هه‌ڤژینیا مسیار د زێده‌بوونێ دایه
هەولێر، قائید میرۆ:
شاره‌زایه‌كێ جڤاكی ئاشكرا كر، دیارده‌یا هه‌ڤژینیا مسیار د زێده‌بوونێ دایه و هه‌تا نوكه‌ژی چو ئامارێن فه‌رمیی لدۆر هژمارا وان كه‌سان نینه یێن سالانه پرۆسا هه‌ڤژینیا مسیار ئه‌نجامدده‌ن هه‌روه‌سا دبێژیت، هژماره‌كا زۆرا زه‌لامێن هه‌رێما كوردستانێ یێن بۆ مه‌ره‌مێن بازرگانی و خواندنێ و هه‌ر كاره‌كی دچنه ده‌رڤه هه‌ڤژینیا مسیار ئه‌نجام دده‌ن.
ئاریان به‌رزنجی، شاره‌زایێ جڤاكی بۆ رۆژناما ئه‌ڤرۆ دیاركر” هه‌ڤژینیا مسیار ل هه‌رێما كوردستانێ زیده‌بوویه و رۆژ بۆ رۆژێ ژی به‌ره‌ف زێده‌بوونێ دچیت، ئه‌گه‌رێن زێده‌بوونا هه‌ڤژینیا مسیار بۆڤێ چه‌ندێ ڤه‌دگه‌ڕیت هژماره‌كا زۆرا ئافره‌تێن عێراقێ و هه‌رێما كوردستانێ بێ هه‌ڤژینن و هنده‌ك ئامار ئاماژه بڤێ چه‌ندێ دكه‌ن ئێك ملیۆن ژنێن بێ هه‌ڤژین ل عێراقێ هه‌نه، واته هه‌ڤژینێن وان نه‌ماینه ڤێجا د ئالۆزیێن عێراقێ هاتبن كوشتن یانژی هاتبن ته‌لاقدان، هه‌ڤژینیا مسیار ئه‌گه‌ره‌كێ دیژی هه‌یه خه‌لك له‌وڕا دخوازیت هه‌ڤژینیا مسیار پێك بینیت ئه‌وژی باشبوونا ئابورا ژنان و ئابورا سه‌ربخۆیه، دێ بینی ئافره‌ته‌كێ هه‌ڤژین نه‌مایه یان قه‌یره‌بوویه و ره‌وشا ئابوریا وێ ژی یا باشه ژبۆی تێركرنا حه‌زین خوه دێ هه‌ڤژینیا مسیار پێك ئینیت.
ئاریان به‌رزنجی گۆتژی” هژماره‌ك وان كه‌سێن لهه‌رێما كوردستانێ دچنه وه‌لاتێن ده‌رڤه ڤێجا بۆ مه‌ره‌مێن بازرگانی بن یانژی مه‌ره‌ما خواندنێ و هه‌ر كاره‌كێ دی هه‌ڤژینیا مسیار پێك د ئینن ئه‌ڤه‌ژی بۆڤێ چه‌ندێ ڤه‌دگه‌ڕیت پێدڤی ب هه‌ڤژینیێ هه‌یه، مه‌رجێن پێك ئینانا هه‌ڤژینیا مسیار دیارن و دڤێت گرێبه‌ست بهێته تۆماركرن دناڤبه‌را هه‌ردولا، به‌لێ تنێ دێ ئافره‌ت ل هنده‌ك مافێن خۆ یێن هه‌ڤژینیێ زه‌لامی ئازاكه‌ت، ئه‌و جورێ هه‌ڤژینیێ د زێده‌بوونێ دایه و هه‌موو جیهان ڤه‌گرتیه، ئه‌ڤان سالێن دوماهیێ ژی هه‌رێما كوردستانێ ژی ئه‌و جورێ هه‌ڤژینیێ په‌یدابوویه، به‌لێ هه‌تا نوكه چو ئامارێن فه‌رمیی نینه لدۆر هژمارا وان كه‌سێن هه‌ڤژینیا مسیار پێك ئینایه، به‌لێ بێگومان هژمارا وان گه‌له‌ك زۆره.
لدۆر هه‌ڤژینیا سه‌رده‌مژی ئارایان به‌رزنجی ئاماژه‌كر” من پڕۆژه‌ك به‌ری چه‌ند سالان پێشكه‌شی په‌رله‌مانێ كوردستانێ كربوو، به‌لێ مخابن كار لسه‌ر نه‌هاته‌كرن، گوره‌ی ئه‌ڤی پڕۆژه‌ی جوره‌كێ هه‌ڤژینیا سه‌رده‌م من پێشنیاركربوو ئه‌وژی گوره‌ی كاودانێن نوكه هه‌رێما كوردستانێ تێدا ده‌رباز دبیت، ئه‌گه‌ر بهێت و ئه‌و پڕۆژه سه‌ر بگریت و ژلایێ په‌رله‌مانی بهێته په‌سه‌ندكرن ئه‌ڤه دێ كاره‌كێ باشبیت، بتایبه‌تی بۆ ئه‌و كه‌سێن شیانێن پێك ئینانا خێزانێ نینه.
