هه‌ژماره‌كا نه‌خۆشخانه‌یان ل هه‌رێمێ دێ هێنه ئاڤاكرن
هه‌ولێر، قائید میرۆ:
بڕیاره حوكمه‌تا هه‌رێما كوردستانێ هه‌موو ئاڤاهیێن نه‌خۆشخانێن سه‌ر ب حوكمه‌تێ ڤه ته‌مام بكه‌ت و بریكارێ وه‌زاره‌تا ساخله‌میێ ژی دبێژیت: چه‌ندین پڕۆژه‌یێن ئاڤاكرنا نه‌خۆشخانان هه‌نه و بزاڤ بۆ ته‌مام كرنا وان دهێنه كرن.
ره‌هێل فه‌ره‌یدون، بریكارێ وه‌زاره‌تا ساخله‌میا حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، هه‌ژماره‌كا پڕۆژه‌یێن ئاڤاكرنا نه‌خۆشخانان ل دهۆك و هه‌ولێر و سلێمانیێ و ئیداره‌یا سه‌ربخوه یا راپه‌ڕین هه‌نه و كار تێدا هاتیه راگرتن و گۆت: “د ده‌مێ نوكه دا كار تێدا هاتیه راگرتن، وه‌زاره‌تا ساخله‌میێ به‌رده‌وام یا كار دكه‌ت ئه‌و نه‌خۆشخانه هه‌موو بهێنه ته‌مامكرن و ئاڤاكرن بۆ ڤێ مه‌ره‌مێ ژی مه دخواز ژ وه‌زاره‌تا پلاندانانێ كریه كار بۆ ده‌ستپێكرنا پڕۆژێن وان نه‌خۆشخانان بكه‌ت”.
ره‌هێل فه‌ره‌یدون گۆتژی: “هنده‌ك ژ وان نه‌خۆشخانه‌یێن گشتینه، دیسا هنده‌ك ژ وان سه‌ر ب حوكمه‌تا به‌غدا ڤه‌نه، ئاریشا ئابووری رێگره ل هه‌مبه‌ر ته‌مامكرنا وان نه‌خۆشخانه‌یێن حوكمه‌تێ و نوكه ژی داخوازێ ژ وه‌زاره‌تا پلاندانانێ دكه‌ین بودجه بهێته مه‌زاختن بۆ ته‌مامكرنا نه‌خۆشخانێن حوكمه‌تێ، چونكی ئاڤاكرنا نه‌خۆشخانێن حوكمه‌تێ وه‌كو كه‌رتێ تایبه‌ت نینه و هنده‌ك ژ وان نه‌خۆشخانێن مه‌زنن و پێدڤی ب پاره‌یه‌كێ زۆر هه‌نه”.
