هه‌والگیریا ئه‌لمانی ژ به‌لاڤبوونا هزرا جیهادی دناڤ په‌نابه‌ران دا د ترسیت
ئه‌ڤرۆنیۆز، ئه‌یاد به‌روارى:
ده‌زگه‌هێ هه‌والگیریا ئه‌لمانی دلته‌نگیا خوه ژ بزاڤێن هنده‌ك توندره‌وێن ئاینی بۆ به‌لاڤكرنا هزرێن خوه یێن ئایینی یێن توندره‌و دناڤ سه‌دان هزار په‌نابه‌رێن گه‌هشتینه ئه‌لمانیا دیاركر، د هه‌مان ده‌مدا پۆلیسێن به‌رلین هه‌وه‌كا پشكنینێ ده‌ستپێكر ژ ئه‌گه‌رێ گومانێ ل سه‌ر هه‌بوونا تۆره‌كێ بۆ چه‌كداركرنێ ل مزگه‌فته‌كا وی باژێری.
ئۆفیسا پاراستنا دستووری ( هه‌والگیریا ناڤخوه‌یی یا ئه‌لمانی) ل دووڤ سایتێ (هافینگتۆن پۆست) دلته‌نگیا خوه ژ بزاڤێن ئیسلامیان ل ئه‌لمانیا كو ل بن ناڤێ پێشكه‌شكرنا هاریكاریێن مرۆڤایه‌تی دیاركر، كو مفای ژ بارودۆخێ په‌نابه‌ران دبینن بۆ به‌لاڤكرنا هزرێن خوه و گه‌هاندنا داخوازكرێن په‌نابه‌ریێ بۆ ناڤ رێزێن خوه.
هه‌والگیریا ئه‌لمانی دیاركر كو ئه‌و گرنگیه‌كا تایبه‌ت ب په‌نابه‌رێن گه‌نج دكه‌ن كو دبیت ببنه پاریه‌كێ ب ساناهی بۆ ئیسلامیێن تونده‌ره‌و، د به‌رامبه‌ر ڤێ چه‌ندێ دا ده‌زگه‌هێن ئه‌منی ل ئه‌لمانیا ئاشكراكر كو وان چو پێزانینێن باوه‌رپێكری نینن ل دۆر هاتنا گرۆپێن جیهادی دناڤ په‌نابه‌ران دا بۆ ئه‌لمانیا.
ل دۆر هژمارا سه‌له‌فییان ل ئه‌لمانیا، هه‌والگیریا ئه‌لمانی د ده‌مێ سێ هه‌یڤیچن بۆری دا هژماره‌كا مه‌زن ژێ تۆماركرینه و خویاكریه كو هژمارا وان ژ 7500 كه‌سان یێن بووینه 7900 كه‌س.
هه‌والگیریا ئه‌لمانی دیاركریه ژی كو سێكا هژمارا وان وه‌لاتیێن ئه‌لمانی ئه‌وێن چووینه دناڤ داعشێ دا ل عیراقێ و سووریێ یێن زڤرینه ئه‌لمانیا و وان پێزانین یێن ل سه‌ر 70 كه‌سان هه‌ین كو بووینه خودان شاره‌زاییه‌كا باش د شه‌ڕى دا.
دهێته زانین هه‌تا نوكه چو هێرشێن جیهادی یێن توندره‌و یێن مه‌زن ل ئه‌لمانیا نه‌هاتینه روودان به‌رۆڤاژی هنده‌ك وه‌لاتێن دی یێن ئورۆپی، لێ د مه‌ها تاباخا 2015 ێ دا دو كه‌سێن دناڤ داعشێ دا ل سووریێ ب زمانێ ئه‌لمانی گه‌ف ل ئه‌لمانیا كربوون و پۆلیسێن ئه‌لمانی به‌ری چه‌ند رۆژان عیراقیه‌ك كوشت پشتى هێرشه‌ك كریه سه‌ر پۆلیسه‌كا ژن ل به‌رلین و برینداركری و به‌رى نوكه ژی تۆمه‌تا تیرۆری بۆ وی هاتبوو ئاراسته‌كرن.
