مه‌زن د مێژوویا هونه‌رێ كوردی دا. ده‌رباره‌ی وێ چه‌ندێ كو ئه‌و هاتیه هه‌لبژارتن بۆ چێكرنا سرۆدا نیشتیمانی یا عیراقێ ناڤهاتی دیاكر كو هه‌تا نوكه ب تنێ ئه‌و و هونه‌رمه‌ندێ عیراقی كازم ساهر هاتینه هه‌لبژارتن كو وێ سرودێ دروستبكه‌ن، لێ ل ده‌مه‌كێ نێزیك ئه‌و چه‌نده ژی دێ دناڤ به‌را مه دا هێته ئێكلایكرن كا كی دێ دروستكه‌ت.
