هه‌ڤڕكیا ئه‌مریكا و ئیرانێ و پاشه‌رۆژا سنۆرێن ده‌ڤه‌رێ
دپێداچوون وبه‌راوردیێ دادێ بینین چه‌ند هه‌لویستێن لاواز دسیاسه‌تا ئوبامایی دا دیار دبن ل رۆژهه‌لاتا ناڤین،ل تونس و لیبیا و مسر و یه‌مه‌نێ رژیم هاتنه گۆهۆرین و ژناڤبرن، ل سووریێ رژێما به‌شار ئه‌سه‌د نه هاته ژناڤبرن، چونكو پشتگیری ژ ئیرانێ و هه‌ڤالێن وێ هه‌بوو نه‌خاسمه رۆسیا و ڤێ چه‌ندێ هنده‌ك هۆكار ل دووڤ خوه په‌یداكرن وه‌كو:ـ
1. په‌یدابوونا داعش كو ژ به‌ره‌ی نوسره ڤه‌بووین و بۆ عیراقێ هاتین ل پاریزگه‌هێن سوننی خوه ب هێزخستین و ده‌سهه‌لاتا خوه ل سه‌ر سه‌پاندی ب ناڤێ هندێ كو وان ژ سته‌ما میلیشاتێن مالكی و شیعان رزگار بكه‌ن به‌لێ پشتی هینگی هێرش كرنه سه‌ر كوردان و عه‌ربێن سوننه و چو زیان نه‌گه‌هاندنه ده‌ڤه‌رێن شیعه‌نشین ئیران شانازیێ بخوه دكه‌ت كو قاسمی سلیمان شیا ڤی رۆلی بگێریت كو به‌رێ هێرشا داعشێ ژ سامه‌رایێ و به‌غدایێ بگوهۆریت بۆ مه‌خمور و هه‌ولێر و كوردان بێخیته د به‌رهنگاربوونا داعشێ دا و په‌یوه‌ندیا ل ناڤبه‌را به‌غدا و هه‌رێمێ ڤه‌گێرته‌ڤه، هنده‌ك شاره‌زا دبێژن جودابوونا داعشێ ژ به‌ره‌ی نوسره پلانه‌كا موخابه‌راتی بوو ب هاریكاریا ئیرانێ و رۆسیا هاتیه‌دارشتن و جێبه‌جێكرن.
2. نه‌بوونا چو هه‌لۆیستێن ب هێز ژ لایێ ئه‌مریكا و هه‌ڤپه‌یمانێن وێ ڤه ل به‌رامبه‌ر رژێما ئه‌سه‌دی و روودانێن ده‌ڤه‌ری ده‌لیڤه په‌یداكر بۆ ئیرانێ خوه بكه‌ته ئاراسته بۆ رۆسیا و چینێ و هندی ل گه‌ل ئه‌جنده‌یێن خوه ل ده‌ڤه‌رێ و خوه دیاركه‌ن وه‌كو جه‌مسه‌رێ رۆژهه‌لات ل به‌رامبه‌ر ئه‌مریكا و رۆژئاڤا.
3. دانوستانێن ئیرانێ و كۆما (5+1) هه‌یبه‌ته‌ك بۆ ئیرانێ په‌یداكر و رۆلێ پێشه‌وایێ دایێ ل ده‌ڤه‌رێ نه‌خاسمه ل وه‌لاتێن عه‌ره‌بی.
ب ڤێ چه‌ندێ بۆ خه‌لكی دیار دبیت كو ئه‌مریكا ئێدی نامینیت زال ل سه‌ر ده‌ڤه‌رێ و هه‌ڤالێن وێ نه‌شین پشتا خوه پێ گه‌رم بكه‌ن توركیا وه‌كو هاڤپه‌یمانه‌كا ئه‌مریكا یا كه‌ڤن وه‌كو پێدڤی خوه نا ئێخیته ژێر ستراتیجیا ئه‌مریكا ل ده‌ڤه‌رێ، چونكو وێ بخوه ئه‌جینده‌یێن خوه یێن جودا هه‌نه. دیسا ل كاودانێن بوهارا عه‌ره‌بی ئه‌مریكا نه‌شیا سه‌نگا خوه بێخته كار ل ده‌ڤه‌رێ و لێنێرینێ د هه‌ڤپه‌یمانیه‌كا نوو دا بكه‌ت یان شوونگران بۆ په‌یدا بكه‌ت، هه‌ر وه‌سا ئۆبامای ده‌سهه‌لاتێن خوه یێن سه‌رۆكاتیێ یێن تایبه‌ت بكارنه‌ئینان بۆ مایتێكرن و سه‌ره‌ده‌ریكرنێ ل گه‌ل وان كاودانان ئه‌ڤه ژی بوویه بێئۆمیدی بۆ دۆستێن ئه‌مریكا ل ده‌ڤه‌رێ، چونكو وه‌سا هزر دكه‌ن كو ئه‌مریكا یا لاوازبووی ژ لایێ سیاسی و عه‌سكه‌ری و ئابووریڤه نه، ب تنی دێ فره‌جه‌مسه‌ری په‌یدا بیت، به‌لكو ئه‌مریكا نامینیت هێزا ئێكێ ل جیهانێ. شرۆڤه‌كار دیار دكه‌ن كو هه‌كه ئه‌مریكا بڤێت سه‌نگا خوه ل ده‌ڤه‌رێ بپارێزیت، پێدڤیه ئه‌مریكا كار بكه‌ت بۆ گوهۆرینا هنده‌ك سنۆران و په‌یداكرنا هنده‌ك هه‌ڤپه‌یمانێن نوو وه‌كو هه‌رێمه‌كا ئێكگرتی ژ كوردستانا باشۆر و رۆژئاڤا ل سووریێ و عیراقێ و هه‌رێمه‌كا عه‌ره‌بێن سوننه ژ هه‌ردو ده‌وله‌تان دێ ل سووریێ هه‌رێمه‌كا عه‌له‌وی د ناڤبه‌را هه‌ردویان دا مینیت و دێ یا لاوازبیت. ل عیراقێ دێ هه‌رێمه‌كا شیعی مینیت دێ لایه‌نگیرێن علمانی و دینی كه‌ڤنه د هه‌ڤڕكیێ دا و نه دووره ئه‌و ژی داخوازا هه‌رێمێن جو دا بكه‌ن، ل ڤێره پرۆژێ هیلالا شیعی دێ هێنه ژێك ڤه‌قه‌تاندن و ئه‌جنیده‌یێن ئیرانێ دێ ل ده‌ڤه‌رێ لاواز بن هه‌ڤپه‌یمانیا عه‌ره‌بێن سوننه ل گه‌ل ئه‌مریكا دێ هێنه نووژه‌نكرن و په‌یوه‌ندیێن وان ل گه‌ل ئه‌مریكا دێ ب هێز كه‌ڤن هه‌رێما كوردستانێ، ئه‌وا ژ كوردستانا باشۆر و رۆژهه‌لات په‌یدا دبیت دێ بیته پێگه‌هه‌كا ب هێز بۆ ئه‌مریكا و ل پاشه‌رۆژێ بیته په‌نایه‌ك بۆ كوردێن رۆژهه‌لات و باكۆر ژی خوه بده‌نه ل گه‌ل دا و سنۆرێن نوو ل گه‌ل توركیا و ئیرانێ ژی بهێنه دورستكرن
ب ڤێ چه‌ندێ ئه‌مریكا دێ شێت پێگه‌هه‌كا ب هێز بخوه ل ده‌ڤه‌رێ په‌یدا كه‌ت و به‌رنامه‌ی دارێژیت بۆ گوهۆرینا سنۆرێن چه‌ند ده‌وله‌تێن دی ل رۆژهه‌لاتا ناڤین كو ل وی چه‌رخی هاتبوونه دانان ل دووڤ به‌رژه‌وه‌ندیێن زلهێزێن وی سه‌رده‌می كو نه خودانێن وی ئه‌ردی بوون و داینه هنده‌ك خه‌لكێ نه ژ هه‌ژی هۆسا ماف و ئیراده و ئاخ دهاتنه داگیركرن و ل ئێكۆدو دكرنه دیاری بێده‌نگیا وان وه‌لاتان ناراگه‌هینیت كو دێ بیته واقع به‌لكو د چاڤه‌رێی ده‌لیڤا دیرۆكێنه و هه‌ڤپه‌یمانێن نوو كو نه‌خشێن سنۆران بهێنه گوهۆرین و ئه‌ڤه حوكمێ دیرۆكێ یه كو ئیمبراتوریه‌ت دهێنه دانان و ژناڤبرن و ده‌وله‌تێن مه‌زن بچووك دبن و یێن بچووك مه‌زن دبن ئه‌م ژی وه‌ك ملله‌تێ كورد ب ئۆمێدین كو قوربانیێن مه و خه‌باتا ملله‌تێ مه ل جیهانێ یێ ده‌نگڤه‌دای و مێژوو یا بۆ مه دبیته شاهد كو ئه‌ڤ كاره‌ساتێن ب سه‌رێ ملله‌تێ مه هاتین ژ ئه‌نجامێن وێ سته‌ما دیرۆكی بووینه و ئه‌ڤرۆ به‌رهه‌ڤیه‌ك هه‌یه و كاودان ل بارن ئه‌م وێ حه‌یفێ هه‌لینین و وان سنۆرێن ده‌ست چێكری ب هه‌ڕفینین و د وه‌لاتێ خوه دا ب ئازادی و سه‌رفرازی بژین.
