هه‌ڕن ئه‌لف و بێیێن ئه‌ته‌كێتێن پێشوازیان و رێزگرتنێ بخوینن
غیاس خالد زێبارى
سه‌ره‌دانێن سه‌رۆكێن وه‌لاتان و سه‌رۆك حوكمه‌ت و پله‌دارێن بلند بلند بۆ وه‌لاتێن دیتر ئه‌ته‌كێتێن خوه یێن تایبه‌ت هه‌نه، هه‌ر ل لێدانا مارشا نشتیمانى و نمایشێن له‌شكرى و بلندكرنا ئالایا و پێشوازیا كه‌سێن هاوتا و…هتد. ئه‌ڤه هه‌مى رێزگرتنن ل مێڤانا و دیاركرنا خۆشحالیێ ب هاتنا وان.
رێزگرتن و پێشوازیا مێڤانان چه‌ندا جوان و رێك و پێك و گه‌رم و گۆڕ بیت، مێڤان دلخۆشتر دبن، شێوازێ پێشوازیا سه‌رۆك و سه‌ركرده‌یێن وه‌لاتان ژ لایێ سه‌رۆك و سه‌ركردێ، وه‌لاتێ مرۆڤى چه‌ندا جوان و رێكخستى و رێك و پێك و پڕى رێزگرتن بیت، مرۆڤ دلخۆشتر دبیت، چونكى سه‌ربلندى بۆ خه‌لكى وى یه و نیشانێ رێزگرتن و ره‌وشت بلندیێ یه. بۆ هه‌رێمه‌كا مینا كوردستانێ كو هێشتا خودان كیانه‌كێ سه‌ربه‌خوه نینه، شانازیه‌كا زێده مه‌زنه سه‌رۆك و سه‌ركرده‌یێن مه‌لاتێن مه‌زن و زلهێز سه‌ره‌دانێ لێ بكه‌ن، شانازیه‌كا مه‌زنتر كو سه‌ركردێن مه شیاینه هه‌رێما كوردستانێ لسه‌ر ئاستێ بلۆماسى و په‌یوه‌ندیێن هه‌رێمایه‌تى و نیڤده‌وله‌تى بگه‌هیننه ئاستێ وه‌لاتێن خودان سه‌روه‌رى و د ڤان سالاندا چه‌ندین سه‌رۆك و سه‌ركردێن وه‌لاتێن مه‌زن سه‌ره‌دانا كوردستانێ كریه.
ئه‌ڤ شانازیه ژى بۆ سیاسه‌ت و لێزانین و دبلۆماسیه‌تا سه‌رۆك مه‌سعوود بارزانى و سه‌رۆك نێچیرڤان بارزانى و سه‌رۆكێ حوكمه‌تا هه‌رێما كوردستانێ مه‌سرۆر بارزانى دزڤریت كو شیاینه د پێگه‌هێن خوه‌دا په‌یوه‌ندیێن مۆكوم یێن دپلۆماسى ل ده‌ف وه‌لاتان گرێبده‌ن و بووینه فاكته‌رێن ئاشتى و سه‌قامگیریێ و تێكه‌لكرنا به‌رژه‌وه‌ندیێن هه‌ڤپشك یێن ئابوورى و بازرگانى و كلتوورى و گه‌شتیار و پێشڤه‌چوونێن ئاڤه‌دانیێ.
ئه‌گه‌ر بۆ وه‌لاتان په‌یوه‌ندیێن دبلۆماسى جاره‌كێ د فه‌ر بن بۆ هه‌رێما كوردستانێ هزار جارا د فه‌ر و پێویستن، چونكى هێشتا قه‌وارێ هه‌رێما كوردستانێ ل بن گه‌ف و مه‌ترسی و پیلانێن نه‌یاران دایه و رۆژانه هه‌ول دده‌ن ڤى قه‌واره ژلایێ سیاسى و ئابوورى لاواز بكه‌ن، لێ سه‌رۆك و سه‌ركرده‌یێن مه شیاینه ب ڤان په‌یوه‌ندیێن دبلۆماسى و ئیراده و خۆراگریه‌كا نشتیمانى لسه‌ر وان هه‌مى پیلانان زال ببن و قه‌وارێ هه‌رێما كوردستانێ بپارێزن و پێشڤه‌ببه‌ن. مخابن ل ده‌مێ سه‌ره‌دانا سه‌رۆك ره‌جه‌ب ته‌یب ئه‌ردۆگان سه‌رۆك كۆمارێ توركیا بۆ هه‌رێما كوردستانێ ل رۆژا 22 ێ نیسانا 2024، ئێكه‌تیا نشتیمانیا كوردستانێ كو پارتیه‌كا سه‌ره‌كى یه ل ده‌ستهه‌لاتداریا كوردستانێ، نه‌خاسمه حوكمه‌تا هه‌رێمێ ب به‌هانه‌یێن بێ بنه‌ما ده‌ست ب هه‌وه‌كا نه‌شریكرنا وێ پێشوازیا جوان و هه‌ژى یا ل سه‌رۆك كۆمارێ توركیا كریه ل راگه‌هاندن و تۆرێن جڤاكى بتایبه‌ت خه‌ملاندنا هه‌ولێرا تایبه‌ت ب ئالایێ توركیا، بێ كو بزانن ئه‌ڤا هاتیه‌كرن گاڤه‌كا نۆرمال و سرۆشتى یه و ل پڕانیا وه‌لاتان وه‌كى رێزگرتن ل مێڤانا دهێته‌كرن، لێ دیاره چاڤێن وان ب ڤێ رێك و پێكیێ نا هه‌لێن و وه‌كى هه‌وه‌كا خۆشرینكرنێ به‌رپا كریه بۆ هه‌لبژارتنێن داهاتى، ره‌نگه ئه‌وێن ئه‌ڤ هه‌وه رێكخستى وێ هزرێ بكه‌ن كو ب ڤێ چه‌ندێ دێ روویێن خوه یێن ره‌ش و شه‌رمزاركرى ل سالێن ده‌ربازبووى هه‌تا نهۆ یێن چاندنا تۆڤێ دوبه‌ره‌كیێ و خزمه‌تكرنا داگیركار و ئینا هێزێن بیانى بۆ داگیركرنا كوردستانێ و لاوازكرنا قه‌واره و پێگه‌هێ هه‌رێما كوردستانێ و دروستكرنا ئاسته‌نگان ل هه‌مبه‌ر حوكمه‌تا هه‌رێمێ بتایبه‌ت كابینه‌یا نه‌هێ، نه‌خاسمه ل گه‌ل حوكمه‌تا فیدرال بۆ دروستكرنا قه‌یرانه‌كا ئابۆرى و دارایى ب راگرتنا بۆجه و مووچه‌یێن خه‌لكێ هه‌رێمێ، سپیكه‌نه‌ڤه، بێ بزانن كو خه‌لكێ هه‌رێمێ ئه‌و خیانه‌ت و بێ رێزیێن به‌رامبه‌ر پیرۆزیێن نه‌ته‌وى یێن ل رۆژێن خیانه‌ت و وه‌لاتفرۆشییا وان ل 16 ێ ئوكتۆبه‌را 2017 ل كه‌ركووكێ و فاكته‌ربوونا وان ل ده‌ركرنا چه‌ندین بریارێن دوژمنكارانه دژى هه‌رێما كوردستانێ ل دادگه‌ها فیدرال ژبیرنه‌كریه. ژلایه‌كێ دیتر ئه‌ڤه نیشانێ نه‌شاره‌زایا وانه ل ئه‌ته‌كێتێن پێشوازیكرن و رێزگرتنێ ل سه‌رۆك و سه‌ركرده‌یێن وه‌لاتان و مێڤانێن گرنگ، چونكى توركیا وه‌لاته‌كێ زلهێزێ ده‌ڤه‌رێ یه و ئه‌ندامێ هه‌ڤپه‌یمانیا ناتۆیه و جیرانێ كوردستانێ كوردستانێ، له‌وما زۆرا گرنگ و پێدڤى یه هه‌رێما كوردستانێ په‌یوه‌ندیێن موكۆمێن دۆستانه و هه‌ڤپشك دگه‌ل توركیا هه‌بن. لێ نابیت گازنده ژ وان بهێته‌كرن ل سه‌ر ڤان ره‌فتارا چونكى هێشتا وان ئه‌لف و بێیێن ئه‌ته‌كێن فه‌رمى یێن پێشوازیا سه‌رۆك و سه‌ركرده‌یان نه‌خواندینه و ئه‌گه‌ر بڤێت بزانن بلا هه‌ر نهۆ بچن خوه فێرێ و ئه‌لف و بێیێن وێ چه‌ندێ بكه‌ن، گازنده ژى ژ وان ناهێته‌كرن لسه‌ر ڤان ره‌فتاران، چونكى خه‌لكێ كوردستانێ باش دزانیت كو وان تنێ شاره‌زایى و بلیمه‌تى د چ واران دا هه‌یه.
