هه‌لوێسته‌كێ نه‌ته‌وی یــه
ململانیێه‌كا بهێز و هه‌ڤركیه‌كا مه‌زنه رۆژهه‌لاتا ناڤین ل عیراقێ و سوریێ دبینیت و هێزێن مه‌زنێن توركیا و رووسیا و ئیران و بریتانیا و ئه‌مریكا و فره‌نسا له‌شكر و فرۆكێن خو لێ ئاماده‌كرین و هه‌رده‌مێ شه‌ره‌ك ژ ڤێ ململانا مه‌ترسیدا دروست ببیت پتری یا هه‌ره پترا وێ دێ ل سه‌ر ئاخا كوردستانێ بیت. كورد د ڤێ ره‌وشێ دا پرت و به‌لاڤه‌ییه‌كا مه‌زن و مه‌ترسیدار ل سه‌ر دیاره و بریارا وان ژی ژێك پرت و به‌لاڤه‌یه و هند مه‌ترسیا ده‌رڤه ل سه‌ر كوردان نینه، هندی مه‌ترسیا ناڤخۆییا كوردی – كوردی ل سه‌ر كوردستانێ و پاشه‌رۆژ و چاره‌نڤیسێ وێ هه‌یه و د ڤی ده‌راڤیدا و ب ڤی شێوێ هه‌یی كورد دێ مه‌زنترین زیانبه‌خشێن هه‌ر شه‌ره‌كێ مه‌زن بن. له‌و گرنگه به‌ری هه‌ر پێشهاته‌كێ كورد ناڤا خوه زه‌لال بكه‌ن و بگه‌هنه چاره‌یه‌كێ و ل سه‌ر رێبه‌ری و ده‌ستهه‌لات و ل سه‌ر بریاره‌كا هه‌ڤگر خرڤه‌ببن به‌ری هه‌ر تشته‌ك رووبده‌ت؛ چنكو هه‌ر سه‌ركه‌فتن و بنكه‌فتنه‌كا ل ده‌ڤه‌رێ دروست ببیت و كورد یێن ژێك دوور دێ بنكه‌فتی یێن مسۆگه‌ر بن. هه‌لوێستێ ڤێ دووماهیێ یێ سكرتێرێ گشتیێ پارتیا شوسیالیستا كوردستانێ یێ پشته‌ڤانیكرنا سه‌رۆكێ هه‌رێما كوردستانێ هه‌لوێسته‌كێ مه‌زنێ نه‌ته‌وی یه و ئه‌ركه‌كێ گرنگه بۆ پاراستنا به‌رژه‌وه‌ندیا بلندا كوردستانێ هه‌موو لایه‌ن پێ رازی ببن و ب رێكا ڤێ پشته‌ڤانیێ دوو خالێن گرنگ ب سه‌لمینن ئێك خرڤه‌كرنا شیان و هێزا كوردان و مفا وه‌رگرتن ژ تێكچوونا هه‌ر به‌لانسه‌كێ و دوو مفا وه‌رگرتن ژ پشته‌ڤانیا جیهانێ ب تایبه‌ت ئه‌وروپا و ئه‌مریكا بۆ كێشا كوردان، نه‌خاسم كو نوكه دوو به‌ره‌كی یا ئاشكرایه و كورد ل سه‌ر هه‌ردوو به‌ره‌یێن رووسیا – ئه‌مریكا بۆینه دوو جوون و ئه‌ڤه بخوه مه‌زنترین شاشی یه كورد د ڤێ قووناغێ دا دكه‌ن و تاوانه‌كه مێژوو ل مه نابۆریت، ژ به‌ركو چ به‌ره سه‌ركه‌ڤیت كورد دگه‌ل نابن ئه‌ڤه ئه‌گه‌ر لایه‌نه‌ك سه‌ركه‌فتی و سه‌رفراز ژێ ده‌ركه‌ڤیت. ئه‌گه‌ر ڤه‌گه‌رینه مێژوویێ ژی دێ خۆیا بیت كو گشت ملله‌تێن ب سه‌ربخۆییێ شاد بووین وان خوه دایه دگه‌ل رێبه‌ره‌كی و ئه‌و ملله‌ت هه‌می كه‌فتیه د به‌ره‌یه‌كی دا و دگه‌ل سه‌ركه‌فتنا وی به‌ره‌یی وه‌لاتێن خوه پێ ئاڤاكرینه و بووینه ده‌وله‌ت. ب ڤێ دژایه‌تیا د ناڤ كوردان دا هه‌یی و ب ڤان پێشهاتێن هۆشداریه‌كا خرابا شه‌ره‌كێ مه‌زن دده‌ن و كورد دێ هه‌ر زیانبه‌خش و شكه‌ستی مینن و وانه مه دڤێت كورد وه‌ك ملله‌ت و لایه‌نێن سیاسی باش بخوونن دا پاشه‌رۆژا خوه ل سه‌ر ئاڤاكه‌ن.
