هه‌ڤڕكى و بازاڕێ دوشهشا سۆتى
د هه‌ڤركیا ژیانێ دا، هنده‌ك جاران، مرۆڤ ب ده‌ستێ خوه هنده‌ك هه‌ڤرك و به‌ڤلان بۆ خوه چێدكه‌ت و زێده‌ى قه‌باره‌یێ وى مه‌زن دكه‌ت، پشتى هینگێ ئێدى ل گوهێن مرۆڤى سواردبت و چاره‌نڤیسێ مرۆڤى دئێخته دهاتوباتێ دا. ئه‌ڤه ژى به‌هرا بهتر سه‌را كورسیێ و مالێ دنیایێ دو لایه‌ن یان بهتر ل هه‌ڤدو دبنه ره‌شه و سه‌رباركێن كامباخ د دووڤ دا دهێن. ئه‌ڤ هه‌ڤڕكیه ژى ژ ڤالاهیه‌كێ ناهێت، دبت بهتر ژ هه‌ڤیره‌كێ كه‌ڤن دهێت وێ ئاڤێ ڤه‌دخۆت و هه‌ڤڕكى به‌رده‌وامدبت.
د ڤێ هه‌ڤڕكیێ دا، هه‌ر ده‌مه‌كی مرۆڤى ب گۆتاره‌كا ته‌ڤایى یان تاكى ئالییه‌ك یان كه‌سه‌ك كره ئارمانجا په‌یڤێن زڤر و بزاڤا شكاندنا وى كر و كۆرانه ب لاوازیا لۆژیكێ ئه‌قلى ئه‌و كه‌س شكاند و بریندار كر، هینگێ ئالیێ هێرشبه‌ر مسۆگه‌ر هزره‌كێ بۆ وى ئالیێ كریه ئارمانجا هێرشا خوه دكه‌ت كو ئه‌و ئالى گه‌فه ل سه‌ر وى و دبت ل پاشه‌رۆژێ شكه‌ستنێ به‌رامبه‌ر وى هه‌ڤركى بینت و ئه‌و ببته میارتخوه‌رێ وى، ئه‌وا ئه‌و نه‌شیاى بكت هه‌ڤركێ نوو، بۆ خوه مفاى ژ شاشى و كێماسێن وان وه‌ربگرت و بكت.
هه‌ر ژ كه‌ڤندا ئه‌ڤ ره‌وشه د ناڤ پرانییا ته‌خه‌یین جڤاكێ كوردستانى دا بازاره‌كێ به‌رده‌وامه، هه‌تا د دیرۆكا هه‌ڤچه‌رخ دا ئه‌ڤ هزرا نه‌رێنى چۆیه د ناڤ هه‌یكه‌ل و ته‌ڤگه‌رێن حزبى و سیاسى دا و چو جاران تاكێ كورد داگێڕان بۆ كوڕێ نفشێ خوه ب خوه‌شى نه‌كره، لێ هه‌رده‌م ساناهى و داگێران بۆ بیانیان كریه و خوه كریه به‌نده و خزمه‌تكارێ وان؛ وه‌كى ڤیاى بۆ وى كریه و ب ده‌ستێ خوه وه‌لاتێ خوه وێرانكریه.
ئه‌ڤرۆ ل هه‌رێما كوردستانێ ئه‌ڤ بازاڕه د ناڤبه‌را پارتێن كوردى دا گه‌رمتر لێ هاتیه و هه‌ر ئێك ژ ئالیێ خوه یێ دى تاوانبار دكت كو چه‌ته و خزمه‌تكارێ دژمنانه و تنێ ئه‌و كوردپه‌روه‌ر و خه‌باتكه‌ره و كێشه‌یا كوردى گه‌هاندیه قۆناغا ب ده‌ستڤه‌هینانا ئارمانجێن نه‌ته‌وه‌یى. راستیا وێ هه‌كه تنێ نیڤه‌كا بزاڤا ئازادیخوازیا كوردى، ب دروستى بۆ گه‌هشتنا ئارمانجێن نه‌ته‌وه‌یى یێن ستراتیژى هاتباكرن، نها به‌ریا رێكه‌ڤتنا (سایكس ـ پیكۆى) ئه‌م گه‌هشتبووینه ئارمانجێن خوه یێن ده‌ستنیشانكرى.
ده‌ستودارێ پتر ژ سه‌د سالێن خه‌باتا كوردان د دیرۆكا نوو دا شاهده كو كوردان كێماسیه‌ك مه‌زن هه‌یه كو هه‌رده‌م بوویه ئاسته‌نگه‌ك د دریا فاكته‌رێن ناڤخوه‌یى دا؛ هه‌تا نها فاكته‌رێن خویانى هاریكار نه‌بووینه كو خوه ل سه‌ر فاكته‌رێن بیانى بسه‌پینن و ده‌وله‌تا كوردى ژ دایك ببت. واته هه‌كه ل پێشیا فاكته‌رێن ده‌رڤه فاكته‌رێن ناڤخوه‌یى هاریكار نه‌بن، هه‌مى ده‌ما ره‌وش دێ بۆ ژ دایكبوونا ده‌وله‌تا كوردى فالنجى بت و ژدایكبوونا وێ هه‌كه هه‌بت ژى دێ ب نشته‌رگه‌ریه‌كا قه‌یسه‌رى بت.
مه بڤێت یان نه‌ڤێت د درێژیا سه‌د سالێن بۆهرى دا، هه‌مى بزاڤێن حزبێن كوردى كرین چ ب درووشمێن دینى یان عه‌شائیرى یان نه‌ته‌وه‌یى، بزاڤێن چه‌پ و راستى… هتد، شكه‌ستن ب ده‌ستڤه‌هینانا ئارمانجێن خوه دایه و نه‌كارینه كیانه‌كێ كوردى ب رێكا خوه چێكن و خوه ل سه‌ر فاكته‌رێن ده‌رانى بسه‌پینن.
ل دووڤ ره‌وشا نها، هندى حزبێن كوردى پێداچۆنه‌كێ ب سیاسه‌تا خوه دا نه‌كن و رێڤه‌به‌رێن وان ژ بورجێن خوه یێن عاجى په‌یانه‌بن، دانپێدانێ ب یێ دى نه‌كن و ره‌وشه‌نبیریا هه‌ڤدو خائینكرنێ ژ سه‌رێ خوه ڤالانه‌كن، تنێ ئارمانجا وان رزگاركرنا ملله‌تى نه‌بت ژ هه‌ر ترسه‌كا نه‌چاڤه‌رێكرى و گه‌هشتنا ئارمانجێن ره‌وایێن نه‌ته‌وه‌یى، ملله‌ت به‌ر ده‌وام دێ ل ژێر حوكمرانیا ڤان حزبێن كلاسیكى نالت وخه‌باتا بۆ ده‌وله‌تێ دهێته‌كرن دێ د ناڤ ده‌ستێن هه‌موویان دا بته دوشهشا سۆتى.
