هه‌موو مرۆڤ چێكریێن خودێ نه
ئه‌ڤرۆ، دلڤین ره‌شید:
ماموستایه‌كێ ئایینی دیار كر كو هنده‌ك جاران ئه‌م خه‌له‌ت د رێزگرتنێ دگه‌هین، رامانا وێ ئه‌و نینه هه‌كه كه‌سه‌ك نڤێژی نه‌كه‌ت یان رۆژیێ نه‌گریت ئه‌ڤه بێ رێزیه ل هه‌مبه‌ری كه‌سێن نڤێژكه‌ر و رۆژیگر و گوت: گرتنا خوارنگه‌ه و دكانا د مه‌ها ره‌مه‌زانێ دا سه‌رپێچیا فه‌رمانێن قورئانێ یه.
مه‌لا ئه‌نوه‌ر كانیا باسكی شاره‌زا د هزرا ئایینێ ئیسلامێ دا بۆ ئه‌ڤرۆ دیار كر، پێدڤیه د مه‌ها ره‌مه‌زانا پیرۆزدا رێز ل هه‌موو مرۆڤ و ئایینان بهێته گرتن، چونكی قورئانا پیرۆز د ڤێ هه‌یڤێ دا یا هاتیه خار و رێنیشانده‌ره بۆ هه‌موو مرۆڤان و گۆت: (ماده‌م قورئان رێنیشانده‌ره دڤێت ئه‌م ژی هاریكار و رێخوشكه‌ر بین بۆ مرۆڤایه‌تیێ، چونكی قورئانا پیرۆز ئاماژه ب وێ یه‌كی كریه كو چ جیاوازی دناڤبه‌را مرۆڤاندا نینه هه‌موو چێكریێن خودێ نه و ژ ئاده‌می په‌یدا بوینه و ئاده‌م ژی ژ ئاخێ په‌یدا بویه).
مه‌لا ئه‌نوه‌ر كانیا باسكی دا زانین كو د په‌رتوكێن مه یێن فقهی دا هاتیه هه‌موو مرۆڤان مافێ ژیانێ و ئازادیێ هه‌یه، به‌لێ هنده‌ك جاران ئه‌م خه‌له‌ت د رێزگرتنێ دگه‌هین، رامانا وێ ئه‌و نینه هه‌كه كه‌سه‌ك نڤێژی نه‌كه‌ت یان رۆژیێ نه‌گریت ئه‌ڤه بێ رێزیه ل هه‌مبه‌ری كه‌سێن نڤێژكه‌ر و رۆژیگر و گوت: (گرتنا خوارنگه‌ه و دكانا د مه‌ها ره‌مه‌زانێ دا، ئه‌ڤه بخۆ سه‌رپێچیا فه‌رمانێن قورئانێ یه، هه‌كه مه هه‌موو ده‌رگه‌ه ل هه‌مبه‌ری كه‌سانێن نه موسلمان گرتن یان كه‌سێن بێ رۆژی ئه‌ڤه بێ رێزیه ل هه‌مبه‌ر مافێ وی و بن پێكرنا فه‌رمانا خۆدێ یه، له‌ورا یا گرنگه موسلمان و دیانه‌تێن دی د ڤێ مه‌ها پیروزدا رێزێ ل ئێكدو بگرن و پێكڤه ژیانێ ب هێزتر لێ بكه‌ن) .
جه‌عفه‌ر سمۆ رێڤه‌به‌رێ كاروبارێن ئێزدیان ل دهوكێ بۆ ئه‌ڤرۆ دیار كر رێزگرتن خاله‌كا گه‌له‌ك بهێزه د ئه‌ده‌بێ دینێ ئێزدیان دا و فه‌لسه‌فا دینێ ئێزدیان ژی به‌حس ل ڤێ چه‌ندێ كریه و گۆت: (د بیاڤه‌كێ دی یێ گه‌له‌ك گرنگ دا كو ئه‌ده‌بێ دینێ ئێزدیان ته‌كه‌زێ لێ دكه‌ت رێزگرتنه ل ئاینێن به‌رامبه‌ر و رێزگرتن ل پێغه‌مبه‌رێن خۆدێ ئه‌ڤ چه‌نده ژی د سه‌به‌قێن قه‌ولێن ئێزدیان دا هاتیه دیار كرن (په‌دشێ من ره‌بێ سه‌مه‌ده ره‌بێ عیسا و موسا و محه‌مه‌ده هه‌موا ژێرا بریه سجوده‌ته)، ئانكو پێغه‌مبه‌رێن خۆدێ خودان رێزگرتنه‌كا مه‌زنن ل جه‌م خۆدێ، له‌ورا فه‌ره ل سه‌ر ئێزدیان رێزێ ل دیانه‌تێن به‌رامبه‌ر بگرن، چونكی میته‌لوژیا دینێ ئێزدیان ل سه‌ر بنه‌مایێ ئاشتی خازیێ هاتیه ئاڤاكرن).
سمو دیار كر ژی كو ئێزدی ب چاڤه‌كێ مه‌زن به‌رێ خوه دده‌نه رێو ره‌سمین ئولی یێن هه‌ر دیانه‌ته‌كێ، ئه‌ڤ چه‌نده ژی د تێكسته‌كا ئۆلا ئێزدیان دا دیار دبیت كا چاوا ئه‌م خودایێ خوه د حه‌بینین هوسا مه باوه‌ری یا هه‌ی دیانه‌تێن دی ژی خودایێ خوه د حه‌بینن به‌لێ هه‌ر ئێك ب ره‌نگه‌كی، تێكستێ ئۆلا ئێزدیان دبێژت (چ دونیایه‌كا ره‌نگینه یا تژیه ژ قه‌وم و مه‌زهه‌ب و دینا به‌لێ هه‌ركه‌سه‌ك بزار و زمانێ خوه خوه‌دێ خوه دحه‌بینه) و گۆت: (ژبه‌رهندێ ژی رێزگرتن گه‌له‌كا فه‌ره ب تایبه‌ت د مه‌ها ره‌مه‌زانێ دا كو پرانیا پێكهاتێن كوردستانێ د ڤێ ئاخێ دا دژین، ئه‌ڤجا پێدڤیه ل ل هه‌موو رێو ره‌سما رێزه‌كا مه‌زن ل بیروباوه‌رێن به‌رامبه‌ر بگرین).
هه‌یسه‌م په‌تروس سه‌روكێ یانا نوهه‌درا یا ره‌وشه‌نبیری و جڤاكی بو ئه‌ڤرۆ گۆت: (ئه‌م وه‌ك مه‌سیحیێن دهوكێ هه‌ر ژكه‌ڤندا هه‌تا نوكه رێزگرتنه‌كا تایبه‌ت ل برایێن خوه یێن موسلمان دگرین ب تایبه‌ت ل مه‌ها ره‌مه‌زانێ، گه‌له‌ك جاران وه‌ك رێزگرتن ل هه‌مبه‌ری برایێن خوه یێن رۆژیگر ئه‌م چ ناخوین و ڤه‌خۆین، به‌لێ ئێك ژ كێماسیان د مه‌ها ره‌مه‌زانێ دا پرانیا خوارنگه‌ه و دكانان دهێنه گرتن ئه‌ڤێ ژی كارتێكرن هه‌یه ل سه‌ر مافێ دیانه‌تێن دیتر هه‌یه).
هه‌یسه‌م گۆتژی: (د ڤان چه‌ند رۆژێن بهێت دا مه مه‌سیحیا چالاكیه‌كا مه‌زن هه‌یه‌و سه‌دان ره‌وشنبیر دێ ژ ده‌رڤه‌ی وه‌لاتی هێنه پارێزگه‌ها دهوكێ بۆ پشكداری كرنێ د وێ چالاكی دا، ل ڤیره ئه‌م شه‌رمێ ژ خوه دكه‌ین نه‌شێین مێهڤان كه‌ینه چ خوارنگه‌هان، چونكی دگرتینه).
هه‌یسه‌م د ئاخفتنا خوه یا دووماهیێ دا گۆت: (ئه‌م داخوازێ ژ لایه‌نێنن په‌یوه‌ندیدار دكه‌ین ڤی بابه‌تی به‌رچاڤ وه‌ربگرن، چونكی كوردستان جهێ هه‌موو پێكهاتایه و ب ڤان پێكهاتان یا جوانه).
