هه‌ڤپه‌یمانێن ئه‌مریكا ژ روودانێن ل ئه‌فغانستانێ دلگرانن
ئه‌ڤرۆ:
رۆژناما واشنتۆن پۆست یا ئه‌مریكی دوهی د راپۆرته‌كێ دا دیار كر كو پشتی روودانێن ڤێ دووماهیێ ل ئه‌فغانستانێ هه‌ڤپه‌یمانێن ئه‌مریكا ل رۆژهه‌لاتا ناڤین ب تایبه‌تی ژی وه‌لاتێن عه‌ره‌بی ژ هه‌لوه‌ست و سیاسه‌تا بایدنی دلگرانن و ژ به‌ر هندێ ژی جۆ بایدن بریار دایه كو دو وه‌زیرێن ئه‌مریكا سه‌ره‌دانا هنده‌ك ژ وه‌لاتێن رۆژهه‌لاتا ناڤین بكه‌ن.
هه‌مان رۆژنامێ دیار كریه كو هه‌ر یه‌ك ژ وه‌زیرێن ده‌رڤه و به‌رگیریێ یێ ئه‌مریكا دێ سه‌ره‌دانا قه‌ته‌ر، سعوودیێ، به‌حرێن و كوێتێ كه‌ن و دێ په‌یاما جۆ بایدنی گه‌هینه به‌رپرسێن وان وه‌لاتان كو د په‌یاما بایدنی دا هاتیه روودانێن ل ئه‌فغانستانێ كارتێكرنا خوه ل هه‌ڤپه‌یمانێن ئه‌مریكا ل رۆژهه‌لاتا ناڤین ناكه‌ت تشتێ ل ئه‌فغانستانێ روو دای ل چو جهه‌كێ دی دوباره نابن و ئه‌مریكا ب چو ره‌نگه‌كێ ده‌ستان ژ هه‌ڤپه‌یمانێن خوه ل رۆژهه‌لاتا ناڤین به‌رناده‌ت.
چاڤدێرێن سیاسی دیار دكه‌ن كو وه‌لاتێن عه‌ره‌بی و هه‌ڤپه‌یمانێن ئه‌مریكا ژ به‌ر روودانێن ل ئه‌فغانستانێ دلگرانن، چونكو ئه‌و یه‌ك دشێت كارتێكرنه‌كا خوه یا خراب ل به‌رژه‌وه‌ندیێن وان ل ده‌ڤه‌رێ بكه‌ت، ژ به‌ر هندێ ژی سه‌رۆكێ ئه‌مریكا دڤێت ب رێیا هنارتنا دو وه‌زیران بۆ وه‌لاتێن عه‌ره‌بی ڤێ په‌یامێ بده‌ته وان كو ئه‌مریكا ده‌ستان ژ هه‌ڤپه‌یمانێن خوه به‌رناده‌ت.
