هه‌لویست دیاركرن ب تنێ به‌س نینه!!
د سیسته‌مێ گلۆبالیزمێ دا كو ئه‌ڤرۆ ل جیهانێ بالا ده‌سته، جهێ نه‌ژادپه‌ره‌ستی، دكتاتۆری و بن پێكرنا مافێن مرۆڤی نینه و جیهان بوویه گونده‌كێ بچووك و هه‌ر روودانه‌ك ل هه‌ر جهێ ڤێ جیهانێ روو بده‌ت، باندۆرێ ل گشت جیهانێ دكه‌ت و كارڤه‌دانان ب خوه‌را دینیت.
هه‌ر رژێمه‌ك یان گرۆپه‌ك یان پارتیه‌ك ژ ده‌رڤه‌ی ڤی سیسته‌می رێكه‌كا تایبه‌ت یان نه‌قۆلیا بكه‌ت، ئه‌سته‌مه بكارت خوه ل به‌ر سوولاڤا ره‌خنه و هه‌لویستێن پارێزڤانێن سیسته‌مێ گلۆبالیزمێ بگریت. ب ره‌نگه‌ك دن گلۆبالیزمێ دووماهیك ب سه‌رده‌مێ دیكتاتۆری، نه‌ژادپه‌ره‌ستی و بن پێكرنا مافێن مرۆڤی ئینا، كو بێ پێژن ژ لایێ نه‌ژادپه‌رسه‌ت و رژێمێن دیكتاۆر ل سه‌رده‌مێن بۆری دهاته كرن.
خوه گونجاندن دگه‌ل ڤی سیسته‌می مه‌رجێ ئارامی و ته‌ناهیا هه‌ر وه‌لاته‌كى یه و به‌رۆڤاژیا ڤێ چه‌ندێ ژی چ ئارامی و ته‌ناهیا جڤاكی ل وان وه‌لاتان به‌رجه‌سته نابیت و د ناڤ مالباتا جیهانی دا دبنه رژێمێن یاخی و تڕۆ. نموونێن ڤان وه‌لاتان دزۆرن و هه‌ر بۆ نموونه: سۆڤیه‌تا به‌رێ و رۆسیا نوكه، سووریا، ئیران، عیراق، كوریا باكوور، بارا پترا وه‌لاتێن عه‌ره‌بی و ئه‌فریكی و نوكه توركیا ژی گه‌هه‌شته ڤی كاروانی.
ئه‌ڤا ئه‌ڤرۆ ل توركیا روو دده‌ت بۆ شرۆڤه‌كار و جڤاكناسان تشته‌كێ چاڤه‌ركری بوو، چونكی نیڤشكێ دیرۆكێ وێ یه‌كێ نیشا مه دده‌ت كو پیگێرێن ئایدۆلۆجیێن هشكباوه‌ر ئه‌ڤجا ب هه‌ر ناڤێكێ ئۆلی بن یان ژی ئه‌تاییستی (ئایدۆلۆجیێن باوه‌ریێ ب چ ئۆلان نائینن) ل داویێ دبنه دكتاتۆر و جیهان بینیا خوه ب دارێ كۆته‌كێ ل سه‌ر جڤاكی دده‌ن سه‌پاندن و هه‌ر كه‌سێ باوه‌ری ب ڤی ره‌وتی نه ئینا هینگێ ب خائین و تێكده‌ر دهێته ناڤكرن.
ژبه‌ر ڤێ چه‌ندێ یه ل پرانیا وه‌لاتێن لیبرال و دیمۆكراتیك، پارت و گرۆپێن نه‌ژادپه‌ره‌ست و ئایینی ب قانوون هاتنه قه‌ده‌غه كرن، چنكی ئه‌ڤ هه‌ردو باسكه دژی دیمكۆراتیێ و مافێن مرۆڤینه.
نه ڤه‌شارتیه كو ئه‌ردۆگان و ئاكه‌په سه‌ر ب ره‌وتا ئیسلاما سیاسینه و ل گۆره‌ی وێ ئایدۆلۆجیێ كار دكه‌ن و د هه‌مان ده‌م دا نه‌ژادپه‌رستن؛ به‌رده‌وام بزاڤێ دكه‌ن هیمێن علمانیا ده‌وله‌تا توركی ژبن ببه‌ن و د شه‌ره‌كێ مه‌زن دانه ل گه‌ل هه‌موو مرۆڤێن ده‌مۆكرات و لیبرال و ب تایبه‌ت ل گه‌ل هه‌ده‌پێ كو وه‌ك سنگره دبینیت بۆ چه‌سپاندنا ب ئیسلامیكرنا جڤاكێ توركیا و ژبلی كو هه‌ده‌په شیایه باكورێ كوردستانێ ژ بن باندۆرا ئیسلاما سیاسی ده‌ربێخیت و به‌رێ گه‌لێ كوردستانێ بده‌ت خوه‌سته‌كێن وی یێن سیاسی و جڤاكی.
بۆ سه‌پاندنا ئه‌جندا خوه ئه‌ردۆگانی هه‌موو رێكێن قانوونی و نه قانوونی دانه خه‌بتاندن دا رێكێ ل به‌ر لیبرال و بزاڤا كوردی بگریت و ب تایبه‌ت جامێ غه‌زه‌با خوه دارێته سه‌ر هه‌ده‌پێ ب تۆمه‌تێن دروستكری وه‌ك: پشته‌ڤانیا تیرۆرێ، جوداخازی و چه‌ندین تۆمه‌تێن بێ بنه‌مایێن دن. ب ڤێ ره‌ش گرتنا ئه‌ندامێن په‌رله‌مانی و ب تایبه‌تی ده‌رمیرتاش و فیدان یۆكسه‌كداخێ، هه‌موو سنوور هاتنه به‌زاندن و ئێدی ژیانا په‌رله‌مانتاری به‌ره‌ف هندێ دچیت كو ئێدی ئه‌ردۆگان بێ گرفت بكه‌ت هیمێن ئه‌لمانیا ده‌وله‌تا توركی بۆ هه‌تا هه‌تایێ بگوهۆریت، ئه‌ڤه ژی مه‌زنترین مه‌ترسیه بۆ ئاشتی و ئارامیا جیهانێ.
ب سایا ڤێ سیاسه‌تا تاكره‌وانیا حكوومه‌تا ئاكه‌پێ توركیا بوویه زیندانه‌كا مه‌زن بۆ رۆژنامه‌ڤان، لیبرال و هه‌موو لایه‌نگرێن دیمۆكراتیێ و مافێن مرۆڤی؛ ژبلی كو توركیا هێلایه بێ هه‌ڤال و كه‌فتیه به‌ر شێلكا ره‌خنه‌یێن هه‌موو رۆژئاڤا و ب تایبه‌ت ئه‌لمانیا كو خوه‌دی په‌یوه‌ندیێن گه‌له‌ك كه‌ڤنن، ئه‌ڤه ژی دێ ره‌وشا سیاسیا توركیا به‌ر به‌لقان بوونێ ببه‌ت.
ب سایا ڤێ سیاسه‌تا ئاكه‌پێ پرۆسه‌سا دیمۆكراتیێ ل توركیایا به‌ره‌ف نه‌مانێ دچیت و رۆژئاڤا ب ساناهی ناهێلن توركیا به‌ره‌ف ڤی سه‌متێ بچیت، ژبه‌ر گه‌له‌ك ئه‌گه‌ران یا ژ هه‌موویان گرنگتر سنوورێ وێ یێ جوگرافیه دگه‌ل ئورۆپا و رۆسیا، و درێژیا سنوورێ وێ یێ ئاڤیه كو دبیته كلیلا ئێمناهیا ده‌ریا سپی. بۆ راگرتنا توركیا كو زێده‌تر به‌ره‌ف دیكتاتۆریێ نه‌چیت، ل ده‌مه‌ك نێزیك ئورۆپا دێ ره‌مپا گۆیا ئابووری ل سه‌ر توركیا ده‌ینن.
هه‌رده‌ما ئه‌مبارگۆیا ئابووری ل سه‌ر توركیا هاته دانان، وی ده‌می دێ باندۆره‌كا گه‌له‌كا نێگه‌تیڤ ل سه‌ر هه‌رێما كوردستانێ هێلیت چونكی نه‌یا ڤه‌شارتیه هه‌رێم د كریزه‌كا كوورا ئابووری دا دژیت و هه‌ر كریزه‌كا ل توركیا روو بده‌ت ئێكسه‌ر دێ باندۆرا خوه ل هه‌رێمێ كه‌ت.
ده‌م هاتیه حكوومه‌تا هه‌رێمێ ل چاره رێكان بگه‌رهیت نه‌ك به‌یاننامان ده‌ربێخیت و ئاراستێ نه‌خشێ ئابووری بگوهۆریت، هه‌روه‌كو جه‌م ئۆزده‌میرێ سه‌رۆكێ پارتیا كه‌سكان ل ئه‌لمانیا گۆتی: ئه‌مبارۆیا ئابووری نه‌ك به‌یاننامێن نه‌رازیێ دێ چۆكا ل ئه‌ردۆگانی فشینن!!
