هه‌ڤڕا مه گۆت به‌لێ
به‌هزاد به‌هرام
ئه‌ڤ جاره، ژ مه ڤه‌بن
ژ به‌هانا و هیجه‌تا و
فه‌توایا ڤه‌بن
ژ فه‌تح و ئه‌نفال و
داگیركرنێ ڤه‌بن
هوون زالم و گاورن
نه هه‌ڤال و براده‌رن
ده‌وله‌ت و ده‌وله‌تبوون
بۆ هه‌وه حه‌لال و دروسته
بۆ مه ژی حه‌رام
ئاخ و وه‌لات بۆ هه‌وه
دایكه‌كا پیرۆزه
بۆ مه ژی ژنبابه‌كا داڤدۆز
ئازادی، ئاشتی، سه‌ربه‌ستی
بۆ هه‌وه پیرۆزی و بهانه
ژ بۆی مه ژی هه‌ر
قه‌ده‌غه و نه‌ره‌وانه
ئه‌ڤ جاره و ڤێجارێ
ژ مه ڤه‌بن، ئه‌زێ ل دیوانێ
دیوان پڕی گه‌رمه
ئه‌ڤ دیوانه
چیایه…
ئارارات و پاشایه
باژێره…
دێرسم و سه‌یده
پایته‌خته…
ئامه‌د و شێخه
مه‌یدانه…
چارچرا و قازی یه
رووباره….
ئاراس و مه‌لایه
دل و مناره‌یه…
قامشلۆ و هه‌ڤلێره
سه‌رۆك و رێبه‌ره…
ئه‌ڤ جاره، ژ مه ڤه‌بن
زمانێ مه، گه‌له‌كێ نه‌رمه
نه كینه نه‌ژی كه‌ربه
ئه‌ڤ بریاره نه‌ك شه‌رمه
ژ دیوانێ وه‌شاند كه‌ته سه‌رمه
هاته زمان مه ژ دل و جان
گۆت به‌لێ… به‌لێ… به‌لێ
د كوردی و كورده‌واری دا
په‌یڤ و گۆتنا به‌لێ
چه‌ند ژیر و شیرینه
گوهاركا زێڕینه
به‌رسڤا هزار پرسان
ئه‌ڤ جیرانه ژێ ترسان
مه‌لهه‌ما برینێن كووره
نێرگزا ل سه‌ر تابوت و گۆره
ئاخینك و كه‌سه‌را دووره
ریفراندۆمه ئه‌نجام هه‌ره باش و زۆره
