هه‌ژماره‌كا پرۆژان بۆ كێمكرنا زیانێن له‌هیان دێ هێنه بجهئینان
ئه‌ڤرۆ، حه‌مۆ محه‌مه‌د:
رێڤه‌به‌رێ گشتیێ باژێرڤانیان ل پارێزگه‌ها دهۆكێ راگه‌هاند، د ده‌مێ سالێن 2020 و 2021 دا، ب تایبه‌ت د سالا 2020 دا، له‌هی رابوون و بوونه ئه‌گه‌ر كو زیان ب پرۆژه‌یێن خزمه‌تگۆزاری بكه‌ڤن و دبێژیت: د پلانا مه دایه هه‌ژماره‌كا پرۆژه‌یان بۆ كێمكرن و نه‌هێلانا زیانێن له‌هیان بجه بینین.
ئه‌ندازیار دیار به‌حری، رێڤه‌به‌رێ گشتیێ باژێرڤانیان ل پارێزگه‌ها دهۆكێ دیار كر، ئه‌و پرۆژه‌یێن خزمه‌تگۆزاری یێن د نوكه دا ل سنوورێ رێڤه‌به‌ریا گشتیا باژێرڤانیان دهێنه ئه‌نجامدان، هه‌موویان سۆلین ژی ل گه‌ل دهێنه چێكرن، بۆ هندێ رێژه‌یا زیانێن له‌هیان ل سه‌ر باژێرڤانیان كێمتر لێ بهێن و له‌هی په‌یدا نه‌بن.
ئه‌ندازیار دیار به‌حری گۆت: “مه هه‌ژماره‌كا مه‌زن یا پرۆژه‌یان بۆ نه‌مانا زیانێن له‌هیان د پلانێ دانه و بۆ وه‌زاره‌تێ هاتینه فرێكرن، لێ هێشتا پاره‌یێ پێدڤی بۆ وان پرۆژه‌یان نه‌هاتیه ته‌رخانكرن”.
ئه‌ندازیار دیار به‌حری ئاشكرا ژی كر كو پرۆژه‌یه‌كێ چێكرنا سۆلینان ل سنوورێ باژێرڤانیا مسێریكێ ب گۆژمێ 132 ملیۆن دیناران هاتیه ئه‌نجامدان و ئاریشه چاره‌سه‌ربوویه، هه‌روه‌سا پرۆژه‌یه‌ك ژی ل به‌رده‌ڕه‌ش ب گۆژمێ 24 ملیۆن دیناران ل سه‌ر پێشینه‌یا هه‌یڤانه یا باژێرڤانیا به‌رده‌ڕه‌ش بۆ نه‌مانا زیانێن له‌هیان ب دووماهی هاتیه.
