هه‌ڤالا مێشێن هنگڤینی یه
خانكێ، دلڤین ره‌شید:
گولستان عومه‌ر، كچه‌كا خه‌لكا باعه‌درێ یه، بۆ ده‌مێ چه‌ندین ساله دناڤ مالا خوه دا كارێ بخودانكرنا مێشێن هنگڤینی دكه‌ت و ئه‌و دبێژیت ئه‌ز چو زه‌حمه‌تێ بڤی كاری ڤه نابینم، چنكو گه‌له‌ك حه‌ز ژ ڤی كاری دكه‌م و دخوازم گه‌له‌ك كچ و ژن چاڤ ل من بكه‌ن و خوه ژڤی كاری نه‌ترسینن.
ناڤهاتیێ بۆ ئه‌ڤرۆ گۆت: هه‌ر چه‌نده نوكه ئه‌ز قوتابیمه ل پولا دوازدێ ئاماده‌یی، لێ ئه‌ز گه‌له‌ك حه‌ز ژ بخوانكرنا مێشێن هنگڤینی دكه‌م، چنكو ئه‌ڤ پێنجی سالن ئه‌ڤ پیشه د ناڤ مالا مه‌دا هه‌یه و مه نه‌ڤێت ژێ دوور كه‌ڤین، و ژبه‌ر حه‌زا منا زێده‌ی بۆ ڤی كاری من چو جاران هه‌ست ب زه‌حمه‌ت یان وه‌ستیانێ نه‌كریه، و پشته‌ڤانێن من ژی هه‌ر مالباتا منن، بۆ زانین ئه‌ز ب شێوازه‌كێ دروست سه‌ره‌ده‌ریێ ل گه‌ل مێشێن هنگڤینی دكه‌م چنكو من پشكداری د چه‌ند خۆلێن بخودانكرنا واندا كریه و هه‌تا راده‌كێ باش من شاره‌زایی د چاوانیا بخودانكرن و چاڤدانا وان دا هه‌یه، و نوكه ئه‌ز مێشێن هنگڤینی یێن بووینه هه‌ڤالێن ئێك و ژێ ناترسم و ئه‌ز ل وێ باوه‌ریێ مه كو بۆ خودانكرنا مێشێن هنگڤینی چو جوداهی دناڤبه‌را ژن و زه‌لامان دا نینه، له‌ورا دخوازم گه‌له‌ك ئافره‌تێن دی ده‌ست بڤی كاری بكه‌ن.
