هه‌ژماره‌كا كارگه‌هان بۆ پیشه‌سازیا خوارنێ دێ هێنه ڤه‌كرن
هه‌ولێر، قائید میرۆ:
حوكمه‌تا هه‌رێما كوردستانێ پلان بۆ زێده‌كرنا به‌رهه‌مێ خوارنێ یێ ناڤخوه هه‌یه و به‌رپرسه‌كێ وه‌زاره‌تا بازرگانی و پیشه‌سازی ژی دبێژیت: دێ ب رێیا دامه‌زراندنا كارگه‌هان به‌رهه‌مێ ناڤخوه دابین كه‌ین.
فه‌تحی محه‌مه‌د، شیره‌تكارێ وه‌زاره‌تا بازرگانی و پیشه‌سازی یا حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، وه‌زاره‌تا بازرگانی و پیشه‌سازی پلان بۆ گه‌شه‌كرنا وان پڕۆژێن پیشه‌سازی یێن گرێدان ب پیشه‌سازیا خوارنێ ڤه هه‌نه، چونكو پلان ئه‌ڤه‌یه ئیدی هه‌رێما كوردستانێ بشێت هنده‌ك بڕگه‌یێن خوه خودانكرنێ بجه بینیت و گرنگیێ ب دامه‌زراندنا وان كارگه‌هان بده‌ت یێن پێدڤینه بۆ بازاڕێ هه‌رێما كوردستانێ و گۆت: “پێدڤیه ئێدی ئه‌و جۆره به‌رهه‌مێن خوارنێ بهێنه به‌رهه‌مئینان یێن خه‌لكی پێدڤی پێ هه‌ی، چونكو د ده‌مێ نوكه دا پتریا به‌رهه‌مێن پیشه‌سازیا خوارنێ ژ ده‌رڤه دهێن”.
فه‌تحی محه‌مه‌د گۆتژی: “چه‌ندین پێنگاڤ هاتینه هاڤێتن، ب تایبه‌تی د ڤان سالێن دووماهیێ دا ژلایێ كه‌رتێ تایبه‌ت و بازرگانان ڤه خواست ل سه‌ر ئه‌ڤان جۆره پڕۆژه و كارگه‌هان زێده بوویه، ئانكو دێ هژماره‌كا كارگه‌هێن كه‌رتێ تایبه‌ت هێنه دامه‌زراندن بۆ به‌رهه‌مئینانا به‌رهه‌مێن خوارنێ، وه‌زاره‌تا بازرگانی ژی ب هه‌ڤكاری دگه‌ل ده‌سته‌یا وه‌به‌رهێنانێ كار بۆ زێده‌كرنا به‌رهه‌مێ ناڤخوه دكه‌ت”.
