هه‌لوه‌ستێ بریتانیا دبیته جهێ دلگرانیا ئوكرانیا
ئه‌ڤرۆ:
وه‌زاره‌تا به‌رگریێ یا بریتانیا راگه‌هاند كو ئه‌و ژ ره‌وشا نها ل ئوكرانیا دگرانن و ژ نێزیكڤه دووڤچوونا ئالۆزیێن د ناڤبه‌را رۆسیا و ئوكرانیا دا دكه‌ن، لێ هه‌كه رۆسیا ئوكرانیا داگیر بكه‌ت ئه‌و نه‌شێن هێزێن سه‌ربازی بۆ شه‌رێ ل گه‌ل رۆسیا ره‌وانه‌ی ئوكرانیا بكه‌ن، چونكو ئه‌و یه‌ك دێ ئورۆپا ب گشتی تووشی كاره‌ساته‌كا مه‌زن كه‌ت.
پشتی هه‌لوه‌ستێ وه‌زاره‌تا به‌رگریێ یا بریتانیا به‌رپرسه‌كێ وه‌زاره‌تا ده‌رڤه یا ئوكرانیا ژی دلگرانیا خوه ل هه‌مبه‌ر هه‌لوه‌ستێ وه‌زاره‌تا به‌رگریێ یا بریتانیا دیار كر و راگه‌هاند كو رۆسیا ژ نێزیكڤه دووڤچوونا ره‌وشا نها دكه‌ت و بێگومان رۆسیا دڤێت بزانیت كا دێ هه‌لوه‌ستێ وه‌لاتێن ئورۆپا چ بیت، هه‌لوه‌ستێ وه‌زاره‌تا به‌رگریێ یا بریتانیا جهێ دلگرانیێ یه و ئه‌م هێڤیدارین كو ئه‌و تنێ هه‌لوه‌ستێ وه‌زیری به‌رگریێ بیت، چونكو هه‌ر مه‌ترسیه‌ك ل سه‌ر ئوكرانیا دروست بیت دێ كارتێكرنا خوه ل هه‌موو وه‌لاتێن ئه‌ندامێن ناتۆ و وه‌لاتێن ئورۆپا كه‌ت، ژ به‌ر هندێ ژی دڤێت ئێكه‌تیا ئورۆپا و وه‌لاتێن ئه‌ندامێن ناتۆ ل هه‌مبه‌ر بزاڤێن رۆسیا یێن بۆ داگیركرنا ئوكرانیا بێده‌نگ نه‌مینن و دڤێت هه‌لوه‌ستێ وان ل هه‌مبه‌ر رۆسیا توند بیت.
ئه‌و یه‌ك د ده‌مه‌كێ دایه كو هه‌تا نها چه‌ندین جاران پۆتین و وه‌زیرێ ده‌رڤه یێ رۆسیا دیار كرینه كو چو پیلانێن رۆسیا بۆ داگیركرنا ئوكرانیا نینن، به‌لكو ئه‌مریكا و وه‌لاتێن ناتۆ بابه‌تێ ئوكرانیا بۆ به‌رژوه‌ندیێن خوه بكار دئینن و وان دڤێت بنگه‌هێن سه‌ربازی ل نێزیكی سنورێ رۆسیا دروست بكه‌ن كو ئه‌و یه‌ك ژی ب چو ره‌نگه‌كێ ناهێته قه‌بوولكرن و دڤێت ئوكرانیا رێ نه‌ده‌ت ئه‌مریكا و وه‌لاتێن ئه‌ندامێن ناتۆ بنگه‌هێن سه‌ربازی ل سه‌ر ئاخا وان و نێزیكی سنۆرێ رۆسیا دروست بكه‌ن، چونكو ئه‌و یه‌ك دێ مه‌ترسیه‌كا خوه یا گه‌له‌ك مه‌زن بۆ ئاسایشا رۆسیا هه‌بیت و رۆسیا ل هه‌مبه‌ر كاره‌كێ وه‌سا ب مه‌ترسی بێ هه‌لوه‌ست نابیت و هه‌ر روودانه‌ك ژی روو بده‌ت ئوكرانیا ژێ به‌رپرسه.
