هه‌موو مه‌زارگه‌هێن ئێزدیان یێن داعشێ په‌قاندین دهێنه ئاڤاكرن
دهۆك، له‌زگین جوقی:
رێڤه‌به‌رێ كاروبارێن ئێزدیان ل دهۆكێ دیار كر، تیرۆرستێن داعش سالا 2014 ده‌ست ب هه‌لوه‌شاندن و ژناڤبرنا مه‌زارگه‌هێن ئێزدیان كر و دبێژیت: 68 مه‌زارگه‌هێن ئێزدیان ژلایێ تیرۆرستێن داعشێ ڤه هاتنه خرابكرن و ژناڤبرن كو پتریا وان ل ده‌ڤه‌را باشیك و به‌حزانێ و قه‌زا شنگالێ بوون، هنده‌ك ژی ل كۆمه‌لگه‌ها بابیرێ بوون، نوكه دوباره ئه‌و هه‌موو مه‌زارگه‌هه هاتینه ئاڤاكرن.
جه‌عفه‌ر سمۆ، رێڤه‌به‌رێ كاروبارێن ئێزدیان ل دهۆكێ یا سه‌ر ب رێڤه‌به‌ریا گشتی یا كاروبارێن ئێزدیان ل وه‌زاره‌تا ئه‌وقاف و كاروبارێن ئایینی یا حوكمه‌تا هه‌رێما كوردستانێ بۆ رۆژناما ئه‌ڤرۆ ئاشكرا كر، پشتی هێزێن پێشمه‌رگێ كوردستانێ ده‌ڤه‌رێن ئێزدیان ژ بن ده‌ستێ تیرۆرستێن داعشێ رزگاركرین، ب تایبه‌تی ژی كۆمه‌لگه‌ها بابیرێ و باشیك و به‌حزانێ خه‌لكێ وان ده‌ڤه‌ران ڤه‌گه‌ڕیانه سه‌ر مالێن خوه و گۆت: “ئه‌و مه‌زارگه‌هێن ژ لایێ تیرۆرستێن داعشێ ڤه هاتینه ژناڤبرن، خه‌لكێ ئێزدی دوباره ئاڤاكرن، چونكو حكومه‌تا عیراقێ چو بزاڤ بۆ ئاڤاكرنا وان مه‌زارگه‌هان نه‌كرن و چو جاران ژی هه‌ست نه‌كریه ئێزدی پشكه‌كن پێكهاتێن عیراقێ، هه‌تا چو جاران شنگال وه‌كو ده‌ڤه‌رداریه‌كا عیراقێ نه‌هه‌ژمارتیه یان باشیك و به‌حزانێ ناوچه‌داریه و تایبه‌تمه‌ندیا خوه ل نك ئێزدیان هه‌یه، ژ به‌ر ڤێ چه‌ندێ خه‌لكێ مه ژ حكومه‌تا عیراقێ بێ ئومێد بوون، له‌ورا ژی خێرخواز و ده‌وله‌مه‌ندێن وان ده‌ڤه‌ران هه‌موو مه‌زارگه‌هێن هاتینه په‌قاندن دوباره ئاڤاكرن”.
جه‌عفه‌ر سمۆ خویا ژی كر كو تیرۆرستێن داعشێ هه‌موو زانیاری ل سه‌ر سرۆشتێ ئێزدیان هه‌بوون، وان دزانی كا ئێزدی ب چ دئێشن، تیرۆرستێن داعشێ ئه‌و تشت دكرن، بۆ نموونه: وان دزانی كچ و ژن چه‌ند دپیرۆزن ل نك ئێزدیان، له‌ورا ژی تیرۆرستێن داعشێ تاوانێن دژی مرۆڤایه‌تیێ دگه‌ل كچ و ژنان ئه‌نجامدان، هه‌روه‌سا ژی مه‌زارگه‌هێن ئێزدیان ژناڤبرن بۆ وێ چه‌ندێ بنیاتێ ملله‌تێ ئیزدی و رهوریشالێن ئیزدیاتیێ نه‌هێلن، لێ تاكه ئومێدا ئێزدیان سه‌رۆك بارزانی یه و سه‌رۆك بارزانی ئومێد بۆ ئێزدیان ڤه‌گه‌ڕاندن.
